മലയിടംതുരുത്ത് ഭൂമിതർക്കത്തിന് ഒത്തുതീർപ്പ്; കരാറിൽ ഒപ്പുവെച്ച് ഭൂഉടമകളും സർക്കാരും

വർഷങ്ങളായി തുടരുന്ന മലയിടംതുരുത്ത് പര്യത്തുകാവിലെ കുടിയൊഴിപ്പിക്കൽ തർക്കത്തിന് ഒടുവിൽ ഒത്തുതീർപ്പ്. ഭൂഉടമകളും ഒഴിപ്പിക്കൽ ഭീഷണി നേരിട്ടിരുന്ന ഏഴ് കുടുംബങ്ങളും സർക്കാരും തമ്മിൽ ധാരണയിലെത്തി കരാറിൽ ഒപ്പുവെച്ചു. സർക്കാർ മുന്നോട്ടുവച്ച നിർദേശങ്ങൾ ഇരു വിഭാഗങ്ങളും അംഗീകരിച്ചതോടെയാണ് പ്രശ്‌നപരിഹാരമായത്.

കരാർ സംബന്ധിച്ച വിവരങ്ങൾ സർക്കാർ ഇന്ന് ഹൈക്കോടതിയെ അറിയിക്കും. സുപ്രീം കോടതി വിധി വന്ന ശേഷവും തുടരുകയായിരുന്ന ഭൂമിതർക്കത്തിനാണ് സർക്കാരിന്റെ മധ്യസ്ഥതയിൽ അന്തിമപരിഹാരമായത്. ഇന്നലെ രാത്രി നടന്ന ചർച്ചകൾക്ക് പിന്നാലെ ഭൂഉടമകളും ഏഴ് കുടുംബങ്ങളും വിട്ടുവീഴ്ചകൾക്ക് തയ്യാറായി കരാറിൽ ഒപ്പിടുകയായിരുന്നു.

കരാർ പ്രകാരം കുടിയൊഴിപ്പിക്കപ്പെടുന്ന കുടുംബങ്ങൾക്ക് വീടുകൾ നിർമിച്ചു നൽകുന്നതുൾപ്പെടെയുള്ള പുനരധിവാസ നടപടികൾ ഒരു വർഷത്തിനുള്ളിൽ പൂർത്തിയാക്കുമെന്ന് ബന്ധപ്പെട്ട മന്ത്രി ഉറപ്പ് നൽകി. കുടുംബങ്ങളുടെ സുരക്ഷിത പുനരധിവാസം ഉറപ്പാക്കുന്ന രീതിയിലാണ് ധാരണയെന്നും സർക്കാർ വ്യക്തമാക്കി.

ചർച്ചകളിൽ തങ്ങളുടെ ആശങ്കകളും നിലപാടുകളും കേൾക്കാൻ സർക്കാർ തയ്യാറായതോടെയാണ് വിട്ടുവീഴ്ചകൾക്ക് സന്നദ്ധരായതെന്ന് ഭൂഉടമകളായ ശങ്കരൻ നായരുടെ കുടുംബം പ്രതികരിച്ചു. എല്ലാവർക്കും സ്വീകാര്യമായ പരിഹാരമാണ് കരാറിലൂടെ ഉണ്ടായതെന്നും അവർ പറഞ്ഞു.

പതിറ്റാണ്ടുകളായി നീണ്ടുനിന്ന തർക്കത്തിന് കോടതി നടപടികൾക്ക് പുറത്തായി വെറും 20 ദിവസത്തിനുള്ളിൽ പരിഹാരം കണ്ടെത്താനായതും സർക്കാരിന് രാഷ്ട്രീയമായും ഭരണപരമായും നേട്ടമായി വിലയിരുത്തപ്പെടുന്നു. മലയിടംതുരുത്തിലെ ഭൂമിപ്രശ്‌നത്തിന് ഇതോടെ സ്ഥിരമായ പരിഹാരം ഉണ്ടാകുമെന്ന പ്രതീക്ഷയിലാണ് പ്രദേശവാസികൾ.