ആരോഗ്യവകുപ്പിനും മന്ത്രിക്കും തിരിച്ചടി; ഡോ. റീനയുടെ സ്ഥലംമാറ്റം സ്റ്റേ ചെയ്തു

ആരോഗ്യവകുപ്പ് ഡയറക്ടർ (DHS) ഡോ. കെ.ജെ. റീനയെ സ്ഥലം മാറ്റിക്കൊണ്ടുള്ള സർക്കാർ ഉത്തരവ് കേരള അഡ്മിനിസ്ട്രേറ്റീവ് ട്രൈബ്യൂണൽ (KAT) സ്റ്റേ ചെയ്തു. സ്ഥലംമാറ്റത്തിനെതിരെ ഡോ. റീന നൽകിയ ഹർജിയിലാണ് ട്രൈബ്യൂണലിന്റെ അടിയന്തര നടപടി. നിപ പ്രതിരോധ പ്രവർത്തനങ്ങളിൽ വീഴ്ച വരുത്തിയെന്നും 'തൊരപ്പന്‍ പണി' കാണിച്ചുവെന്നും ആരോപിച്ച് ഡോ. റീനയ്ക്കെതിരെ ആരോഗ്യമന്ത്രി കടുത്ത ഭാഷയിൽ പരസ്യ വിമർശനം ഉന്നയിച്ചിരുന്ന പശ്ചാത്തലത്തിൽ, ഈ സ്റ്റേ ഉത്തരവ് ആരോഗ്യവകുപ്പിനും സർക്കാരിനും കനത്ത രാഷ്ട്രീയ തിരിച്ചടിയായി മാറി. 

ഡോ. കെ.ജെ. റീനയ്ക്കെതിരെ കടുത്ത ആരോപണങ്ങളായിരുന്നു ആരോഗ്യമന്ത്രിയും ഭരണപക്ഷ നേതാക്കളും ഉന്നയിച്ചിരുന്നത്. എന്നാൽ ഇതിനെയെല്ലാം അക്കമിട്ട് നിരത്തുന്ന രേഖകളുമായാണ് ഡോ. റീന ട്രൈബ്യൂണലിനെ സമീപിച്ചത്.

നിപ പ്രതിരോധ പ്രവർത്തനങ്ങളിൽ ഡയറക്ടറുടെ ഭാഗത്തുനിന്ന് ഗുരുതര വീഴ്ചയുണ്ടായെന്നും പകർച്ചവ്യാധി സമയത്ത് അവർ 15 ദിവസത്തെ അവധി ആവശ്യപ്പെട്ടെന്നുമാണ് മന്ത്രി മാധ്യമങ്ങളോട് പറഞ്ഞിരുന്നത്. കൂടാതെ ശബരിമല തീർത്ഥാടനവുമായി ബന്ധപ്പെട്ട് ഡോക്ടർമാരെ വിട്ടുനൽകില്ലെന്ന് ഡോ. റീന ഉത്തരവിറക്കിയതായും ആക്ഷേപമുണ്ടായിരുന്നു. 

എന്നാൽ ശബരിമല വിഷയത്തിലടക്കം ഡോ. റീനയുടെ ഭാഗത്തുനിന്ന് അങ്ങനെയൊരു വീഴ്ച സംഭവിച്ചിട്ടില്ലെന്ന് വ്യക്തമാക്കുന്ന ഔദ്യോഗിക രേഖകൾ പുറത്തുവന്നു. സ്ഥലംമാറ്റ ഉത്തരവിൽ തനിക്കെതിരെ വ്യക്തിഹത്യ നടത്തുന്ന പരാമർശങ്ങൾ ഉൾപ്പെടുത്തിയതിനെതിരെയാണ് അവർ പ്രധാനമായും ട്രൈബ്യൂണലിനെ സമീപിച്ചത്.

സാധാരണ ഗതിയിൽ ഒരു സർക്കാർ ഉദ്യോഗസ്ഥനെ സ്ഥലം മാറ്റുമ്പോൾ അതിനുള്ള കാരണങ്ങളോ അവർ അവധിക്ക് അപേക്ഷിച്ച വിവരങ്ങളോ ഉത്തരവിൽ പരാമർശിക്കാറില്ല. എന്നാൽ ഡോ. റീനയുടെ സ്ഥലംമാറ്റ ഉത്തരവിൽ, നിപയും ഷിഗല്ലയും പോലുള്ള പകർച്ചവ്യാധികൾ പടരുന്ന സാഹചര്യത്തിൽ അവർ 15 ദിവസത്തെ അവധി ചോദിച്ചു എന്ന കാര്യം പ്രത്യേകം എടുത്തുപറഞ്ഞിരുന്നു. ഡി.എച്ച്.എസ് (DHS) പദവിയിലിരിക്കുന്ന ഒരു മുതിർന്ന ഉദ്യോഗസ്ഥയെ പൊതുമധ്യത്തിൽ തീർത്തും അപമാനിക്കാനും പുകച്ചുപുറത്തുചാടിക്കാനും ബോധപൂർവ്വം ചെയ്ത നീക്കമാണിതെന്ന് അന്നുതന്നെ ആക്ഷേപമുയർന്നിരുന്നു. ഈ അപാകതകളെല്ലാം കൃത്യമായി ബോധ്യപ്പെട്ടതിനെ തുടർന്നാണ് ട്രൈബ്യൂണൽ ഇപ്പോൾ സ്ഥലംമാറ്റം തടഞ്ഞിരിക്കുന്നത്.