യുഎസിൽ ഇന്ത്യൻ മാമ്പഴങ്ങൾക്ക് ദൗര്‍ലഭ്യം; സാൻ ഫ്രാൻസിസ്കോയിൽ മാമ്പഴ വിരുന്ന് നടത്തി ഇന്ത്യക്കാരന്‍

അമേരിക്കൻ നഗരങ്ങളിൽ ഈ സീസണിൽ ഇന്ത്യൻ മാമ്പഴങ്ങൾ ലഭിക്കാൻ വലിയ പ്രയാസം നേരിടുന്ന സാഹചര്യത്തിൽ ഈ ക്ഷാമത്തെ മറികടക്കാന്‍ ഒരു വേറിട്ട വഴി കണ്ടെത്തിയിരിക്കുകയാണ് ഒരു ഇന്ത്യന്‍ വംശജന്‍. അതിനായി അദ്ദേഹം ചെയ്തത് സാൻ ഫ്രാൻസിസ്കോയില്‍ ഒരു മാമ്പഴ വിരുന്ന് സംഘടിപ്പിക്കുക എന്നതാണ്. ഇന്ത്യൻ മാമ്പഴങ്ങൾക്കായുള്ള വർദ്ധിച്ചുവരുന്ന ആവശ്യകതയെക്കുറിച്ച് വാൾസ്ട്രീറ്റ് ജേണൽ (The Wall Street Journal) പങ്കുവെച്ച കുറിപ്പിന് മറുപടിയായാണ് അദ്ദേഹം ഈ മാമ്പഴ വിരുന്നിനെക്കുറിച്ച് വെളിപ്പെടുത്തിയത്. വളരെ കുറഞ്ഞ കാലം മാത്രം നീണ്ടുനിൽക്കുന്ന മാമ്പഴ സീസണിൽ ആളുകളെ ഒന്നിപ്പിക്കാനും മാമ്പഴം ലഭിക്കാനുള്ള പ്രയാസത്തെ ഒരു കൂട്ടായ അനുഭവമാക്കി മാറ്റാനുമാണ് താൻ ഉദ്ദേശിക്കുന്നതെന്നായിരുന്നു ഇദ്ദേഹത്തിന്‍റെ വിശദീകരണം.

തന്‍റെ പോസ്റ്റിൽ വിരുന്നിനെക്കുറിച്ചുള്ള ചിത്രങ്ങളും അദ്ദേഹം പങ്കുവെച്ചിട്ടുണ്ട്. ‘കഴിഞ്ഞ വർഷം മാമ്പഴ ക്ഷാമം പരിഹരിക്കാൻ ഞങ്ങൾ ചില മികച്ച ബുദ്ധിമാന്മാരെ നിയോഗിച്ചിരുന്നു, ഇപ്പോൾ ഞങ്ങൾ തിരിച്ചെത്തിയിരിക്കുന്നു. നാലാമത് വാർഷിക സാൻ ഫ്രാൻസിസ്കോ മാംഗോ പാർട്ടി ഈ മാസം അവസാനം നടക്കും. നിങ്ങൾക്ക് വരാൻ താൽപ്പര്യമുണ്ടെങ്കിൽ ഇഷ്ടപ്പെട്ട മാമ്പഴം ഏതാണെന്ന് കമന്റ് ചെയ്യുകയോ മെസ്സേജ് അയക്കുകയോ ചെയ്യുക’ എന്നായിരുന്നു കുറിപ്പ്.

എന്തുകൊണ്ട് അമേരിക്കയിൽ ഇന്ത്യൻ മാമ്പഴങ്ങൾക്ക് ക്ഷാമം?

അമേരിക്കയിൽ ഇന്ത്യൻ മാമ്പഴങ്ങൾ അത്ര എളുപ്പത്തിൽ ലഭ്യമാകാത്ത സാഹചര്യത്തിലാണ് ഈ വാർത്ത വരുന്നത്. വാൾസ്ട്രീറ്റ് ജേണലിന്റെ റിപ്പോർട്ട് പ്രകാരം കടുത്ത നിയന്ത്രണങ്ങളും ചരക്ക് നീക്കത്തിലെ വെല്ലുവിളികളും കാരണം അൽഫോൺസോ, കേസരി, ചൗസ, ബംഗനപ്പള്ളി തുടങ്ങിയ ഇനങ്ങളുടെ ഇറക്കുമതി വളരെ പരിമിതമായ അളവില്‍ മാത്രമേ നടക്കുന്നുള്ളൂ. ആവശ്യക്കാർ ഏറെയും ലഭ്യത കുറവുമായതിനാൽ കപ്പൽ മാർഗ്ഗമോ വിമാന മാർഗ്ഗമോ എത്തുന്ന ചരക്കുകൾ ആവശ്യക്കാര്‍ മുൻകൂട്ടി നിരീക്ഷിക്കുന്നു. പലപ്പോഴും മാമ്പഴ പെട്ടികൾ എത്തുന്ന ഉടൻ തന്നെ വിറ്റുതീരാറാണ് പതിവ്. 

ഗതാഗത ചെലവും കുറഞ്ഞ വിതരണവും കാരണം, ഇന്ത്യൻ മാമ്പഴങ്ങൾക്ക് അമേരിക്കയിൽ വലിയ വിലയാണ് ഈടാക്കുന്നത്. ഒരു ബോക്സ് മാമ്പഴത്തിന് 50 മുതൽ 60 ഡോളർ വരെ (ഏകദേശം 4,150 - 5,000 രൂപ) വില വരാം. മിനിറ്റുകൾക്കുള്ളിൽ തന്നെ സ്റ്റോക്കുകൾ തീർന്നുപോകുന്നതിനാൽ വിൽപ്പനക്കാരുമായി നിരന്തരം ബന്ധപ്പെട്ടാണ് പലരും മാമ്പഴം സ്വന്തമാക്കുന്നത്. കുറഞ്ഞ സീസൺ കാലയളവും കർശനമായ ഇറക്കുമതി നിയമങ്ങളും ഈ ക്ഷാമം വർദ്ധിപ്പിക്കുന്നു.