അടുത്ത 3 മണിക്കൂറിൽ മഴയ്ക്ക് സാധ്യത; രണ്ട് ജില്ലകളില്‍ ഓറഞ്ച് അലർട്ട്

കേരളത്തിൽ തുടരുന്ന കടുത്ത വേനൽച്ചൂടിന് ആശ്വാസമായി വിവിധയിടങ്ങളിൽ കനത്ത മഴ. എറണാകുളം, കൊല്ലം ജില്ലകളുടെ കിഴക്കൻ മേഖലകളിലാണ് ശക്തമായ കാറ്റോടും ഇടിമിന്നലോടും കൂടിയ മഴ ലഭിച്ചത്. കൊല്ലം, എറണാകുളം ജില്ലകളിൽ കാലാവസ്ഥാ നിരീക്ഷണ കേന്ദ്രം ഓറഞ്ച് അലർട്ട് പ്രഖ്യാപിച്ചു.

കൊല്ലം ജില്ലയുടെ കിഴക്കൻ മേഖലകളായ ആനക്കുളം, ചണ്ണപ്പേട്ട, മീൻകുളം, ഇട്ടിവ എന്നിവിടങ്ങളിൽ കനത്ത മഴയ്ക്കൊപ്പം ആലിപ്പഴവും വീണു. എറണാകുളം ജില്ലയിലെ കോതമംഗലം ഭാഗത്ത് ഇടിയോടുകൂടിയ കനത്ത മഴയാണ് രേഖപ്പെടുത്തിയത്. വരും മണിക്കൂറുകളിൽ ഈ ജില്ലകളിൽ അതിശക്തമായ മഴയ്ക്കും കാറ്റിനും സാധ്യതയുണ്ടെന്നാണ് മുന്നറിയിപ്പ്.  

മണിക്കൂറിൽ 50 കിലോമീറ്റർ വരെ വേഗതയിൽ വീശിയടിക്കാവുന്ന കാറ്റിനും ഇടിമിന്നലിനും സാധ്യതയുള്ളതിനാൽ ദുരന്തനിവാരണ അതോറിറ്റി പ്രത്യേക സുരക്ഷാ നിർദ്ദേശങ്ങൾ പുറപ്പെടുവിച്ചു:

വാഹനങ്ങൾ ശ്രദ്ധിക്കുക: ശക്തമായ കാറ്റിൽ മരങ്ങൾ കടപുഴകി വീഴാൻ സാധ്യതയുള്ളതിനാൽ വാഹനങ്ങൾ മരങ്ങൾക്ക് താഴെ പാർക്ക് ചെയ്യുന്നത് ഒഴിവാക്കണം. ഇടിമിന്നലുള്ള സമയത്ത് തുറസ്സായ സ്ഥലങ്ങളിൽ നിൽക്കരുത്. വീടിനുള്ളിലെ വൈദ്യുത ഉപകരണങ്ങളുടെ പ്ലഗ്ഗുകൾ ഊരിയിടാൻ ശ്രദ്ധിക്കണം. സംസ്ഥാനത്തെ മറ്റ് ജില്ലകളിലും വരും മണിക്കൂറുകളിൽ ഒറ്റപ്പെട്ട മഴയ്ക്ക് സാധ്യതയുണ്ട്.