പി.എം ശ്രീ: കേരളം പദ്ധതിയുടെ ഭാഗമായി തുടരണം; വീണ്ടും കേന്ദ്രത്തിന്റെ കത്ത്

പി.എം.ശ്രീയില്‍ സംസ്ഥാനത്തെ വീണ്ടും സമ്മര്‍ദത്തിലാക്കി കേന്ദ്രസര്‍ക്കാര്‍. പദ്ധതി തുടരണമെന്ന് ആവശ്യപ്പെട്ട് കേന്ദ്ര വിദ്യാഭ്യാസ സെക്രട്ടറി സംസ്ഥാന ചീഫ് സെക്രട്ടറിക്ക് കത്തയച്ചു. മന്ത്രിസഭാ ഉപസമിതി ചേര്‍ന്ന് മുഖ്യമന്ത്രിക്ക് റിപ്പോര്‍ട്ട് കൈമാറിയശേഷം തുടര്‍നടപടി സ്വീകരിക്കുമെന്ന് വിദ്യാഭ്യാസ മന്ത്രി എന്‍.ഷംസുദീന്‍ പറഞ്ഞു. പദ്ധതിയുടെ തുടര്‍പ്രവര്‍ത്തനങ്ങള്‍ ഉടന്‍ റദ്ദു ചെയ്യണമെന്ന് ആവശ്യപ്പെട്ട് യൂത്ത് ലീഗ് പ്രമേയം പാസാക്കി. കേരളം പി.എം.ശ്രീയില്‍ ധാരണാ പത്രം ഒപ്പിട്ടത് ഒാര്‍മ്മപ്പെടുത്തിക്കൊണ്ടാണ് കേന്ദ്ര വിദ്യാഭ്യാസ സെക്രട്ടറിയുടെ കത്ത്. സംസ്ഥാനം പദ്ധതിയുടെ ഭാഗമായി തുടരണമെന്ന് ചീഫ് സെക്രട്ടറിക്ക് അയച്ച കത്ത് ആവശ്യപ്പെടുന്നു. യുഡിഎഫ് സര്‍ക്കാര്‍ അധികാരമേറ്റശേഷം പിഎംശ്രീ സംബന്ധിച്ച് കേന്ദ്രം ഇത് രണ്ടാം തവണയാണ് കത്തയക്കുന്നത്.

സര്‍ക്കാരിനെ സമ്മര്‍ദത്തിലാക്കുന്നതിനൊപ്പം കേന്ദ്രം തടഞ്ഞുവെച്ചിരിക്കുന്ന ഫണ്ടിനെകുറിച്ചുകൂടി പറയാതെ പറയുക എന്നതാണ് കേന്ദ്ര വിദ്യാഭ്യാസ മന്ത്രാലയം ലക്ഷ്യമിടുന്നത് എന്ന് വ്യക്തമാണ്. ഗുണനിലവാരമുള്ള വിദ്യാഭ്യാസം ഉറപ്പാക്കണമെന്നും, വിദ്യാർഥികളുടെ താല്പര്യം സംരക്ഷിക്കണമെന്നും കത്ത് എടുത്തു പറയുന്നുണ്ട്. മന്ത്രിസഭാ ഉപസമിതി ചേര്‍ന്ന് കാര്യങ്ങള്‍ ഉടന്‍വിലയിരുത്തുമെന്ന് വിദ്യാഭ്യാസ മന്ത്രി എന്‍.ഷംസുദീന്‍പ്രതികരിച്ചു. ചൊവ്വ, ബുധന്‍ദിവസങ്ങളില്‍ മന്ത്രിസഭാ ഉപസമിതി ചേര്‍ന്നശേഷം മുഖ്യമന്ത്രിക്ക് റിപ്പോര്‍ട്ട് നല്‍കും. മന്ത്രിസഭയിലും മുന്നണിയിലും ആലോചിക്കുന്നതിനൊപ്പം എ.ഐ.സി.സിയുടെ നിലപാടുകൂടി അറിഞ്ഞ ശേഷമെ മുഖ്യമന്ത്രിക്ക്  ഇക്കാര്യത്തില്‍ തീരുമാനമെടുക്കാനാവൂ. ഇതിനിടെയൂത്ത് ലീഗ് വീണ്ടും പി.എം.ശ്രീക്കെതിരെ രംഗത്തെത്തി. കരാറില്‍ നിന്ന് പിന്‍മാറാനായില്ലെങ്കില്‍ പിഎംശ്രീയുടെ തുടര്‍പ്രവര്‍ത്തനങ്ങള്‍ റദ്ദുചെയ്യണമെന്ന് ആവശ്യപ്പെട്ട് യൂത്ത് ലീഗിന്‍റെ കോഴിക്കോട് ജില്ലാസമ്മേളനം പ്രമേയം  പാസാക്കി. 2000 കോടി രൂപയോളം കേന്ദ്ര ഫണ്ടാണ് വിദ്യാഭ്യാസ വകുപ്പിന് മാത്രമായി ലഭിക്കാനുള്ളത്. 

അതേസമയം, പിഎം ശ്രീയുമായി സർക്കാർ മുന്നോട്ടുപോകുന്നതിൽ കെപിസിസി യോഗത്തിൽ എതിർപ്പുയർന്നു. പദ്ധതി നടപ്പാക്കിയാൽ രാഷ്ട്രീയമായി വലിയ വിലനൽകേണ്ടി വരുമെന്ന് മാത്യു കുഴൽനാടൻ എംഎൽഎ പറഞ്ഞു. ശക്തമായ മതനിരപേക്ഷ നി ലപാടാണ് കഴിഞ്ഞ തിരഞ്ഞടുപ്പിൽ ന്യൂനപക്ഷങ്ങളെ കോൺഗ്രസിനൊപ്പം നിർത്തിയത്. ബിജെപിക്കെതിരായ നിലപാടുകൾക്കു വലിയ സ്വീകാര്യത ലഭിച്ചു. പിഎം ശ്രീ നടപ്പാക്കുന്നത് ജനങ്ങളെ സർക്കാരിനെതിരാക്കുമെന്നും അദ്ദേഹം പറഞ്ഞു. 

എന്നാൽ, പദ്ധതിയിൽ മുൻസർക്കാരാണ് ഒപ്പുവച്ചതെന്നും പിൻമാറാനാവില്ലെന്നും മുഖ്യമന്ത്രി ചൂണ്ടിക്കാട്ടി. സംസ്ഥാനത്തിന് അവകാശപ്പെട്ട പണം നേടിയെടുക്കേണ്ടതുണ്ട്.

സ്കൂളുകൾ തിരഞ്ഞെടുക്കുന്നതും സിലബസ് തീരുമാനിക്കുന്നതും സംസ്ഥാന സർക്കാരായിരിക്കും. പിഎം ശ്രീ കാരണമാണ് യുഡിഎഫ് തിരഞ്ഞെടുപ്പിൽ ജയിച്ചതെന്ന് ആരും കരുതരുത്. അശോക് ഗെലോട്ട് (രാജസ്ഥാൻ), സിദ്ധരാമയ്യ (കർണാടക), രേവന്ത് റെഡ്ഡി (തെലങ്കാന) എന്നിവർ പദ്ധതി നടപ്പാക്കിയ കോൺഗ്രസ് മുഖ്യമന്ത്രിമാരാണെന്നും വി.ഡി.സതീശൻ ചുണ്ടിക്കാട്ടി.

പിഎം ശ്രീയിൽ തീരുമാനമെടുക്കാൻ ഉപസമിതി വീണ്ടും യോഗം ചേരുമെന്ന് സണ്ണി ജോസഫ് പറഞ്ഞു. പ്രതിപക്ഷ നേതാവ് പിണറായി വിജയൻ അടക്കമുള്ളവർക്കെതിരായ ഇ.ഡിയുടെ കത്തിൽ അതിവേഗം ശക്തമായ നടപടി യെടുക്കണമെന്നും അല്ലാത്തപക്ഷം സിപിഎമ്മുമായി ഒത്തുകളിയാണെന്ന ആക്ഷേപമുയരുമെന്നും കുഴൽനാടൻ പറഞ്ഞു. കേന്ദ്ര ഏജൻസിയുടെ നീക്കങ്ങൾ കെണിയാകാമെന്നും കരുതലോടെ സമീപിക്കണമെന്നും വി.ടി.ബൽറാം എംഎൽഎ പറഞ്ഞു. ഇ.ഡിയുടെ കത്തിൽ കൃത്യ മായ നടപടിയുണ്ടാകുമെന്നും എല്ലാവശങ്ങളും പരിശോധിച്ചും നിയമോപദേശം തേടിയുമായിരിക്കും ഇതെന്നും മുഖ്യമന്ത്രി പറഞ്ഞു.