‘ഇൗ യുദ്ധം മ്മള് ജയിക്കും..’ കാത്തിരിപ്പിന് ആഴം കൂട്ടി മോഹൻലാലിന്റെ മരക്കാര് അറബിക്കടലിന്റെ സിംഹം ട്രെയിലർ എത്തി. മലയാള സിനിമ ഇന്നോളം കാണാത്ത വിസ്മയങ്ങൾ നിറച്ചാണ് പ്രിയദർശൻ ട്രെയിലർ ഒരുക്കിയിരിക്കുന്നത്.
മലയാളത്തിനു പുറമെ തമിഴ്, ഹിന്ദി, കന്നഡ, തെലുങ്ക് ഭാഷകളിലും ട്രെയിലർ റിലീസ് ചെയ്തിട്ടുണ്ട്. മലയാളത്തിൽ മോഹൻലാൽ ട്രെയിലർ പുറത്തു വിട്ടപ്പോൾ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളിൽ അക്ഷയ് കുമാർ, സൂര്യ, ചിരഞ്ജീവി, രാം ചരൺ, യഷ് എന്നിവര് ട്രെയിലർ ഔദ്യോഗികമായി റിലീസ് ചെയ്തു.മോഹന്ലാല്-പ്രിയദര്ശന് കൂട്ടുകെട്ടിന്റെ മരക്കാര് അറബിക്കടലിന്റെ സിംഹം മാര്ച്ച് 26- നാണ് തിയറ്ററുകളിലെത്തുക.
മലയാളത്തിലെ ഏറ്റവും വലിയ സിനിമയെന്ന വിശേഷണത്തോടെയാണ് മരക്കാര് എത്തുന്നത്. മോഹന്ലാലിന് പുറമെ, പ്രണവ് മോഹന്ലാല്, പ്രഭു, അര്ജുന്, ഫാസില്, സുനില് ഷെട്ടി, മഞ്ജു വാര്യര്, കീര്ത്തി സുരേഷ്, കല്യാണി പ്രിയദര്ശന്, നെടുമുടി വേണു, മുകേഷ്, സിദ്ദിഖ്, രഞ്ജി പണിക്കര്, ഹരീഷ് പേരടി തുടങ്ങിയ വമ്പന് താരനിരയാണ് ചിത്രത്തിലുള്ളത്.
അഞ്ച് ഭാഷയിലായി പുറത്തിറങ്ങുന്ന ചിത്രം അമ്പതിലേറെ രാജ്യത്തെ 5000 സ്ക്രീനുകളിലാണ് പ്രദര്ശനത്തിനെത്തുന്നത്. കേരളത്തിലെ 90 ശതമാനം തിയേറ്ററുകളിലും മരയ്ക്കാര് പ്രദര്ശനത്തിന് എത്തുമെന്നാണ് റിപ്പോര്ട്ടുകള്. ഇതിനോടകം തന്നെ അഞ്ഞൂറോളം സ്ക്രീനുകള് കേരളത്തില് ചാര്ട്ട് ചെയ്ത് കഴിഞ്ഞെന്നാണ് വിവരം. അഞ്ചു ഭാഷകളില് ആയി അമ്പതില് അധികം രാജ്യങ്ങളില് റിലീസ് ചെയ്യുന്ന ആദ്യ മലയാള ചിത്രവും കൂടിയാവും മരക്കാര്.
മാര്വെല് സിനിമകള്ക്ക് വി.എഫ്.എക്സ് ഒരുക്കിയ അനിബ്രയിനാണ് മരയ്ക്കാറിന് വി.എഫ്.എക്സ് ഒരുക്കുന്നത്. ലോക സിനിമയിലെ തന്നെ പല വമ്പന് സിനിമകള്ക്കും വി എഫ് എക്സ് ഒരുക്കിയിട്ടുള്ളവരാണ് അനിബ്രയിന്. കിങ്സ്മെന്, ഗാര്ഡിയന് ഓഫ് ഗ്യാലക്സി, ഡോക്ടര് സ്ട്രെയിഞ്ച്, നൗ യൂ സീ മീ 2 എന്നിവ ഇവയില് ചിലത് മാത്രം. ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് നിർമാണം. ഡോക്ടര് റോയ്, സന്തോഷ് ടി. കുരുവിള എന്നിവര് സഹനിർമാതാക്കളാണ്.