എസിയും ഫാനുമിട്ടിട്ടും ചൂട് കുറയുന്നില്ലേ?; കറന്‍റ് ബില്ലിനെ പേടിക്കാതെ തന്നെ വീട് തണുപ്പിക്കാന്‍ വഴികള്‍

കേരളത്തിലെ കനത്ത ചൂടിൽ എസിയും ഫാനും ഇല്ലാതെ ജീവിക്കുക എന്നത് ചിന്തിക്കാൻ പോലും പ്രയാസമാണ്. എന്നാൽ രാപ്പകല്‍ വ്യത്യാസമില്ലാതെ ഇവ പ്രവർത്തിപ്പിക്കുമ്പോള്‍  വരുന്ന കറന്‍റ് ബില്‍ അതിലും ഭയാനകമാണ്. ചില ലളിതമായ മാറ്റങ്ങളിലൂടെ വീടിനുള്ളിലെ താപനില സ്വാഭാവികമായി കുറയ്ക്കാൻ സാധിക്കും.

1. ജനാലകളും കർട്ടനുകളും: 

ചൂട് കൂടി തുടങ്ങുമ്പോഴേക്കും ജനലാകള്‍ തുറന്നിടുന്നവരാണ് നമ്മളില്‍ പലരും. എന്നാല്‍ പകല്‍ സമയത്ത് അതായത് രാവിലെ 10 മുതൽ വൈകുന്നേരം 5 വരെ ജനാലകൾ അടച്ചിടുന്നതാണ് നല്ലത്. വേനൽക്കാലത്ത് വീടിനുള്ളിലെ അന്തരീക്ഷത്തേക്കാൾ താപനില കൂടുതലായിരിക്കും പുറത്തെ വായുവിന്. നിങ്ങൾ ജനാലകൾ തുറന്നിടുമ്പോൾ, പുറത്തെ ഈ ചൂടുവായു സ്വതന്ത്രമായി വീടിനുള്ളിലേക്ക് പ്രവേശിക്കുന്നു. ഇത് വീടിനുള്ളിലെ ഫർണിച്ചറുകളെയും ചുവരുകളെയും ചൂടാക്കുകയും മുറിക്കുള്ളിലെ താപനില വർദ്ധിപ്പിക്കുകയും ചെയ്യുന്നു.  

പുറത്തെ ചൂട് അകത്തെത്തിയാൽ പിന്നീട് അത് ചുവരുകളിലും മേൽക്കൂരയിലും തങ്ങിനിൽക്കും. സിമന്‍റ് ഭിത്തികൾ ചൂട് ആഗിരണം ചെയ്യാൻ കഴിവുള്ളവയാണ്. പകൽ മുഴുവൻ ഈ ചൂട് അകത്തേക്ക് കയറിയാൽ, രാത്രിയായാലും വീടിനുള്ളിൽ അസഹനീയമായ ചൂട് അനുഭവപ്പെടാൻ ഇത് കാരണമാകും. വൈകുന്നേരം 6 മണിക്ക് ശേഷം ജനാലകള്‍ തുറന്നിടാവുന്നതാണ്. ഇത് പകൽ സമയത്ത് ഭിത്തികളിൽ കെട്ടിനിൽക്കുന്ന ചൂടുവായു പുറത്തുപോകാൻ സഹായിക്കും.

കർട്ടനുകൾ: ജനാലകൾ അടച്ച് കട്ടിയുള്ള കർട്ടനുകൾ കൂടി ഇടുമ്പോൾ അത് ഒരു കവചം പോലെ പ്രവർത്തിക്കുന്നു. സൂര്യപ്രകാശം നേരിട്ട് അകത്തേക്ക് വീഴുന്നത് തടയുന്നതിലൂടെ വീടിനുള്ളിലെ തണുത്ത വായുവിനെ സംരക്ഷിക്കാൻ സാധിക്കും. വെളുത്ത നിറമുള്ള കർട്ടനുകൾ സൂര്യപ്രകാശത്തെ പ്രതിഫലിപ്പിക്കാന്‍  മികച്ചതാണ്.

നനഞ്ഞ തുണി: 

ഉച്ചസമയത്ത് ജനാലകളിൽ നനഞ്ഞ കർട്ടനുകളോ ബെഡ്ഷീറ്റോ തൂക്കിയിടുന്നത് പുറത്തുനിന്ന് വരുന്ന വായുവിനെ തണുപ്പിക്കാൻ സഹായിക്കും.

2. 'ക്രോസ് വെന്റിലേഷൻ' ശീലമാക്കാം

സൂര്യൻ അസ്തമിച്ചു കഴിഞ്ഞാൽ വീടിന്‍റെ എതിർവശങ്ങളിലുള്ള ജനാലകൾ തുറന്നിടുക. ഇത് ചൂടുവായു പുറത്തുപോകാനും തണുത്ത വായു അകത്ത് തങ്ങാനും സഹായിക്കും. ചൂട് വായു എപ്പോഴും മുകളിലേക്ക് ഉയരുന്നതിനാൽ മുകളിലെ നിലയിലുള്ള ജനാലകൾ തുറന്നിടുന്നത് കൂടുതൽ ഗുണകരമാണ്.

3. ടെറസ് തണുപ്പിക്കാൻ ചില വിദ്യകൾ

വീടിന്‍റെ ഏറ്റവും കൂടുതൽ ചൂടാകുന്നത് ടെറസാണ്. അവിടെയും ചില പൊടികൈകള്‍ പ്രയോഗിക്കാവുന്നതാണ്. 

വൈക്കോൽ വിരിക്കുക:  വൈക്കോൽ വിരിച്ച് നനയ്ക്കുന്നത് കേരളത്തിലെ വീടുകളിൽ പണ്ടുമുതലേ ചെയ്തുവരുന്ന വളരെ ഫലപ്രദമായ ഒരു നാടൻ വിദ്യയാണെന്ന് പറയാം.  വൈക്കോൽ ഒരു നല്ല ഇൻസുലേറ്ററാണ്. അതായത്, ഇത് ചൂടിനെ കടത്തിവിടില്ല. വൈക്കോലിനുള്ളിൽ ധാരാളം വായു അറകളുണ്ട് (Air pockets). ഈ വായു അറകൾ സൂര്യപ്രകാശത്തിൽ നിന്നുള്ള ചൂട് നേരിട്ട് കോൺക്രീറ്റ് സ്ലാബിലേക്ക് എത്തുന്നതിനെ തടയുന്ന ഒരു കവചമായി പ്രവർത്തിക്കുന്നു. 

നനഞ്ഞ വൈക്കോലിൽ നിന്ന് വെള്ളം നീരാവിയായി മാറുമ്പോൾ, അതിന് ആവശ്യമായ താപം അത് ആഗിരണം ചെയ്യുന്നത് തൊട്ടുതാഴെയുള്ള കോൺക്രീറ്റ് സ്ലാബിൽ നിന്നാണ്. സ്ലാബിലെ ചൂട് വെള്ളം വലിച്ചെടുക്കുന്നതോടെ കോൺക്രീറ്റിന്റെ താപനില പെട്ടെന്ന് താഴുന്നു.  വൈക്കോൽ വെറുതെ വിരിച്ചിട്ടാൽ മാത്രം പോരാ, ഇടയ്ക്കിടെ വെള്ളം തളിച്ച് നനവ് നിലനിർത്തണം. വൈക്കോൽ ഉണങ്ങിയിരുന്നാൽ അത് ഇൻസുലേഷൻ നൽകുമെങ്കിലും 'കൂളിംഗ് ഇഫക്ട്' കുറവായിരിക്കും.

കോൺക്രീറ്റിനും വൈക്കോലിനും ഇടയിൽ ഒരു പ്ലാസ്റ്റിക് ഷീറ്റ് വിരിക്കുന്നത് നല്ലതാണ്. ഇത് കോൺക്രീറ്റിലേക്ക് വെള്ളം ഇറങ്ങുന്നത് തടയാനും സ്ലാബിന് കേടുപാടുകൾ സംഭവിക്കാതിരിക്കാനും സഹായിക്കും. വൈക്കോൽ വിരിച്ച് നനയ്ക്കുന്നതിലൂടെ സ്ലാബിന്‍റെ താപനില ഗണ്യമായി കുറയ്ക്കാനും അതുവഴി മുറിക്കുള്ളിൽ 3 മുതൽ 5 ഡിഗ്രി സെൽഷ്യസ് വരെ ചൂട് കുറയ്ക്കാനും സാധിക്കും. കുറഞ്ഞ ചിലവിൽ ചെയ്യാവുന്ന ഏറ്റവും മികച്ച മാർഗ്ഗങ്ങളിൽ ഒന്നാണിത്.

കൂൾ റൂഫ് പെയിന്റിംഗ്: ടെറസിൽ വൈറ്റ് സിമന്റോ അല്ലെങ്കിൽ 'സോളാർ റിഫ്ലക്റ്റീവ്' പെയിന്റോ അടിക്കുന്നത് സൂര്യപ്രകാശത്തെ 90% വരെ പ്രതിഫലിപ്പിക്കും.

കൃഷി: ടെറസിൽ ഗ്രോബാഗുകൾ വെച്ച് കൃഷി ചെയ്യുന്നത് സ്ലാബിലേക്ക് നേരിട്ട് വെയിൽ അടിക്കുന്നത് തടയും. ചെടികൾക്ക് മുകളിലായി ഒരു ഗ്രീൻ നെറ്റ് കൂടി കെട്ടിയാല്‍ ഇരട്ടി ഫലം നൽകും. ഇത് ചെടികളെ കരിഞ്ഞുപോകാതെ സംരക്ഷിക്കുമെന്ന് മാത്രമല്ല, ടെറസിലേക്ക് എത്തുന്ന ചൂടിന്‍റെ അളവ് വീണ്ടും കുറയ്ക്കുകയും ചെയ്യും.

4. ഇൻഡോർ പ്ലാന്റുകളുടെ കരുത്ത്

മുറിക്കുള്ളിലെ ഈർപ്പം നിലനിർത്താനും അന്തരീക്ഷം തണുപ്പിക്കാനും ചെടികൾക്ക് കഴിയും. അലോവേര, സ്നേക്ക് പ്ലാന്റ്, മണിപ്ലാന്റ് എന്നിവ മുറിക്കുള്ളിലെ വായു ശുദ്ധീകരിക്കുകയും ചൂട് ആഗിരണം ചെയ്യുകയും ചെയ്യുന്നു.

5. ലൈറ്റുകളും ഇലക്ട്രോണിക്സ് ഉപകരണങ്ങളും

പഴയ ഇൻകാൻഡസെന്റ് ബൾബുകൾ വലിയ അളവിൽ ചൂട് പുറത്തുവിടുന്നവയാണ്.  ഇവ മാറ്റി എൽഇഡി (LED) ബൾബുകൾ ഉപയോഗിക്കുന്നത് മുറിയിലെ ചൂട് കുറയ്ക്കും. അതുപോലെ ഉപയോഗമില്ലാത്ത സമയത്ത് ടിവി, കമ്പ്യൂട്ടർ തുടങ്ങിയവ ഓഫ് ചെയ്യുക.

6. സ്വാഭാവിക എസി

ഫാനിന് മുന്നിൽ ഒരു വലിയ പാത്രത്തിൽ ഐസ് കഷ്ണങ്ങളോ തണുത്ത വെള്ളമോ വെക്കുന്നത് വായുവിനെ തണുപ്പിക്കാൻ സഹായിക്കും (Evaporative Cooling).  സാധാരണ ഫാനുകൾ മുറിയിലെ ചൂടുവായുവിനെ വട്ടം കറക്കുക മാത്രമാണ് ചെയ്യുന്നത്. എന്നാൽ ഫാനിന് മുന്നിൽ ഐസ് വെക്കുമ്പോൾ, ഫാൻ പുറന്തള്ളുന്നത് തണുത്ത വായുവായിരിക്കും. ഈ തണുത്ത വായു മുറിയിലെ ചൂടുവായുവിനെ ആദേശം (Replace) ചെയ്യുന്നതോടെ അന്തരീക്ഷ താപനിലയിൽ പ്രകടമായ കുറവുണ്ടാകുന്നു. കാറ്റ് നേരിട്ട് ഐസിന് മുകളിലൂടെ വരുമ്പോൾ മുറിയിൽ എസിക്ക് സമാനമായ തണുപ്പ് അനുഭവപ്പെടും.