വിഴിഞ്ഞം സമരത്തിന് കേരള കത്തോലിക്കാ മെത്രാന് സമിതിയുടെ പിന്തുണ. തുറമുഖ കവാടത്തിലേയ്ക്ക് നടക്കുന്ന ബഹുജന മാര്ച്ചില് പങ്കെടുക്കണമെന്ന് കെസിബിസിയില് അംഗങ്ങളായ രൂപതകള്ക്ക് പ്രസിഡന്റ് കര്ദിനാള് മാര് ജോര്ജ് ആലഞ്ചേരി നിര്ദേശം നൽകി. സെപ്റ്റംബര് 14ന് മൂലമ്പളളിയില് നിന്നാണ് മാര്ച്ച് ആരംഭിക്കുന്നത്.18നു വിഴിഞ്ഞത്തെത്തും.
വിഴിഞ്ഞം തുറമുഖ കവാടത്തിലെ സമരം ഇന്ന് ഇരുപത്താറാം ദിവസമാണ്. വൈദികരടക്കം ആറുപേരാണ് ഉപവാസമിരിക്കുന്നത്. തീരവും തീരവാസികളെയും സംരക്ഷിക്കണമെന്നാവശ്യപ്പെട്ട് കൊച്ചിയിൽ ഇന്ന് മനുഷ്യചങ്ങല സംഘടിപ്പിക്കും. കൊച്ചി - ആലപ്പുഴ രൂപതകളുടെ സംയുക്ത ആഭിമുഖ്യത്തിൽ വൈകിട്ട് 4ന് ചെല്ലാനം മുതൽ ബീച്ച് റോഡ് തിരുമുഖ തീർത്ഥാടന കേന്ദ്രം വരെ 17 കി.മി. നീളത്തിൽ മനുഷ്യചങ്ങല തീർക്കും.