നിർത്തിയിട്ട കാറിനുള്ളിൽ മൃതദേഹം; എസി ഓണാക്കി ഉറങ്ങിയതെന്ന് പ്രാഥമിക നിഗമനം

തിരുവനന്തപുരം കാര്യവട്ടം പേരൂർ ഗ്രൗണ്ടിൽ നിർത്തിയിട്ടിരുന്ന കാറിനുള്ളിൽ മധ്യവയസ്കനെ മരിച്ച നിലയിൽ കണ്ടെത്തി. ചെമ്പഴന്തി അണിയൂർ സ്വദേശി രാജീവ് (50) ആണ് മരിച്ചത്. കാറിനുള്ളിൽ എ.സി (AC) ഓണാക്കി കിടന്നുറങ്ങിയപ്പോൾ കാർബൺ മോണോക്സൈഡ് ശ്വസിച്ചതാകാം മരണകാരണമെന്നാണ് പ്രാഥമിക നിഗമനം. ഇന്ന് ഉച്ചയ്ക്ക് ശേഷമാണ് ഗ്രൗണ്ടിൽ കളിക്കാനെത്തിയ കുട്ടികൾ കാറിനുള്ളിൽ ബോധരഹിതനായി കിടക്കുന്ന രാജീവിനെ കണ്ടത്.

ഇന്നലെ വൈകുന്നേരമാണ് രാജീവ് കാറുമായി കാര്യവട്ടം പേരൂർ ഗ്രൗണ്ടിൽ എത്തിയത്. ഈ സമയത്ത് അവിടെ കളിച്ചുകൊണ്ടിരുന്ന കുട്ടികളോട് ഇദ്ദേഹം സംസാരിക്കുകയും ചെയ്തിരുന്നു. കുട്ടികൾ കളി കഴിഞ്ഞ് മടങ്ങിയ ശേഷവും രാജീവ് ഗ്രൗണ്ടിൽ തന്നെ തുടരുകയായിരുന്നു എന്നാണ് മനസ്സിലാക്കുന്നത്.

ഇന്ന് കളിക്കാനെത്തിയ കുട്ടികൾ കാർ തുറക്കാൻ ശ്രമിച്ചെങ്കിലും ലോക്ക് ചെയ്ത നിലയിലായിരുന്നു. തുടർന്ന് വിവരമറിഞ്ഞ് ശ്രീകാര്യം പൊലീസ് സ്ഥലത്തെത്തി കാറിന്റെ ചില്ല് പൊട്ടിച്ചാണ് അകത്തുണ്ടായിരുന്ന രാജീവനെ പുറത്തെടുത്തത്. അപ്പോഴേക്കും മരണം സംഭവിച്ചിരുന്നു.

വാഹനം ദീർഘനേരം നിർത്തിയിട്ട് എ.സി ഓണാക്കി ഉറങ്ങുമ്പോൾ ഉണ്ടാകുന്ന വായുസഞ്ചാരക്കുറവും കാറിനുള്ളിലേക്ക് പടരുന്ന കാർബൺ മോണോക്സൈഡ് (Carbon Monoxide) വാതകവുമാകാം മരണത്തിലേക്ക് നയിച്ചതെന്നാണ് സംശയിക്കുന്നത്. പോസ്റ്റ്‌മോർട്ടം റിപ്പോർട്ട് പുറത്തുവന്നതിനു ശേഷമേ മരണത്തിന്റെ യഥാർത്ഥ കാരണം വ്യക്തമാകൂ എന്ന് പൊലീസ് അറിയിച്ചു.