മദ്യപിച്ച് വാഹനമോടിച്ചു; പൊലീസിനെ കണ്ട് നിര്‍ത്താതെ പോയി; യൂട്യൂബര്‍ക്കെതിരെ കേസ്

മദ്യപിച്ച് വാഹനമോടിച്ചതിന് യൂട്യൂബര്‍ ധന്യ. എസ്.ആറിനെതിരെ കേസ്. കാസര്‍കോട് അണങ്കൂരില്‍ വച്ച് പൊലീസിനെ കണ്ട് നിര്‍ത്താതെ പോയ ധന്യയുടെ വാഹനം പൊലീസ് പിന്തുടര്‍ന്ന് പിടികൂടുകയായിരുന്നു. ഹെലന്‍ ഓഫ് സ്പാര്‍ട്ടയ്ക്ക് എന്ന പേരിലാണ് യുവതി സമൂഹ മാധ്യമങ്ങളില്‍ അറിയപ്പെടുന്നത്. 

ബുധനാഴ്ച പൊലീസ് പരിശോധനയ്ക്കിടെ റോഡിനു നടുവില്‍ അശ്രദ്ധമായി നിര്‍ത്തിയിട്ട നിലയിലായിരുന്നു ധന്യയുടെ കാര്‍. പൊലീസിന് പരിശോധനയ്ക്ക് എത്തുന്നതിനിടെ ധന്യ കാറോടിച്ച് പോവുകയായിരുന്നു. നിര്‍ത്താനാവശ്യപ്പെട്ടിട്ടും പൊലീസിനെ മറികടന്നു പോയ വാഹനം പിന്നീട് പിന്തുടര്‍ന്നാണ് പൊലീസ് കസ്റ്റഡിയിലെടുക്കുന്നത്. പുലര്‍ച്ചെ രണ്ടു മണിയോടെ കുമ്പള ബന്തിയോട് ഭഗവതി നഗറില്‍ നിന്നാണ് വാഹനം കസ്റ്റഡിയിലെടുത്തത്. പരിശോധനയില്‍ യുവതി മദ്യപിച്ചതായി തെളിഞ്ഞു.  കാസര്‍കോട് പെരുമ്പള സ്വദേശിനിയാണ് ധന്യ.