ക്രിക്കറ്റിലെ മാന്യതയുടെ മുഖമായ, ന്യൂസീലൻഡ് ക്യാപ്റ്റൻ കെയ്ൻ വില്യംസന് ശ്രീലങ്കൻ ആരാധകരുടെ സ്നേഹം പൊതിഞ്ഞ പിറന്നാൾ സമ്മാനം. ശ്രീലങ്ക ക്രിക്കറ്റ് പ്രസിഡന്റ്സ് ഇലവനുമായുള്ള ന്യൂസീലൻഡിന്റെ സന്നാഹ മത്സരത്തിനിടെയാണ് ക്യാപ്റ്റന്റെ 29–ാം പിറന്നാൾ ലങ്കൻ ആരാധകർ ആഘോഷമാക്കിയത്.
ആരാധകരുടെ ആവശ്യം സ്നേഹപൂർവം സ്വീകരിച്ച വില്യംസൻ, മത്സരത്തിന്റെ ഇടവേളയിൽ ബൗണ്ടറി ലൈനിലെത്തി പിറന്നാൾ കേക്ക് മുറിച്ചു. ലോക ടെസ്റ്റ് ചാംപ്യൻഷിപ്പിന്റെ ഭാഗമായുള്ള ടെസ്റ്റ് പരമ്പരയ്ക്കുള്ള ശ്രീലങ്കൻ പര്യടനത്തിലാണു ന്യൂസീലൻഡ്. 2 മത്സര പരമ്പരയിലെ ആദ്യ ടെസ്റ്റ് 14നു തുടങ്ങും.