ബേബി ക്രീമും ഷാംപൂവും ഉപയോഗിക്കാറുണ്ടോ?; മുതിര്‍ന്നവരേ, ദയവായി അത് നിർത്തൂ!

മൃദുവായ ‘ബേബി സ്കിന്‍’ കൊതിച്ച് എപ്പോഴെങ്കിലും ബേബി ക്രീം എടുത്തൊന്ന് ഉപയോഗിച്ചുനോക്കാത്തവര്‍ കുറവായിരിക്കും. ഇതിൽ ആരെയും കുറ്റം പറയാനും പറ്റില്ല. അത്രത്തോളം നമ്മെ ആകർഷിക്കുന്ന രീതിയിലാണ് ബേബി ഉൽപ്പന്നങ്ങൾ നിർമ്മിച്ചിരിക്കുന്നത്. ഒറ്റനോട്ടത്തിൽ നോക്കിയാൽ ചർമ സംരക്ഷണത്തിന് ആവശ്യമായ എല്ലാ ഗുണങ്ങളും അവയിലുണ്ടെന്ന് തോന്നും. കുഞ്ഞുങ്ങളുടെ മൃദുവായ ചർമ്മത്തിന് വേണ്ടി തയ്യാറാക്കിയവ ആയതുകൊണ്ട് തന്നെ മുതിർന്നവരുടെ സങ്കീർണ്ണമായ ഉൽപ്പന്നങ്ങളെ അപേക്ഷിച്ച് ഇവ കൂടുതൽ സുരക്ഷിതവും വീര്യം കുറഞ്ഞതുമാണെന്ന് വിശ്വസിക്കാന്‍ ഇതെല്ലാം കാരണങ്ങളാണ്. 

അലർജി, ചർമ്മത്തിലെ ചുവപ്പ്, എക്സിമ തുടങ്ങിയ പ്രശ്നങ്ങളുള്ളവർക്ക് ബേബി പ്രൊഡക്ടുകൾ ഒരു സുരക്ഷിത മാർഗ്ഗമായി തോന്നും. കാരണം, അവയിൽ പൊതുവേ സുഗന്ധദ്രവ്യങ്ങൾ കുറവായിരിക്കും, ചർമത്തിന് അസ്വസ്ഥത ഉണ്ടാക്കാത്ത രീതിയിലാണ് അവ നിർമ്മിച്ചിരിക്കുന്നത്. കൂടാതെ, ചർമ്മത്തിന്റെ നനവ് (hydration) നിലനിർത്താനും സ്വാഭാവിക സുരക്ഷാ പാളികളെ ബലപ്പെടുത്താനുമാണ് ഇവ ശ്രദ്ധ കേന്ദ്രീകരിക്കുന്നത്. വൃത്തിയാക്കുക, മോയിസ്ചറൈസർ പുരട്ടുക എന്ന ലളിതമായ രീതിയാണ് ബേബി പ്രൊഡക്ടുകൾ മുന്നോട്ട് വെക്കുന്നത്. ഇവിടെയാണ് പ്രശ്നം. മുതിർന്നവരുടെ ചർമം കുഞ്ഞുങ്ങളുടേത് പോലെയല്ല. അതുകൊണ്ട് തന്നെ കാര്യങ്ങൾ അല്പം സങ്കീർണ്ണമാണ്.

കുഞ്ഞുങ്ങളുടെ ചർമ്മം മുതിർന്നവരുടേതിനേക്കാൾ വളരെ നേർത്തതും മൃദുവായതും വേഗത്തിൽ പ്രതികരിക്കുന്നതുമാണ്. അവയുടെ സംരക്ഷണ പാളികൾ ദുർബലമായതിനാൽ ഈർപ്പം വേഗത്തിൽ നഷ്ടപ്പെടുകയും പെട്ടെന്ന് അസ്വസ്ഥതകൾ ഉണ്ടാവുകയും ചെയ്യുന്നു. എന്നാല്‍ മുതിർന്നവരുടെ ചർമം കട്ടിയുള്ളതും കൂടുതൽ പ്രതിരോധശേഷിയുള്ളതുമാണ്. എങ്കിലും, അന്തരീക്ഷ മലിനീകരണം, ജീവിതശൈലി എന്നിവ കാരണം മുതിർന്നവർക്ക് ചർമത്തിൽ വരൾച്ച, മുഖക്കുരു, കറുത്ത പാടുകൾ, പ്രായമാകുന്നതിന്റെ ലക്ഷണങ്ങൾ എന്നിവ ഉണ്ടാകാം. കുഞ്ഞുങ്ങളുടെ ചർമത്തിൽ നിന്ന് വ്യത്യസ്തമായി, മുതിർന്നവരുടേത് കൂടുതൽ എണ്ണമയമുള്ളതും വികസിച്ച സുഷിരങ്ങളുള്ളതുമാണ്. അതിനാൽ ഓരോ പ്രശ്നത്തിനും അനുയോജ്യമായ ഉൽപ്പന്നങ്ങളാണ് മുതിർന്നവർക്ക് ആവശ്യം. എന്നാൽ കുഞ്ഞുങ്ങളുടെ ചർമത്തിന് അതിന്റെ സ്വാഭാവിക മൃദുത്വവും ആരോഗ്യവും നിലനിർത്താൻ വളരെ മൃദുവായതും സംരക്ഷണം നൽകുന്നതുമായ ഉൽപ്പന്നങ്ങൾ മാത്രമേ ആവശ്യമുള്ളൂ.

 ബേബി പ്രൊഡക്ട് മുതിര്‍ന്നവര്‍ ഉപയോഗിക്കണോ?

സെൻസിറ്റീവ് ചർമമുള്ള മുതിർന്നവർക്ക് ചില ബേബി കെയർ ഉൽപ്പന്നങ്ങൾ ഉപയോഗിക്കാം. എങ്കിലും, പ്രായമാകുന്നതിന്റെ ലക്ഷണങ്ങൾ തടയുക (anti-ageing), മുഖക്കുരു നിയന്ത്രിക്കുക, സൂര്യപ്രകാശത്തിൽ നിന്നുള്ള സംരക്ഷണം തുടങ്ങിയ മുതിർന്നവരുടെ ചർമത്തിനാവശ്യമായ കാര്യങ്ങൾ പൂർണ്ണമായി നിറവേറ്റാൻ ഇവയ്ക്ക് കഴിഞ്ഞെന്നു വരില്ല. വീര്യം കുറഞ്ഞ ക്ലെൻസറുകൾ, മോയിസ്ചറൈസറുകൾ, ബേബി ഓയിലുകൾ എന്നിവ സുരക്ഷിതവും ചർമത്തിന് ആശ്വാസം നൽകുന്നതുമാണെങ്കിലും, മുതിർന്നവർക്കായി പ്രത്യേകം തയ്യാറാക്കിയ ചർമസംരക്ഷണ രീതികൾക്ക് ഇവ പൂർണ്ണമായ പകരമാകരുത്. ഇതിലെ ചേരുവകൾ പരിശോധിച്ച് നിങ്ങളുടെ ചർമത്തിന്റെ രീതിക്കനുസരിച്ച് ഉൽപ്പന്നങ്ങൾ തിരഞ്ഞെടുക്കേണ്ടത് പ്രധാനമാണ്. ബേബി പ്രൊഡക്ടുകളെ മാത്രം ആശ്രയിക്കുന്നത് മുതിർന്നവരുടെ ചർമത്തിന് ആവശ്യമുള്ള കൃത്യമായ ഫലങ്ങൾ നൽകിയേക്കില്ല.

ഡയപ്പർ റാഷ് ക്രീം മോയിസ്ചറൈസറായും, ബേബി പൗഡർ ഡ്രൈ ഷാംപൂവായും, ബേബി ഷാംപൂ ഫേസ് വാഷ് ആയും ഉപയോഗിക്കുന്നവരുമുണ്ട്. കൂടാതെ കുട്ടികളുടെ സൺസ്ക്രീൻ മുഖത്തും ബേബി ഓയിൽ ബോഡി മോയിസ്ചറൈസറായും ഉപയോഗിക്കാറുണ്ട്. ഇത്തരം മാറ്റങ്ങൾ ചില സാഹചര്യങ്ങളിൽ ഗുണകരമായേക്കാമെങ്കിലും സ്ഥിരമായ ഉപയോഗത്തിന് ഇവ അനുയോജ്യമല്ലെന്ന് വിദഗ്ധർ പറയുന്നു. മിക്ക ബേബി പ്രൊഡക്റ്റുകളും ചർമത്തെ സംരക്ഷിക്കാനും ശാന്തമാക്കാനും ഉദ്ദേശിച്ചുള്ളതാണ്, അല്ലാതെ മുതിർന്നവരുടെ ചർമത്തിന്റെയോ മുടിയുടെയോ പ്രത്യേക ആവശ്യങ്ങൾക്കായുള്ളതല്ല.

കുട്ടികളുടെ സൺസ്ക്രീൻ മുഖത്ത് പുരട്ടുമ്പോൾ അത് ഒട്ടിപ്പിടിക്കാനോ മുഖത്ത് ഒരു വെള്ള പാട ഉണ്ടാക്കാനോ സാധ്യതയുണ്ട്. ബേബി ഓയിൽ ചർമത്തിന് ഈർപ്പം നൽകുന്നതിന് പകരം നിലവിലുള്ള നനവ് നിലനിർത്താനാണ് സഹായിക്കുന്നത്. ഇത് എണ്ണമയമുള്ള ചർമക്കാർക്ക് അനുയോജ്യമായേക്കില്ല. ചുരുക്കത്തിൽ, അത്യാവശ്യ ഘട്ടങ്ങളിൽ ഇവ ഉപയോഗിക്കാമെങ്കിലും മുതിർന്നവരുടെ ചർമ്മ പ്രശ്നങ്ങൾ പരിഹരിക്കാൻ ഇവ ദീർഘകാലാടിസ്ഥാനത്തിൽ നല്ലതല്ല.

ബേബി പ്രൊഡക്ടുകൾ സ്ഥിരമായി ഉപയോഗിക്കുന്നത് പാർശ്വഫലങ്ങൾക്ക് കാരണമാകുമെന്നും ആരോഗ്യവിദഗ്ധര്‍ മുന്നറിയിപ്പ് നല്‍കുന്നു. കട്ടി കൂടിയ ക്രീമുകൾ മുഖക്കുരു ഉണ്ടാക്കാം. ബേബി പൗഡർ ശ്വസിക്കുന്നത് അപകടകരമാണ്. കൂടാതെ ഇവ മുതിർന്നവർക്ക് വേണ്ടത്ര ക്ലീൻസിംഗോ സൂര്യപ്രകാശത്തിൽ നിന്നുള്ള സംരക്ഷണമോ നൽകില്ല, ഇത് കാലക്രമേണ ചർമത്തിന് ദോഷം ചെയ്യും.