TAGS

  • ചേരാനല്ലൂരിൽ ബൈക്ക് യാത്രക്കാരന്റെ മരണത്തിനിടയാക്കിയ അപകടത്തിൽ ജഡ്ജിയുടെ 17കാരനായ മകനെതിരെ മനഃപൂർവ്വമല്ലാത്ത നരഹത്യ ഉൾപ്പെടെയുള്ള ജാമ്യമില്ലാ വകുപ്പുകൾ ചുമത്തി.

കൊച്ചി ചേരാനല്ലൂരിൽ അഡീഷണൽ ജഡ്ജിയുടെ പതിനേഴുകാരനായ മകൻ ഓടിച്ച ആഡംബര ബെൻസ് കാറിടിച്ച് സ്കൂട്ടർ യാത്രക്കാരനായ ചിറ്റൂർ സ്വദേശി ജയബാലകൃഷ്ണൻ (54) കൊല്ലപ്പെട്ട സംഭവത്തിൽ പ്രതിയായ പതിനേഴുകാരനെതിരെ നരഹത്യാകുറ്റം ചുമത്തി. നേരത്തെ അശ്രദ്ധമൂലമുള്ള മരണത്തിന് മാത്രം കേസെടുത്ത് പ്രതിയെ സ്റ്റേഷൻ ജാമ്യത്തിൽ വിട്ടയച്ച പൊലീസ് നടപടിയിൽ ആഭ്യന്തരമന്ത്രി കടുത്ത അതൃപ്തി രേഖപ്പെടുത്തുകയും, കർശന വകുപ്പുകൾ ചുമത്തി അന്വേഷണം നടത്താൻ ഡി.ജി.പിക്ക് നിർദേശം നൽകുകയും ചെയ്തതിന് പിന്നാലെയാണ് നടപടി. പ്രായപൂർത്തിയാകാത്ത മകന് വാഹനം ഓടിക്കാൻ നൽകിയതിന് വാഹന ഉടമയായ ഇരിങ്ങാലക്കുട മോട്ടോർ ആക്സിഡന്റ് ക്ലെയിംസ് ട്രൈബ്യൂണൽ അഡീഷണൽ ജഡ്ജ് റിനോ ഫ്രാൻസിസ് സേവ്യറിനെതിരെ മോട്ടോർ വാഹന നിയമപ്രകാരം (MV Act) കേസെടുക്കാനും പൊലീസ് തീരുമാനിച്ചു.

പുലർച്ചെ 2.20-ഓടെ ചിറ്റൂരിലെ തട്ടുകടയിൽ നിന്ന് ഭക്ഷണം കഴിച്ച് പറവൂരിലെ വീട്ടിലേക്ക് മടങ്ങുകയായിരുന്ന ജയബാലകൃഷ്ണനെ, അമിതവേഗതയിൽ എത്തിയ ആഡംബര കാർ ഇടിച്ചുതെറിപ്പിക്കുകയായിരുന്നു. കനത്ത മഴ പെയ്തിരുന്നതിനാൽ റോഡിലൂടെ പോയ സ്കൂട്ടർ ശ്രദ്ധയിൽപ്പെട്ടില്ലെന്നും, 'കൊതി കൊണ്ടാണ്' ആലുവയിലെ ഫ്ലാറ്റിൽ പാർക്ക് ചെയ്തിരുന്ന വാഹനം വീട്ടുകാരുടെ കണ്ണുവെട്ടിച്ച് എടുത്തതെന്നുമാണ് പതിനേഴുകാരൻ പൊലീസിന് നൽകിയ മൊഴി. 

അതേസമയം, അപകടത്തെക്കുറിച്ച് ചോദിച്ചപ്പോൾ 'തന്നെ ആരും ചോദ്യം ചെയ്യേണ്ട' എന്ന തരത്തിൽ ദാർഷ്ട്യം നിറഞ്ഞ പ്രതികരണമാണ് ജഡ്ജിയുടെ ഭാഗത്തുനിന്നുണ്ടായതെന്ന് കൊല്ലപ്പെട്ട ജയബാലകൃഷ്ണന്റെ ബന്ധു ജയലക്ഷ്മി ആരോപിച്ചു. എന്നാൽ മകൻ പുലർച്ചെ കാറെടുത്ത് പോയ കാര്യം താൻ അറിഞ്ഞിരുന്നില്ലെന്നാണ് അഡീഷണൽ ജഡ്ജ് റിനോ ഫ്രാൻസിസ് പൊലീസിന് നൽകിയ വിശദീകരണം.

തുടക്കത്തിൽ കേസ് ലഘൂകരിക്കാൻ ശ്രമിച്ച പൊലീസ് നിലപാടിനെതിരെ ചേരാനല്ലൂർ സ്റ്റേഷന് മുന്നിൽ ഡി.വൈ.എഫ്.ഐ (DYFI) പ്രവർത്തകർ ശക്തമായ പ്രതിഷേധം സംഘടിപ്പിക്കുകയും വ്യാപക ജനരോഷം ഉയരുകയും ചെയ്തിരുന്നു. തുടർന്നാണ് ആഭ്യന്തര വകുപ്പ് നേരിട്ട് ഇടപെട്ട് അന്വേഷണ ചുമതലയുള്ള ഉദ്യോഗസ്ഥർക്ക് അടിയന്തര നിർദേശം നൽകിയത്. പ്രതിയായ പതിനേഴുകാരനെതിരെ മനഃപൂർവ്വമല്ലാത്ത നരഹത്യ ഉൾപ്പെടെയുള്ള ജാമ്യമില്ലാ വകുപ്പുകൾ ചേർത്ത സാഹചര്യത്തിൽ ജുവനൈൽ ജസ്റ്റിസ് ബോർഡിന് മുന്നിൽ ഹാജരാക്കുന്നതടക്കമുള്ള നടപടികളിലേക്ക് പൊലീസ് കടക്കും. വാഹന ഉടമയായ അഡീഷണൽ ജഡ്ജിക്കെതിരെയുള്ള കേസ് റിപ്പോർട്ട് ഉടൻ കോടതിയിൽ സമർപ്പിക്കുമെന്നും വകുപ്പുതല അന്വേഷണം തുടരുകയാണെന്നും ചേരാനല്ലൂർ പൊലീസ് അറിയിച്ചു.

ENGLISH SUMMARY:

Police have slapped charges of culpable homicide against the 17-year-old minor, son of an Additional Judge, involved in the fatal Benz car crash in Cheranallur that killed 54-year-old scooterist Jayabalakrishnan. The strong legal action followed direct intervention and dissatisfaction expressed by the Home Minister, who instructed the DGP to enforce strict charges after initial station bail triggered widespread public and political outrage. Additionally, police decided to register a case under the Motor Vehicles Act against the driver's father, Additional Judge Reno Francis Xavier, for permitting his underage son to drive the luxury vehicle. The suspect, who claimed in his statement that he took the car without permission due to a craving to drive, will now be produced before the Juvenile Justice Board as investigation proceeds.