സിനിമയിലെ അഭിനേതാവ് എന്നതിനേക്കാൾ സ്വാഭാവിക നർമത്തിലൂടെ പ്രേക്ഷക മനസ്സിൽ ഇടംപിടിച്ച താരമാണ് രമേഷ് പിഷാരടി. അങ്ങനെയുള്ള പിഷാരടി ആദ്യമായി സിനിമാ സംവിധാനം ചെയ്യുമ്പോൾ വ്യത്യസ്തമായ പ്രമേയവും നിറഞ്ഞ നർമവും പ്രേക്ഷകർ പ്രതീക്ഷിക്കുന്നതിൽ തെറ്റുപറയാനാകില്ലല്ലോ. ജയറാമിന്റെ പ്രത്യേക ലുക്കും മൃഗങ്ങളും പക്ഷികളും പ്രമേയവും തന്നെയാണ് പഞ്ചവർണതത്ത എന്ന, പിഷാരടിയുടെ കന്നി സംവിധാനസംരംഭത്തെ വേറിട്ടു നിർത്തുന്നത്.
ഹരി പി. നായരും രമേഷ് പിഷാരടിയും ചേർന്നെഴുതിയ തിരക്കഥയിൽ മൃഗസ്നേഹിയായ ജയറാമിന്റെ ലുക്കും സംസാരവും തന്നെയാണ് ഹൈലൈറ്റ്. സ്ഥലം എംഎൽഎ ആയി കുഞ്ചാക്കോ ബോബനും നായികയായി അനുശ്രീയും എത്തുന്നു. ധർമജൻ ബോൾഗാട്ടിയും സലിംകുമാറും പ്രേം കുമാറും അശോകനും ഒപ്പം പിഷാരടിയുടെ സംവിധാനവും. ഈ കൂട്ടിൽ നർമം ഉണ്ടാകുമെന്ന കാര്യം പറയേണ്ടതില്ലല്ലോ? സ്വാഭാവിക നർമം കൊണ്ട് പ്രേക്ഷകരെ ചിരിപ്പിക്കുന്ന സിനിമയിൽ ബിവറേജ്, വർഗീയത, സമൂഹമാധ്യമം എന്നിങ്ങനെ നിരവധി വിഷയങ്ങൾ ചർച്ച ചെയ്യുന്നുണ്ട്.