ജോലിക്കായി ബെംഗളൂരുവിലേക്കു പുറപ്പെട്ട യുവാവിന്റെ മൃതദേഹം വേമ്പനാട് കായലിൽ കണ്ടെത്തി. പാലാരിവട്ടത്ത് വാടകവീട്ടിൽ താമസിക്കുന്ന കീരമത്ത് പ്രസന്നകുമാറിന്റെ മകൻ യദുകൃഷ്ണന്റെ (27) അഴുകിയ മൃതദേഹമാണു വല്ലാർപാടം ഡിപി വേൾഡിനു സമീപം അടിഞ്ഞത്. കഴിഞ്ഞ 2–നു രാത്രിയിലാണ് എംബിഎ ബിരുദധാരിയായ യദുകൃഷ്ണൻ ബെംഗളൂരുവിലേക്കെന്നു പറഞ്ഞു വീട്ടിൽ നിന്നു യാത്ര തിരിച്ചത്.
സഹോദരൻ അരവിന്ദ് എറണാകുളം കെഎസ്ആർടിസി ബസ് സ്റ്റാൻഡ് വരെ അനുഗമിച്ചിരുന്നു. പിന്നീടു യദുകൃഷ്ണനെ ഫോണിൽ ബന്ധപ്പെടാൻ ശ്രമിച്ചിട്ടും ഫലമില്ലാതായതോടെ സെൻട്രൽ പൊലീസ് സ്റ്റേഷനിൽ പരാതി നൽകി.