കല്ലറയ്ക്കുള്ളിൽ പായയിൽ പൊതിഞ്ഞ നിലയിൽ ദുരൂഹ വസ്തു; കണ്ടത് സംസ്കാരത്തിനായി തുറന്നപ്പോള്‍

കണ്ണൂർ വാണിയപ്പാറ ഇൻഫന്റ് ജീസസ് പള്ളി സെമിത്തേരിയിലെ പൊതു കല്ലറയ്ക്കുള്ളിൽ പായയിൽ പൊതിഞ്ഞ നിലയിൽ ദുരൂഹ സാഹചര്യത്തിൽ വസ്തു കണ്ടെത്തി. ഇത് മനുഷ്യ മൃതദേഹമാണോ എന്ന സംശയത്തിലാണ് നാട്ടുകാരും പൊലീസും. പള്ളിയിൽ കഴിഞ്ഞ ദിവസമുണ്ടായ മരണത്തെത്തുടർന്ന് ശവസംസ്കാരത്തിനായി കല്ലറ തുറന്നപ്പോഴാണ് പായയിൽ പൊതിഞ്ഞ നിലയിലുള്ള രൂപം കണ്ടത്. നാട്ടുകാരനായ ജിൽസ് ഉണ്ണിമാക്കൽ എന്ന വ്യക്തി കല്ലറയുടെ ചിത്രം സഹിതം ഫെയ്സ്ബുക്കിൽ (Facebook) പങ്കുവെച്ച പോസ്റ്റിലൂടെയാണ് വിവരം പുറംലോകമറിഞ്ഞത്.

പള്ളിയിലെ മൃതദേഹം അടക്കം ചെയ്യാനായി കല്ലറ തുറന്നപ്പോൾ, അതിനകത്തുണ്ടായിരുന്ന ശവപ്പെട്ടിയോട് ചേർന്ന് പായയിൽ പൊതിഞ്ഞ മറ്റൊരു വസ്തു കൂടി കിടക്കുന്നത് കണ്ടെത്തുകയായിരുന്നു. ക്രൈസ്തവ ആചാരപ്രകാരം മൃതദേഹങ്ങൾ പായയിൽ പൊതിഞ്ഞ് അടക്കാറില്ല. മുൻപ് ഉപയോഗിച്ച കല്ലറയിൽ വീണ്ടും സംസ്കാരം നടത്തുമ്പോൾ പഴയ അവശിഷ്ടങ്ങൾ മാറ്റുകയോ അതിനു മുകളിൽ മണ്ണോ മരപ്പൊടിയോ വിതറുകയോ ചെയ്ത ശേഷമേ പുതിയ ശവപ്പെട്ടി വെക്കാറുള്ളൂ. എന്നാൽ ഇവിടെ പെട്ടിയോട് ചേർന്ന് പായയിൽ പൊതിഞ്ഞ രൂപം കണ്ടതോടെ പള്ളി ഭാരവാഹികൾക്കും വികാരിക്കുമടക്കം ദുരൂഹത തോന്നി. 13-ാം തീയതി തന്നെ തങ്ങൾ പൊലീസിൽ ഔദ്യോഗികമായി പരാതി നൽകിയിരുന്നതായും പള്ളി വികാരി വ്യക്തമാക്കി.

പള്ളിയിലെ രജിസ്റ്റർ പ്രകാരം ഈ കല്ലറയിൽ ഇതിനു മുൻപ് 2007-ലും അതിനുശേഷം ഒടുവിലായി 2015-ലുമാണ് ശവസംസ്കാരം നടന്നത്. അതായത് ഏകദേശം 10 വർഷത്തെ വലിയൊരു ഇടവേള ഇതിനിടയിലുണ്ട്. 2015-ന് ശേഷം ഈ കല്ലറ ഇപ്പോഴാണ് തുറക്കുന്നത്. ഇത്രയും വർഷം കല്ലറയ്ക്കുള്ളിലിരുന്നാൽ പായ നശിച്ചുപോകേണ്ടതാണ്. എന്നാൽ ദൃശ്യങ്ങളിൽ കാണുന്ന പ്ലാസ്റ്റിക് പായയ്ക്ക് വലിയ പഴക്കം തോന്നിക്കുന്നില്ല. ഇത് കല്ലറയ്ക്കുള്ളിൽ ഈ അടുത്ത കാലത്ത് ആരോ അതിക്രമിച്ചു കയറി മൃതദേഹമോ മറ്റോ കൊണ്ടുവെച്ചതാണോ എന്ന സംശയം ബലപ്പെടുത്തുന്നു.

പായ തുറന്നുനോക്കി അത് മൃതദേഹമാണോ എന്ന് സ്ഥിരീകരിക്കാൻ പൊലീസിന് സാങ്കേതികവും നിയമപരവുമായ ചില കടമ്പകളുണ്ട്. കല്ലറ തുറന്ന് മൃതദേഹം പുറത്തെടുക്കുക എന്നത് വൈകാരികവും നിയമപരവുമായ വലിയൊരു പ്രക്രിയ ആയതിനാൽ നിലവിൽ പൊലീസ് കല്ലറ സീൽ ചെയ്തിരിക്കുകയാണ്. ഈ കല്ലറയിൽ മുൻപ് അടക്കം ചെയ്തവരുടെ ബന്ധുക്കളെ കണ്ടെത്തി ആളെ സ്ഥിരീകരിക്കാനാണ് പൊലീസ് ആദ്യ ഘട്ടത്തിൽ ശ്രമിക്കുന്നത്. 2018-ൽ ഈ പള്ളിയിൽ പുതിയ വികാരി വന്ന സമയത്ത് കല്ലറകളുടെ നമ്പറുകൾ മാറ്റിയിരുന്നു. ഈ നമ്പർ മാറ്റം പൊലീസിനും ഇടവകക്കാർക്കും ഇടയിൽ വലിയ ആശയക്കുഴപ്പം ഉണ്ടാക്കുന്നുണ്ട്.

ആളെ തിരിച്ചറിയാൻ സാധിച്ചില്ലെങ്കിൽ, കൃത്യമായ നിയമപരമായ അനുമതികളോടെ പൊലീസ് ഈ കല്ലറ വീണ്ടും തുറന്ന് പായയിൽ പൊതിഞ്ഞ വസ്തു പുറത്തെടുത്ത് ശാസ്ത്രീയ പരിശോധനയ്ക്ക് വിധേയമാക്കും. പള്ളി അധികൃതർ അന്വേഷണവുമായി പൂർണ്ണമായി സഹകരിക്കുമെന്ന് അറിയിച്ചിട്ടുണ്ട്.