നെടുമ്പാശേരി അപകടത്തിലെ കാറില്‍ ബിഎംഡബ്ല്യു സംഘത്തിന്റെ പരിശോധന; ഡാറ്റ ശേഖരിക്കും

നെടുമ്പാശേരിയിലുണ്ടായ വാഹനാപകടക്കേസിൽ അറസ്റ്റിലായ ഒന്നാം പ്രതി സുഹൈൽ ഉൾപ്പെടെയുള്ള നാല് പ്രതികളെയും കസ്റ്റഡിയിൽ വാങ്ങി പൊലീസ് തെളിവെടുപ്പും വിവരശേഖരണവും ആരംഭിച്ചു. അപകടത്തിൽ പെട്ട മിനി കൂപ്പർ കാറും സ്കൂട്ടറും മോട്ടോർ വെഹിക്കിൾ ഡിപ്പാർട്ട്മെന്റിന്റെയും (MVD) ബി.എം.ഡബ്ല്യു (BMW) സാങ്കേതിക വിദഗ്ധരുടെയും നേതൃത്വത്തിൽ വിശദമായി പരിശോധിച്ചു. 

കേസിലെ നിർണായക തെളിവുകൾ ശേഖരിക്കുന്നതിന്റെ ഭാഗമായി കാറിലെ 'ഇവൻറ് ഡാറ്റാ റെക്കോർഡർ' (Event Data Recorder) അടക്കമുള്ള സംവിധാനങ്ങൾ വിദഗ്ധ സംഘം പരിശോധനയ്ക്ക് വിധേയമാക്കി.

അപകടം നടന്ന സ്ഥലത്തും പ്രതികൾ മദ്യപിക്കാനായി എത്തിയ ബാറുകളിലും ഉൾപ്പെടെയുള്ള വിവരങ്ങൾ ശേഖരിക്കാനാണ് പ്രതികളെ കസ്റ്റഡിയിൽ എടുത്തിട്ടുള്ളത്. കോടതിയുടെ അനുമതിയോടെ കസ്റ്റഡിയിൽ ലഭിച്ച പ്രതികളെയും കൊണ്ട് നെടുമ്പാശേരി പൊലീസ് സ്റ്റേഷനിൽ നിന്നും വൻ സുരക്ഷയോടെയാണ് സംഘം യാത്ര തിരിച്ചത്.  സുരക്ഷാകാര്യങ്ങളും പൊതുജനങ്ങളിൽ നിന്നുള്ള പ്രതിഷേധ സാധ്യതകളും മുൻനിർത്തി യാത്രയുടെ കൃത്യമായ വഴി പൊലീസ് രഹസ്യമാക്കി വെച്ചിരുന്നു.  

മദ്യലഹരിയിൽ അമിത വേഗതയിലെത്തിയ ആഡംബര കാറിടിച്ച് മൂന്ന് പേരുടെ മരണത്തിനിടയാക്കിയ സംഭവത്തിൽ കൂടുതൽ ഗൂഢാലോചനയുണ്ടോയെന്നും പ്രതികളുടെ അഞ്ചു ദിവസത്തെ സഞ്ചാരപാതയും പൊലീസ് അന്വേഷിക്കുന്നുണ്ട്. കേസിൽ സാങ്കേതിക തെളിവുകൾ പൂർണ്ണമായി ശേഖരിച്ച ശേഷം നാളെ വൈകുന്നേരം അഞ്ച് മണിക്ക് പ്രതികളെ അങ്കമാലി മജിസ്ട്രേറ്റ് കോടതിയിൽ ഹാജരാക്കുമെന്ന് അന്വേഷണ സംഘം അറിയിച്ചു.