‘കോഴിക്കോട്ട് മുഖ്യമന്ത്രി ആക്രമിക്കപ്പെട്ടേക്കും’; പോല്‍ ആപ്പില്‍ സന്ദേശം; യുവാവ് പിടിയില്‍

കോഴിക്കോട് വച്ച് മുഖ്യമന്ത്രി വി.ഡി.സതീശന്‍ ആക്രമിക്കപ്പെടാൻ സാധ്യതയെന്ന് സന്ദേശം അയച്ച യുവാവിനെ പൊലീസ് കസ്റ്റഡിയിലെടുത്ത ശേഷം വിട്ടയച്ചു. കോഴിക്കോട് സിറ്റി കൺട്രോൾ റൂമിലേക്ക് ഇന്നലെ രാത്രിയാണ് സന്ദേശം എത്തിയത്. മുഖ്യമന്ത്രി ആക്രമിക്കപ്പെടാൻ സാധ്യത ഉണ്ടെന്നും കൂടുതൽ പൊലീസിനെ വിന്യസിക്കണം എന്നുമായിരുന്നു സന്ദേശം.

പൊലീസിന്റെ പോല്‍ ആപ്പ് വഴിയാണ് സന്ദേശം എത്തിയത്. തെറ്റിദ്ധരിപ്പിക്കാൻ അയച്ച സന്ദേശമാണെന്ന് വ്യക്തമായതിന് പിറകെ മലപ്പുറം പാണ്ടിക്കാട് സ്വദേശിയായ യുവാവിനെ പൊലീസ് കസ്റ്റഡിയിൽ എടുത്തിരുന്നു. സന്ദേശം വ്യാജമാണെന്ന് സ്ഥിരീകരിച്ചതോടെ വിശദമായ ചോദ്യം ചെയ്യലിന് ശേഷം യുവാവിനെ നോട്ടീസ് നൽകി വിട്ടയക്കുകയായിരുന്നു.

അതേസമയം, ഭീഷണി നിലനില്‍ക്കെ കനത്ത സുരക്ഷയില്ലാതെയാണ് മുഖ്യമന്ത്രി കോഴിക്കോട്  കായികമേള ഉദ്ഘാടന ചടങ്ങിനെത്തിയത്. ഉദ്ഘാടന ചടങ്ങ് പൂര്‍ത്തിയായ ശേഷം പുറത്തേക്കിറങ്ങിയ മുഖ്യമന്ത്രിക്ക് ചുറ്റും ധാരാളം പേര്‍ കൂട്ടമായി എത്തി. നിവേദനങ്ങള്‍ സ്വീകരിച്ചും സെല്‍ഫിക്ക് പോസ് ചെയ്തതിനും ശേഷമാണ് മുഖ്യമന്ത്രി മടങ്ങിയത്.