ഇവരൊന്നും അത്ര പാവങ്ങളല്ല!; ഇന്ത്യയിൽ ഒരിക്കലും കുറച്ചുകാണാൻ പാടില്ലാത്ത 10 പാമ്പുകൾ

ഇടുങ്ങിയ വനപ്രദേശങ്ങൾ മുതൽ കൃഷിയിടങ്ങൾ വരെയുള്ള ഇന്ത്യയുടെ വൈവിധ്യമാർന്ന ആവാസവ്യവസ്ഥകൾ പലയിനം പാമ്പുകളുടെ ആവാസകേന്ദ്രമാണ്. ഇവയിൽ പലതും അതീവ വിഷമുള്ളവയും മനുഷ്യർക്ക് അപകടകാരികളുമാണ്. ഓരോ വർഷവും പാമ്പുകടി വലിയൊരു പൊതുജനാരോഗ്യ പ്രശ്നമായി തുടരുകയുമാണ്. എന്നാല്‍ പല പാമ്പുകളും അക്രമകാരികളല്ലെന്ന് മാത്രമല്ല കീടങ്ങളെ നിയന്ത്രിക്കുന്നതിലൂടെ പാരിസ്ഥിതിക സംതുലിതാവസ്ഥ നിലനിർത്തുന്നതിൽ അവ സുപ്രധാന പങ്ക് വഹിക്കുകയും ചെയ്യുന്നു. ഏതൊക്കെ വർഗ്ഗങ്ങളാണ് കൂടുതൽ അപകടകാരികളെന്നും അവയുടെ വിഷം എങ്ങനെ പ്രവർത്തിക്കുന്നുവെന്നും അവ സാധാരണയായി എവിടെയാണ് കാണപ്പെടുന്നതെന്നും മനസ്സിലാക്കുന്നത് ഭയം കുറയ്ക്കാനും കൃത്യസമയത്ത് ചികിത്സ ലഭ്യമാക്കി ജീവൻ രക്ഷിക്കാനും സഹായിക്കും.

ഇന്ത്യയിലെ പ്രധാന വിഷപ്പാമ്പുകൾ:

 

1. ഇന്ത്യൻ കോബ്ര (മൂർഖൻ)

ഇന്ത്യയിലെ 'ബിഗ് ഫോർ' (ഏറ്റവും അപകടകാരികളായ നാല് പാമ്പുകൾ) ഇനങ്ങളിൽ ഒന്നായ മൂർഖൻ പാമ്പുകളെ അവയുടെ പത്തി കണ്ടാൽ എളുപ്പത്തിൽ തിരിച്ചറിയാം. ഇതിന്റെ വിഷം നാഡീവ്യൂഹത്തെയാണ് (Neurotoxic) ബാധിക്കുന്നത്. ഇത് പക്ഷാഘാതത്തിനും ശ്വാസതടസ്സത്തിനും കാരണമായേക്കാം.

2. കോമൺ ക്രെയ്റ്റ് (വെള്ളിക്കെട്ടൻ)

അതീവ വിഷമുള്ള ഈ പാമ്പ് പലപ്പോഴും ജനവാസ മേഖലകൾക്ക് സമീപമാണ് കാണപ്പെടുന്നത്. രാത്രികാലങ്ങളിൽ സംഭവിക്കുന്ന ഭൂരിഭാഗം പാമ്പുകടികൾക്കും പിന്നിൽ ഇവയാണ്. ഇവയുടെ കടി അത്ര വേദനയുള്ളതല്ലെങ്കിലും ഇതിലെ മാരകമായ ന്യൂറോടോക്സിനുകൾ കാരണം ഇത് അതീവ അപകടകാരിയാണ്.

3. റസ്സൽസ് വൈപ്പർ (അണലി)

പെട്ടെന്ന് ആക്രമിക്കാൻ സാധ്യതയുള്ള സ്വഭാവത്തിന് പേരുകേട്ടതാണ് അണലികൾ. ഇവയുടെ വിഷം രക്തചംക്രമണ വ്യവസ്ഥയെയാണ് (Haemotoxic) ബാധിക്കുന്നത്. ഇത് കോശങ്ങൾ നശിക്കുന്നതിനും, ആന്തരിക രക്തസ്രാവത്തിനും വൃക്ക തകരാറിലാകുന്നതിനും കാരണമാകും.

4. സൊ-സ്കെയിൽഡ് വൈപ്പർ (അണലി വർഗ്ഗം)

ചെറുതാണെങ്കിലും അതിമാരകമായ ഈ പാമ്പ്, ശത്രുക്കളെ ഭയപ്പെടുത്താൻ അതിന്റെ ശൽക്കങ്ങൾ (scales) തമ്മിൽ ഉരസി സവിശേഷമായ ഒരു ശബ്ദം പുറപ്പെടുവിക്കുന്നു. ഇതിന്റെ വിഷം രക്തം കട്ടപിടിക്കുന്ന പ്രക്രിയയെ തടസ്സപ്പെടുത്തുന്നു, ഇത് ശരീരത്തിനുള്ളിലെ രക്തസ്രാവത്തിനും മരണത്തിനും കാരണമായേക്കാം.

5. രാജവെമ്പാല (King Cobra)

ലോകത്തിലെ ഏറ്റവും നീളം കൂടിയ വിഷപ്പാമ്പാണ് രാജവെമ്പാല. ഒറ്റക്കടിയിൽ തന്നെ വലിയ അളവിൽ നാഡീവ്യൂഹത്തെ ബാധിക്കുന്ന  വിഷം കുത്തിവയ്ക്കാൻ ഇതിന് സാധിക്കും. ഭയപ്പെടുത്തുന്ന സ്വഭാവമുണ്ടെങ്കിലും, ശല്യപ്പെടുത്തിയാൽ അല്ലാതെ ഇവ മനുഷ്യരുമായുള്ള സമ്പർക്കം ഒഴിവാക്കാൻ ശ്രമിക്കാറുണ്ട്.

6. മഞ്ഞവരയൻ / ശംഖുവരയൻ (Banded Krait)

മഞ്ഞയും കറുപ്പും വരകളുള്ള ഈ പാമ്പ് അതീവ വിഷമുള്ളതാണ്. സാധാരണയായി രാത്രികാലങ്ങളിൽ സജീവമാകുന്ന ഇവ വളരെ ശാന്തസ്വഭാവക്കാരായാണ് കാണപ്പെടുന്നത്. ബാൻഡഡ് ക്രെയ്റ്റിനെ (മഞ്ഞവരയൻ മണ്ണലി) അപേക്ഷിച്ച് അക്രമസ്വഭാവം കുറവാണെങ്കിലും, ഇതിന്റെ വിഷം നാഡീവ്യവസ്ഥയെ ബാധിക്കുന്ന അതീവ വീര്യമുള്ളതാണ്. സാധാരണയായി ചതുപ്പുനിലങ്ങളിലും വനപ്രദേശങ്ങളിലുമാണ് ഇവയെ കാണാറ്.

7. ചുരുട്ടമണ്ഡലി (Hump-nosed Pit Viper)

തെക്കേ ഇന്ത്യയുടെ ചില ഭാഗങ്ങളിൽ സാധാരണയായി കാണപ്പെടുന്ന ഈ പാമ്പിന്റെ വിഷം കോശങ്ങൾക്കും ടിഷ്യുകൾക്കും ഗുരുതരമായ നാശമുണ്ടാക്കും. ഇതിന്റെ കടികൾ പലപ്പോഴും വേണ്ടത്ര റിപ്പോർട്ട് ചെയ്യപ്പെടാറില്ല എന്നതാണ് വാസ്തവം.

8. മലബാർ കുഴിമണ്ഡലി (Malabar Pit Viper)

പശ്ചിമഘട്ടത്തിൽ കാണപ്പെടുന്ന ഈ ഇനം പാമ്പുകളുടെ കടി കഠിനമായ വേദനയുണ്ടാക്കുന്നതാണ്. ഇതിന്റെ വിഷം രക്തകോശങ്ങളെ ബാധിക്കുന്നതാണെങ്കിലും (Haemotoxic), കൃത്യസമയത്ത് ചികിത്സ ലഭ്യമാക്കിയാൽ മരണസാധ്യത കുറവാണ്.

9. ഇന്ത്യൻ പവിഴപ്പാമ്പ് (Indian Coral Snake)

രഹസ്യസ്വഭാവമുള്ള ഈ വർഗ്ഗത്തിന് അതീവ പ്രഹരശേഷിയുള്ള ന്യൂറോടോക്സിക് വിഷമാണുള്ളത്. ഇവ മനുഷ്യരിൽ നിന്ന് ഒഴിഞ്ഞുമാറി ജീവിക്കുന്നതിനാൽ കടിയേൽക്കുന്ന സാഹചര്യം അപൂർവ്വമാണെങ്കിലും, കടിയേറ്റാൽ അത് ഗുരുതരമായേക്കാം.

10. ആൻഡമാൻ കോബ്ര (Andaman Cobra)

ആൻഡമാൻ ദ്വീപുകളിൽ മാത്രം കാണപ്പെടുന്ന ഈ പാമ്പിൻ വർഗ്ഗം അതീവ വിഷമുള്ളതാണ്. ഇവയെക്കുറിച്ച് കാര്യമായ പഠനങ്ങൾ നടന്നിട്ടില്ലാത്തതിനാൽ ഇവയുമായുള്ള സമ്പർക്കം കൂടുതൽ അപകടസാധ്യത വർദ്ധിപ്പിക്കുന്നു.