വിഴിഞ്ഞം:'കാര്യങ്ങൾ അദാനി വിശദീകരിച്ചിട്ടുണ്ട്, വിവാദം വേണ്ട'; സിപിഎം നിലപാട് തള്ളി ഇപി

 

വിഴിഞ്ഞം ഒാഹരി കൈമാറ്റത്തില്‍ അഴിമതി ആരോപണം ഉന്നയിച്ച സിപിഎം നടപടി തള്ളി ഇ.പി.ജയരാജന്‍. ആക്ഷേപം ഉന്നയിച്ചവര്‍ വ്യക്തതവരുത്തണം. ഞാന്‍ ആക്ഷേപം ഉന്നയിച്ചിട്ടില്ല. കരാര്‍ വ്യവസ്ഥ ലംഘിക്കാന്‍ സാധിക്കില്ല. അതില്‍ മാറ്റം വേണമെങ്കില്‍ സംസ്ഥാന, കേന്ദ്ര സര്‍ക്കാര്‍ അനുമതി വേണം. അദാനിതന്നെ കാര്യങ്ങള്‍ വിശദീകരിച്ചിട്ടുണ്ട്. ഇപ്പോള്‍ തര്‍ക്കമുണ്ടെന്ന് തോന്നുന്നില്ലെന്നും ഇ.പി.ജയരാജന്‍ കണ്ണൂരില്‍ പറഞ്ഞു. വിഴിഞ്ഞം പോലുള്ള ഒരു ബൃഹത്തായ പദ്ധതിയുടെ പ്രവർത്തനങ്ങളെ ഇത്തരത്തിലുള്ള വിവാദങ്ങൾ തകിടം മറിക്കുന്നത് കേരളത്തിന് ദോഷകരമാണെന്നും ഇപി ചൂണ്ടിക്കാട്ടി. പ്രതിപക്ഷ നേതാവ് പിണറായി വിജയന്‍ നിയമസഭയില്‍ ഉന്നയിച്ച ആക്ഷേപങ്ങള്‍ക്ക് വിരുദ്ധമാണ് ഇ.പിയുടെ നിലപാട്. 

 

വിഴിഞ്ഞം തുറമുഖ പദ്ധതിയുമായി ബന്ധപ്പെട്ട് അനാവശ്യ വിവാദങ്ങൾ ഒഴിവാക്കണമെന്നും, പദ്ധതിയുടെ പ്രവർത്തനം കരാർ വ്യവസ്ഥകൾക്ക് അനുസൃതമായി വേഗത്തിൽ പൂർത്തീകരിക്കുകയാണ് വേണ്ടതെന്നും ഇ.പി. ജയരാജൻ പറഞ്ഞു. കേരളത്തിൽ വികസന കാര്യങ്ങളേക്കാൾ വിവാദങ്ങൾക്കും ശണ്ഠകൾക്കുമാണ് ഭരണമുന്നണിയും മന്ത്രിമാരും മുൻഗണന നൽകുന്നതെന്ന് അദ്ദേഹം വിമർശിച്ചു. പദ്ധതി പ്രവർത്തനങ്ങളെ നിർജീവമാക്കുന്ന ഇത്തരം വിവാദങ്ങൾ സംസ്ഥാനത്തിന് ഗുണകരമല്ലെന്നും, കരാറിൽ വ്യതിചലനം വരുത്താതെ കേരളത്തിന്റെ പൊതുതാത്പര്യം സംരക്ഷിക്കാൻ മന്ത്രിമാർ ശ്രദ്ധ പതിപ്പിക്കണമെന്നും അദ്ദേഹം കൂട്ടിച്ചേർത്തു. സംസ്ഥാനത്തിന്റെ വികസനത്തിന് മുൻഗണന നൽകി കാര്യക്ഷമമായ ഇടപെടലുകൾ നടത്തണമെന്നാണ് ജയരാജൻ ആവശ്യപ്പെട്ടത്.

 

പാർട്ടി മൊത്തത്തിൽ സർക്കാരിനെതിരെ അഴിമതിയാരോപണം കടുപ്പിക്കുമ്പോഴും, കേന്ദ്ര കമ്മിറ്റി അംഗമായ ഇ പി ജയരാജൻ താൻ അത്തരം വിവാദങ്ങളുടെ ഭാഗമല്ലെന്ന് പരസ്യമായി പ്രഖ്യാപിച്ചതോടെ സിപിഎമ്മിനുള്ളിലെ ഭിന്നത വീണ്ടും മറനീക്കി പുറത്തുവരികയാണ്.

 

അതേസമയം, വിഴി‍ഞ്ഞം തുറമുഖ ഓഹരി കൈമാറ്റത്തില്‍ പ്രതിപക്ഷത്തിനെതിരെ ആരോപണങ്ങൾ ഉന്നയിച്ച്‌ രക്ഷപെടാൻ ശ്രമമെന്ന് പ്രതിപക്ഷനേതാവ് പിണറായി വിജയന്‍. ദേശാഭിമാനി പത്രത്തിലെ വാർത്ത പൊക്കി പിടിച്ചാണ്  മുഖ്യമന്ത്രിയുടെ വാർത്താസമ്മേളനം. ദേശാഭിമാനി മുഖ്യമന്ത്രി വായിക്കുന്നത് നല്ല കാര്യമാണെന്നും  പിണറായി  പറഞ്ഞു.