ക്രിക്കറ്റിനോടുള്ള ഇഷ്ടം സംരംഭമായി; ഇന്ന് വിദേശത്തേക്ക് ബാറ്റ് അയക്കുന്ന കൊച്ചിക്കാരന്‍

ക്രിക്കറ്റ് ബാറ്റുകൾ കൈമാറ്റി വിദേശത്തേക്ക് കയറ്റി അയക്കുന്ന ഒരു കൊച്ചിക്കാരനുണ്ട്. 21-ആം വയസ്സിൽ തുടങ്ങിയ സംരംഭം വൻവിജയമായതിന്റെ സന്തോഷത്തിലാണ് പി. എസ്. അബ്ബാസ്. സമൂഹമാധ്യമങ്ങളിലും വൈറലാണ് അബ്ബാസിന്റെ ബാറ്റ് കച്ചവടം.

ക്രിക്കറ്റിനോടുള്ള അതിയായ ഇഷ്ടം മൂത്താണ് ഒരു വ്യത്യസ്തമായ ബിസിനസ് ആരംഭിക്കാനുള്ള ആലോചന. ജോലിയെ ഉപേക്ഷിച്ച് പൂർണമായും ബിസിനസ് വഴിയിലേക്കുമാറാൻ തീരുമാനിച്ച അബ്ബാസ്, തന്റെ പാഷൻ തന്നെയായിരുന്നു തന്റെ പ്രൊഫഷൻ ആക്കിയത്.

ക്രിക്കറ്റ് ബാറ്റ് സ്കൂപ്പിങ്ങാണ് പരിപാടി. കളിക്കാരുടെ ഇഷ്ടാനുസരണം ബാറ്റിന്റെ നീളവും ഭാരവും ക്രമീകരിക്കുന്നു. പ്രധാനമായും സോഫ്റ്റ് ബോൾ കളിക്കാനുപയോഗിക്കുന്ന ബാറ്റുകളാണ് അദ്ദേഹം ചെത്തിമിനുക്കുന്നത്.

കാശ്മീരിൽ നിന്നാണ് ബാറ്റുകൾ എത്തിക്കുന്നത്. ദിവസേന 100-ലധികം ബാറ്റുകൾ സ്കൂപ്പിങ് ചെയ്യുന്നത് ഈ ചെറുപ്പക്കാരനെ വ്യത്യസ്തനാക്കുന്നു. ഇന്ത്യൻ ക്രിക്കറ്റ് ഇതിഹാസം സച്ചിൻ തെണ്ടുൽക്കറിന് ഒരു ബാറ്റ് സമ്മാനിക്കണമെന്നത് അബ്ബാസിന്റെ ആഗ്രഹം.