'3 കുരുന്നു ജീവനുകൾ നഷ്ടപ്പെട്ട സംഭവമാണ്, പ്രതിക്ക് പരമാവധി ശിക്ഷ ഉറപ്പാക്കും'

നെടുമ്പാശ്ശേരി വാഹനാപകടക്കേസിലെ പ്രതിക്ക് പരമാവധി ശിക്ഷ വാങ്ങിക്കൊടുക്കാനുള്ള ശക്തമായ നടപടികളാണ് സർക്കാരും ആഭ്യന്തര വകുപ്പും സ്വീകരിക്കുന്നതെന്ന് ആഭ്യന്തര മന്ത്രി രമേശ് ചെന്നിത്തല. ഒരു കാരണവശാലും പ്രതികൾ രക്ഷപ്പെടാനുള്ള യാതൊരു സാഹചര്യവും ഉണ്ടാവില്ല. മൂന്ന് കുരുന്നു ജീവനുകൾ നഷ്ടപ്പെട്ട അതീവ ദാരുണമായ സംഭവമാണിതെന്നും ഇതിനെ ഒരിക്കലും ലാഘവത്തോടെ കാണാൻ കഴിയില്ലെന്നും അദ്ദേഹം പറഞ്ഞു. കേസിൽ സർക്കാരും പോലീസും കർശനവും വിട്ടുവീഴ്ചയില്ലാത്തതുമായ നിലപാടുമായി മുന്നോട്ടുപോകുമെന്നും ഈ വിഷയത്തിൽ രാഷ്ട്രീയ മുതലെടുപ്പിന് ശ്രമിക്കുന്നത് ശരിയായ നടപടിയല്ലെന്നും മന്ത്രി വ്യക്തമാക്കി.