പൊലീസുകാർക്ക് ആഴ്ചയിലൊരു ദിവസം അവധി നിർബന്ധമാക്കി ഉത്തരവ്. ഇതിനു പുറമെ കുടുംബത്തിലെ വിശേഷദിവസങ്ങളിൽ അവധി നൽകണമെന്നും നിർദേശമുണ്ട്. ക്രമസമാധാനച്ചുമതലയുള്ള എഡിജിപി പി.വിജയനാണ് ഉത്തരവിറക്കിയത്. പൊലീസുകാർക്കിടയിലെ മാനസികസമ്മർദം വർധിക്കുന്നതും ജോലിഭാരം കൂടുന്നതും ഒഴിവാക്കാനാണ് നടപടി.
നിലവിൽ ആഴ്ചയിലൊരു ദിവസം അവധിയുണ്ടെങ്കിലും പല കാരണങ്ങളാൽ അത് നഷ്ടപ്പെടുന്നുവെന്ന് പരാതി വ്യാപകമാണ്. അതിനാൽ ഇനിമുതൽ നിർബന്ധമായും ആഴ്ചയിൽ അവധി നൽകണമെന്നാണ് നിർദേശം. ഇതുകൂടാതെ വിവാഹവാർഷികം, കുട്ടികളുടെയും പ്രിയപ്പെട്ടവരുടെയും ജന്മദിനം തുടങ്ങിയ അവസരങ്ങളിലും പ്രത്യേക അവധി നൽകണമെന്നും നിർദേശമുണ്ട്. മേലധികാരികൾ ഈ രണ്ടു നിർദേശങ്ങളും ഉറപ്പാക്കണമെന്നും എഡിജിപിയുടെ സർക്കുലറിൽ വ്യക്തമാക്കുന്നു.