തുണികൾ വീടിനുള്ളിൽ ഉണക്കാറുണ്ടോ?; പതുങ്ങിയിരിക്കുന്ന അപകടം; മുന്നറിയിപ്പ്

തുണികൾ വീടിനുള്ളിൽ ഉണക്കുന്ന ശീലം ആരോഗ്യത്തിന് ഭീഷണിയാകുമെന്നു ആരോഗ്യവിദഗ്ധരുടെ മുന്നറിയിപ്പ് . പ്രത്യേകിച്ച് മഴക്കാലത്തും നഗരങ്ങളിലെ ഫ്ലാറ്റ് ജീവിതത്തിലും സൂര്യപ്രകാശം ലഭിക്കാത്ത സാഹചര്യങ്ങളിലും വീടിനകത്ത് തുണി ഉണക്കുന്നത് സാധാരണമായിരിക്കുന്നു. എന്നാൽ ഈ ശീലം വീടിനുള്ളിലെ ഈർപ്പം വർധിപ്പിക്കുകയും, അദൃശ്യമായ രോഗാണുക്കൾ വളരാൻ അനുയോജ്യമായ അന്തരീക്ഷം സൃഷ്ടിക്കുകയും ചെയ്യുന്നു.

 

വീടിനകത്ത് ഉണക്കുന്ന തുണികളിൽ നിന്നു പുറത്തുവരുന്ന ഈർപ്പം മുറികളിലെ ചുമരുകളിലും മേൽക്കൂരയിലും കെട്ടിനിൽക്കുന്നതോടെ ഫംഗസ്, പൂപ്പൽ തുടങ്ങിയവ പടരാൻ സാധ്യത വർധിക്കുന്നു. ഇതു ശ്വാസകോശ സംബന്ധമായ അസുഖങ്ങൾ, അലർജി, ആസ്ത്മ, സ്ഥിരചുമ, മൂക്കടപ്പ് തുടങ്ങിയ ആരോഗ്യപ്രശ്നങ്ങൾക്ക് കാരണമാകാം. കുട്ടികളും വയോധികരും ദീർഘകാല രോഗമുള്ളവരും ഇതിന് കൂടുതൽ ഇരയാകുന്നുവെന്നാണ് വിദഗ്ധരുടെ വിലയിരുത്തൽ.

 

തുണികൾ പൂർണമായി ഉണങ്ങാതിരുന്നതുകൊണ്ട് ബാക്ടീരിയയും ഫംഗസും വസ്ത്രങ്ങളിൽ തന്നെ നിലനിൽക്കാം. ഇത്തരം വസ്ത്രങ്ങൾ ധരിക്കുന്നത് ചർമ്മരോഗങ്ങൾ, ചൊറിച്ചിൽ, പാടുകൾ, ഫംഗൽ ഇൻഫെക്ഷൻ തുടങ്ങിയ പ്രശ്നങ്ങൾക്ക് വഴിയൊരുക്കും. പ്രത്യേകിച്ച് അടിവസ്ത്രങ്ങളും ടവലുകളും വീടിനകത്ത് ഈർപ്പമുള്ള സാഹചര്യത്തിൽ ഉണക്കുന്നത് ആരോഗ്യത്തിന് ഇരട്ടി അപകടം സൃഷ്ടിക്കുന്നതായി ഡോക്ടർമാർ ചൂണ്ടിക്കാട്ടുന്നു.

 

ഈ പ്രശ്നങ്ങൾ ഒഴിവാക്കാൻ സാധ്യമായിടത്ത് തുറന്ന സ്ഥലങ്ങളിൽ, സൂര്യപ്രകാശവും കാറ്റും ലഭിക്കുന്ന ഇടങ്ങളിൽ തുണികൾ ഉണക്കണമെന്ന് ആരോഗ്യവിദഗ്ധർ നിർദേശിക്കുന്നു. വീടിനകത്ത് തന്നെ ഉണക്കേണ്ട സാഹചര്യമാണെങ്കിൽ നല്ല വായുസഞ്ചാരം ഉറപ്പാക്കുകയും, എക്സോസ്റ്റ് ഫാൻ അല്ലെങ്കിൽ ഡീഹ്യൂമിഡിഫയർ ഉപയോഗിക്കുകയും വേണം. ചെറിയ അശ്രദ്ധ പോലും ദീർഘകാല ആരോഗ്യപ്രശ്നങ്ങളിലേക്ക് നയിക്കാമെന്നതിനാൽ, തുണി ഉണക്കുന്ന ശീലങ്ങളിൽ ജാഗ്രത അനിവാര്യമാണെന്് ആരോഗ്യവിദഗ്ധര്‍ മുന്നറിയിപ്പ് നല്‍കുന്നു.