രണ്‍ബീര്‍ കപൂറിന്‍റെ 'രാമായണ' തിയറ്ററുകളിൽ തരംഗം സൃഷ്ടിച്ച് മുന്നേറുമ്പോൾ, ചിത്രത്തിലെ പ്രധാന കഥാപാത്രങ്ങളിലൊന്നായ ജഡായുവും അതുമായി ബന്ധപ്പെട്ട സ്ഥലങ്ങളും സോഷ്യൽ മീഡിയയിൽ വന്‍ ചർച്ചയാവുകയാണ്. സിനിമ ഹിറ്റായതോടെ കൊല്ലം ചടയമംഗലത്തെ 'ജഡായു എർത്ത് സെന്ററിലേക്ക്' സഞ്ചാരികളുടെ ഒഴുക്കാണ്. അപ്പോഴാണ് ശരിക്കും രാവണനുമായി ഏറ്റുമുട്ടി ജഡായു വീണത് എവിടെയാണ് എന്നതിനെച്ചൊല്ലി മലയാളികളും ആന്ധ്രപ്രദേശുകാരും തമ്മിൽ സോഷ്യല്‍ മീഡിയയില്‍ വാദപ്രതിവാദങ്ങള്‍ കൊഴുത്തത്.
ആരാണ് ജഡായു? എന്തുകൊണ്ട് ഇപ്പോൾ ചർച്ചയാകുന്നു?
രാമായണത്തിലെ സുപ്രധാന കഥാപാത്രമാണ് ജഡായു. സീതാദേവിയെ രാവണൻ ലങ്കയിലേക്ക് തട്ടിക്കൊണ്ടുപോയപ്പോള്‍ ആകാശത്തുവെച്ച് അത് തടയാൻ ശ്രമിച്ച് രാവണനുമായി പൊരുതി ചിറകറ്റ് വീണ പക്ഷിയാണ് ജഡായു. രൺബീർ കപൂർ ശ്രീരാമനായും, സായി പല്ലവി സീതയായും, യഷ് രാവണനായും വേഷമിട്ട 'രാമായണ' സിനിമ പുറത്തിറങ്ങിയതോടെ വെള്ളിത്തിരയിലെ ജഡായുവിന്റെ ത്യാഗവും കഥയും പ്രേക്ഷകരുടെ മനസ്സിൽ ഇടംപിടിച്ചു. സിനിമ കണ്ടിറങ്ങുന്നവരിൽ ഭൂരിഭാഗവും ജഡായുവിന്റെ ഐതിഹ്യം തേടി കേരളത്തിലെ ജഡായുപ്പാറയെക്കുറിച്ചുള്ള വിവരങ്ങൾ തിരഞ്ഞുതുടങ്ങി.
ചടയമംഗലവും ലെപാക്ഷിയും
ജഡായു വീണത് കേരളത്തിലല്ല, ആന്ധ്രയിലെ ലെപാക്ഷിയിലാണ് എന്ന വാദവുമായി ആന്ധ്രപ്രദേശിലെ ചില വ്ലോഗര്‍മാര്‍ രംഗത്തെത്തിയതാണ് വിവാദത്തിന് വഴിവച്ചത്. ഇൻസ്റ്റഗ്രാമിലും ഫെയ്സ്ബുക്കിലും സംഗതി വൈറലായി. ഇതോടെ ‘അഭിമാനികളായ കൊല്ലംകാർ തങ്ങളുടെ സ്വന്തം ജഡായുപ്പാറ ആന്ധ്രക്കാർക്ക് വിട്ടുനൽകുമെന്ന് കരുതുന്നുണ്ടോ?’ എന്ന മട്ടില്‍ മറുപടികളുമായി മലയാളികളും രംഗത്തെത്തി.
രാവണനുമായി പൊരുതി ചിറകറ്റ ജഡായു വീണത് കൊല്ലം ചടയമംഗലത്തുള്ള കൂറ്റൻ പാറയിലാണ് എന്നാണ് തലമുറകളായി വിശ്വസിക്കുന്നത്. 'ജഡായു വീണ മംഗലം' എന്നതിൽ നിന്നാണ് 'ചടയമംഗലം' എന്ന പേരുണ്ടായത്. ഇവിടെയാണ് രാജീവ് അഞ്ചൽ രൂപകല്പന ചെയ്ത ലോകത്തിലെ ഏറ്റവും വലിയ പക്ഷി ശില്‍പവും ‘ജഡായു എർത്ത്സ് സെന്ററും’ സ്ഥിതി ചെയ്യുന്നത്. സമുദ്രനിരപ്പിൽ നിന്ന് ആയിരം അടിയിലേറെ ഉയരത്തിലുള്ള പാറയ്ക്ക് മുകളിലുള്ള ജഡായു ശില്പത്തിന് 200 അടി നീളവും 150 അടി വീതിയും 70 അടി ഉയരവുമുണ്ട്. സ്ത്രീകളുടെ സുരക്ഷയും അഭിമാനവും എന്ന നിലയിലാണ് ഈ ശില്‍പം സമർപ്പിച്ചിരിക്കുന്നത്.
പരുക്കേറ്റു വീണ ജഡായുവിനെ കണ്ട് ശ്രീരാമൻ തെലുങ്കില്‍ ‘ലെ പാക്ഷി’ അഥവാ ‘ഉണരൂ പക്ഷീ’ എന്ന് വിളിച്ചുവെന്നും അതിൽ നിന്നാണ് ആ സ്ഥലത്തിന് ലെ പാക്ഷി എന്ന് പേരുണ്ടായെന്നുമാണ് ആന്ധ്രക്കാരുടെ വിശ്വാസം. വിജയനഗര സാമ്രാജ്യകാലത്ത് നിർമ്മിച്ച ചരിത്രപ്രസിദ്ധമായ വീരഭദ്ര ക്ഷേത്രവും കൂറ്റൻ ഒറ്റക്കൽ നന്ദി പ്രതിമയും ഇവിടെയുണ്ട്.
കൃത്യമായി ഇന്ന സ്ഥലത്താണ് ജഡായു വീണതെന്ന് തെളിയിക്കാന്‍ നമ്മുടെ പക്കല്‍ ശാസ്ത്രീയമാും ചരിത്രപരമായുമുള്ള തെളിവുകളൊന്നുമില്ല. എങ്കിലും രാമായണവുമായി ബന്ധപ്പെട്ട് രണ്ട് പ്രദേശങ്ങൾക്കും തനതായ ഐതിഹ്യങ്ങളും സാംസ്കാരിക പ്രാധാന്യവുമുണ്ട്. ചടയമംഗലത്തേത് പുരാതനവിശ്വാസവും ലോകത്തെ അതിശയിപ്പിക്കുന്ന ആധുനിക നിര്‍മിതിയുമാണെങ്കില്‍ ആന്ധ്രയിലെ ലെപാക്ഷി പുരാതനമായ ചരിത്ര-ക്ഷേത്ര സമുച്ചയമാണ്.
സിനിമ നൽകിയ ഹൈപ്പിൽ കേരളത്തിനകത്തും പുറത്തുനിന്നും നിരവധിപേരാണ് ഇപ്പോൾ ജഡായു പാറയിലേക്ക് എത്തുന്നത്. സ്വിസ് സാങ്കേതിക വിദ്യയിലുള്ള കേബിൾ കാർ വഴി സഞ്ചാരികള്‍ക്ക് പാറയ്ക്ക് മുകളിലെത്താം. ഇതിന് 550 മുതൽ 650 രൂപ വരെയാണ് ടിക്കറ്റ് നിരക്ക്. 250 മുതൽ 400 രൂപ വരെയാണ് സാധാരണ ടിക്കറ്റ് നിരക്ക്. കാൽനടയായി മലകയറാൻ താല്പര്യമുള്ളവർക്കും മനോഹരമായ വോക്ക് വേയുണ്ട്.
ശില്പത്തിനുള്ളിലെ ഓഡിയോ-വിഷ്വൽ മ്യൂസിയം, 6D തിയറ്റർ, ശ്രീരാമന്റെ പാദമുദ്ര പതിഞ്ഞതായി വിശ്വസിക്കുന്ന രാമക്ഷേത്രം എന്നിവ സന്ദർശകരെയും ഭക്തരെയും ഒരുപോലെ ആകർഷിക്കുന്നു. ഇതുകൂടാതെ സിപ്-ലൈനിങ്, റോക്ക് ക്ലൈംബിങ്, റാപ്പല്ലിങ് തുടങ്ങിയ സാഹസിക വിനോദങ്ങളും എര്‍ത്ത് സെന്‍ററിന്‍റെ ഭാഗമായി ഒരുക്കിയിട്ടുണ്ട്.
ചുരുക്കത്തിൽ, രാമായണ കഥയിലെ ഒരു കഥാപാത്രത്തെച്ചൊല്ലി സോഷ്യൽ മീഡിയയിൽ നടക്കുന്ന രസകരമായ സംവാദം മാത്രമാണിതെങ്കിലും, കേരളത്തിന്റെ അഭിമാനമായ ജഡായുപ്പാറയിലേക്ക് കൂടുതൽ സഞ്ചാരികളെ ആകർഷിക്കാൻ ഈ ചർച്ചകൾ കാരണമായിട്ടുണ്ട്.