‘ആ ആറുപേർ ആര്‍ക്കുവേണ്ടിയാണ് ഈ കുറ്റം ചെയ്തത്?; ആരാണ് ഇവരെ പറഞ്ഞയച്ചത്?’

നടി ആക്രമിക്കപ്പെട്ട കേസിന്‍റെ വിധി നിരാശാജനകമാണെന്ന് കെ.കെ.രമ എംഎൽഎ. അതിജീവിതയ്ക്ക് നീതി വാങ്ങിച്ചു നൽകാൻ സർക്കാരിന് സാധിച്ചില്ലെന്ന ചൂണ്ടിക്കാട്ടിയ കെ.കെ.രമ തെളിവുകൾ ഹാജരാക്കുന്നതിൽ പ്രോസിക്യൂഷന് കനത്ത വീഴ്ചയുണ്ടായെന്ന് കുറ്റപ്പെടുത്തി. കേരളത്തിന്‍റെ സാമൂഹ്യബോധം അതിജീവിതയ്ക്കൊപ്പമാണെന്നും കെകെ.രമ വ്യക്തമാക്കി. 

ഭരണകൂടത്തിന്‍റെ കൃത്യമായ വീഴ്ചയാണ് ഈ കേസില്‍ കാണാൻ സാധിക്കുന്നത്. ബഹുമാനപ്പെട്ട കോടതി പറഞ്ഞ വിധിയില്‍ ആറുപേര്‍ കുറ്റക്കാരാണെന്ന് കണ്ടെത്തി. പക്ഷേ, കോടതി കണ്ടെത്തേണ്ട കാര്യം ഈ ആറുപേർ എന്തിനു വേണ്ടിയാണ് ഈ കുറ്റം ചെയ്തതതെന്നാണ്. 

ഈ കുറ്റത്തിന്‍റെ പിന്നിലുള്ള ഗൂഢാലോചന എന്ത്? ആരാണ് ഇവരെ പറഞ്ഞയച്ചത്? അത് കണ്ടുപിടിക്കേണ്ടേ എന്നും കെ.കെ.രമ ചോദിക്കുന്നു. 

നടി ആക്രമിക്കപ്പെട്ട കേസിന്‍റെ നാൾവഴികൾ പിന്തുടർന്ന ആരും മറിച്ചൊരു വിധി പ്രതീക്ഷിച്ചിട്ടുണ്ടാവില്ലെന്ന് കെ.കെ.രമ എംഎൽഎ പറഞ്ഞു. അതിക്രൂരമായ ഈ കുറ്റകൃത്യത്തിന് പിറകിലെ ഗൂഢാലോചന തെളിയിക്കുന്നതിൽ പൊലീസും പ്രോസിക്യൂഷനും പരാജയപ്പെട്ടു. ഈ പരാജയത്തിനു പിറകിൽ കാണാമറയത്തെ ഉന്നത ഒത്തുതീർപ്പുകളുണ്ടോ എന്ന് സംശയിക്കേണ്ടിയിരിക്കുന്നുവെന്നും കെ.കെ.രമ എംഎല്‍എ ചൂണ്ടിക്കാട്ടി.