ഉരുകുന്ന ഹിമാലയം; കാലാവസ്ഥാ പ്രതിസന്ധിയുടെ നേര്‍ക്കാഴ്ച

ലോകത്തിന്റെ മേൽക്കൂരയെന്ന് വിശേഷിപ്പിക്കപ്പെടുന്ന ഹിമാലയം ഇന്ന് കടുത്ത പാരിസ്ഥിതിക അടിയന്തരാവസ്ഥയിലാണ്. നേപ്പാളിൽ അടുത്തിടെയുണ്ടായ വിനാശകരമായ പ്രളയവും ഉരുൾപൊട്ടലുകളും കേവലം ഒരു പ്രാദേശിക ദുരന്തമല്ല. മറിച്ച്, കാലാവസ്ഥാ വ്യതിയാനം, അശാസ്ത്രീയ വികസനം, ഹിമാനി ഉരുകൽ എന്നിവ ചേർന്ന് സൃഷ്ടിക്കുന്ന ഒരു വൻ ദുരന്തത്തിന്റെ അപായമണിയാണ്. ഈ പ്രതിസന്ധി നേപ്പാളിന്റെ അതിർത്തികളിൽ ഒതുങ്ങുന്നില്ല—ഇന്ത്യയുടെ ഹിമാലയൻ താഴ്‌വരകളിലേക്കും ടിബറ്റിലെ ചൈനീസ് അധിനിവേശ നിർമ്മാണങ്ങളിലേക്കും നീളുന്ന വലിയൊരു ഭൗമരാഷ്ട്രീയ-പാരിസ്ഥിതിക സമസ്യയാണിത്.

ഹിമാലയൻ മേഖല ഇന്ന് നേരിടുന്ന ഏറ്റവും വലിയ അദൃശ്യ ഭീഷണിയാണ് GLOF (Glacial Lake Outburst Floods) അഥവാ ഹിമാനി തടാക സ്ഫോടന പ്രളയങ്ങൾ. ഗോളതാപനം ഹിമാലയൻ മഞ്ഞുപാളികളെ റെക്കോർഡ് വേഗത്തിൽ ഉരുക്കുകയാണ്. മലമുകളിൽ സ്വാഭാവികമായി രൂപപ്പെടുന്ന ഇത്തരം തടാകങ്ങളുടെ മണ്ണും പാറയും കൊണ്ടുള്ള അതിരുകൾ തകരുമ്പോൾ, ലക്ഷക്കണക്കിന് ഘനമീറ്റർ വെള്ളവും കൂറ്റൻ പാറക്കല്ലുകളുമാണ് താഴ്‌വരകളിലേക്ക് പതിക്കുന്നത്.