അടിമാലിക്ക് സമീപം ദേശീയപാതയില്‍ മണ്ണിടിച്ചില്‍; ഒരു വീട് തകര്‍ന്നു, ദമ്പതികള്‍ കുടുങ്ങി

ഇടുക്കി അടിമാലി ലക്ഷംവീട് 'ഉന്നതി' കോളനിക്ക് സമീപം ദേശീയപാതയിൽ മണ്ണിടിച്ചിലുണ്ടായതിനെ തുടർന്ന് ഒരു വീട് പൂർണ്ണമായും തകർന്നു. ഈ അപകടത്തിൽ ബിജുവും ഭാര്യ സന്ധ്യയും മണ്ണിനടിയിൽ കുടുങ്ങി. കുടുങ്ങിക്കിടക്കുന്ന ദമ്പതികളുടെ ശബ്ദം പുറത്തുകേൾക്കാമെന്ന് നാട്ടുകാർ അറിയിച്ചു, ഇത് രക്ഷാപ്രവർത്തകർക്ക് പ്രതീക്ഷ നൽകുന്നു. മണ്ണിടിച്ചിൽ ഭീഷണിയുള്ളതിനെ തുടർന്ന് സമീപത്തെ 22 കുടുംബങ്ങളെ നേരത്തെ തന്നെ അധികൃതർ മാറ്റിപ്പാർപ്പിച്ചിരുന്നു. എന്നാൽ, അധികൃതരുടെ നിർദ്ദേശം ഉണ്ടായിട്ടും മാറാൻ തയ്യാറാകാതിരുന്ന വീട്ടുകാരാണ് അപകടത്തിൽപ്പെട്ടതെന്നാണ് പ്രാഥമിക വിവരം. 

നിലവിൽ, പൊലീസും ഫയർഫോഴ്‌സും നാട്ടുകാരും സംയുക്തമായി മേൽക്കൂര ഉയർത്തി ദമ്പതികളെ പുറത്തെത്തിക്കാനുള്ള തീവ്ര ശ്രമത്തിലാണ്. കഴിഞ്ഞ ദിവസങ്ങളിലെ കനത്ത മഴ മണ്ണിടിച്ചിലിന് കാരണമായി. ദേശീയപാത നിർമ്മാണത്തിലെ അശാസ്ത്രീയതയാണ് മണ്ണിടിച്ചിലിന് കാരണമെന്നാണ് പ്രദേശവാസികളുടെ ആരോപണം. ധനുഷ്കോടി ദേശീയപാതയിൽ ഉൾപ്പെടെ പലയിടത്തും നിർമ്മാണത്തിലെ അശാസ്ത്രീയത കാരണം ചെറിയ മഴയിൽ പോലും മണ്ണിടിച്ചിലും കോൺക്രീറ്റ് ഭിത്തികൾ തകർന്നുവീഴുന്ന സാഹചര്യവും ഉണ്ടാകുന്നുണ്ടെന്നും റിപ്പോർട്ടുണ്ട്.