കാസര്‍കോട് ഫാക്ടറിയില്‍ പൊട്ടിത്തെറി; ഒരു മരണം; 9 പേര്‍ക്ക് പരുക്ക്

കാസര്‍കോട് അനന്തപുരിയില്‍ ഫാക്ടറിയിലുണ്ടായ വന്‍ പൊട്ടിത്തെറിയില്‍  ഒരു മരണം. 9 പേര്‍ക്ക് ഗുരുതര പരുക്ക്. മരിച്ചത് അസം സ്വദേശി നജീറുൾ അലി(20)യാണ്. സമീപത്തെ വീടുകള്‍ക്കും കേടുപാട് സംഭവിച്ചു.  പരുക്കേറ്റവരെ മംഗളൂരുവിലെ ആശുപത്രിയിൽ പ്രവേശിപ്പിച്ചു. 

പരുക്കേറ്റ തൊഴിലാളികളുടെ നില ഗുരുതരമാണെന്നാണ് വിവരം. ഇതര സംസ്ഥാന തൊഴിലാളികളാണ് അപകടത്തിൽപ്പെട്ടത്. പ്ലൈവുഡ് ഫാക്ടറിയിലെ ബോയിലർ ആണ് പൊട്ടിത്തെറിച്ചതെന്നാണ് പ്രാഥമിക വിവരം.

സ്ഫോടനത്തിന്റെ ആഘാതത്തിൽ സമീപത്തെ വീടുകള്‍ക്ക് നാശനഷ്ടമുണ്ടായി. അഗ്നിരക്ഷാ സേനയെത്തി തീ നിയന്ത്രണ വിധേയമാക്കിയെങ്കിലും ശക്തമായ പുക ഉയരുന്നുണ്ട്. സ്ഫോടനത്തെത്തുടർന്ന് സ്ഥലത്ത് നിരവധി ആളുകൾ തടിച്ചുകൂടി.