പതിനായിരം രൂപ കൈക്കൂലി വാങ്ങുന്നതിനിടെ വിജിലൻസ് സംഘമെത്തിയപ്പോള്‍ രക്ഷപ്പെടാന്‍ പൊലീസ് സബ് ഇൻസ്പെക്ടർ കുളത്തില്‍ ചാടി. പിന്നാലെ ചാടിയ വിജിലന്‍സ് ഉദ്യോഗസ്ഥര്‍ എസ്ഐയെ കയ്യോടെ പിടികൂടി. ഒഡീഷയിലെ സംബൽപൂർ ജില്ലയിലുള്ള‍പ്പെട്ട മഹൽപാലി പൊലീസ് സ്റ്റേഷനിലെ എസ്ഐ സുജിത് കുമാർ മഹന്തയാണ് പിടിയിലായത്.
തനിക്കെതിരെ റജിസ്റ്റർ ചെയ്ത കേസ് തീർപ്പാക്കുന്നതിനായി പരാതിക്കാരനിൽ നിന്ന് കൈക്കൂലി വാങ്ങുന്നതിനിടയിലാണ് സബ് ഇൻസ്പെക്ടർ കുടുങ്ങിയത്. ഈ കേസിലെ അന്വേഷണ ഉദ്യോഗസ്ഥനായിരുന്നു സുജിത് കുമാര്‍ മഹന്ത. പൊലീസ് സ്റ്റേഷന് പുറത്തുള്ള വിജനമായ ഒരു സ്ഥലത്തേക്ക് സബ് ഇൻസ്പെക്ടർ പരാതിക്കാരനെ വിളിച്ചുവരുത്തുകയായിരുന്നു.
പണം വാങ്ങുമ്പോള്‍ വിജിലൻസ് സംഘത്തെ കണ്ട എസ്ഐ ഓടി രക്ഷപ്പെടുകയും, ഉദ്യോഗസ്ഥർ പിന്തുടർന്നപ്പോൾ സമീപത്തുണ്ടായിരുന്ന ഒരു കുളത്തിലേക്ക് ചാടുകയുമായിരുന്നു. തുടർന്ന് വിജിലൻസ് ഉദ്യോഗസ്ഥര്‍ കുളത്തിലിറങ്ങി അദ്ദേഹത്തെ പിടികൂടി.
എസ്ഐയുടെ ഓഫീസ്, ഔദ്യോഗിക ക്വാർട്ടേഴ്സ്, ബന്ധമുള്ള മറ്റിടങ്ങള്‍ എന്നിവിടങ്ങളിൽ വിജിലന്‍സ് സംഘം പരിശോധന നടത്തി. പൊലീസ് സ്റ്റേഷനോട് ചേർന്നുള്ള വിശ്രമമുറിയിൽ നിന്ന് 1.55 ലക്ഷം രൂപ പണമായി കണ്ടെടുത്തു. മഹന്തയ്‌ക്കെതിരെ അഴിമതി നിരോധന നിയമപ്രകാരം കേസെടുത്തിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും ഉദ്യോഗസ്ഥർ അറിയിച്ചു.