പുഴുങ്ങിയ മുട്ട മുറിച്ചുനോക്കുമ്പോൾ മഞ്ഞക്കരുവിന് ചുറ്റും പച്ച കലർന്ന ചാരനിറത്തിലുള്ള വളയം കണ്ടിട്ടുണ്ടോ? കാഴ്ചയിൽ അൽപ്പം അസ്വാഭാവികമായി തോന്നുന്നതിനാൽ മുട്ട കേടായതാണെന്നും കരുതാറുണ്ട്. എന്നാൽ ഇതിന്റെ യാഥാര്ഥ്യം എന്താണ്? എന്തുകൊണ്ടാണ് മഞ്ഞക്കരുവിന് ചുറ്റും പച്ച-ചാര നിറം വരുന്നത്?
മുട്ട അമിതമായി വേവിക്കുമ്പോൾ സംഭവിക്കുന്ന ഒരു സാധാരണ രാസപ്രവർത്തനത്തിന്റെ ഫലമായാണ് പലപ്പോഴും ഈ പച്ച-ചാര വളയം രൂപപ്പെടുന്നത്. മുട്ട കൂടുതൽ സമയം പുഴുങ്ങുകയോ ഉയർന്ന ചൂടിൽ ആവശ്യത്തിലധികം നേരം വേവിക്കുകയോ ചെയ്യുമ്പോൾ മുട്ടയുടെ വെള്ളയിലുള്ള സൾഫറും മഞ്ഞക്കരുവിലെ ഇരുമ്പും തമ്മിൽ രാസപ്രവർത്തനം നടക്കുന്നു. ഇതിന്റെ ഫലമായി അയൺ സൾഫൈഡ് രൂപപ്പെടുകയും മഞ്ഞക്കരുവിന്റെ പുറംഭാഗത്ത് പച്ചയോ ചാരനിറമോ കലർന്ന വളയം പ്രത്യക്ഷപ്പെടുകയും ചെയ്യാം. അതിനാൽ, മഞ്ഞക്കരുവിന് ചുറ്റുമുള്ള ഈ വളയം സാധാരണയായി മുട്ട അമിതമായി വേവിച്ചതിന്റെ സൂചനയാണ്. മുട്ട കേടായതിന്റെ ലക്ഷണമല്ല.
മുട്ട ആവശ്യത്തിലധികം സമയം പുഴുങ്ങിയാൽ മഞ്ഞക്കരു കൂടുതൽ വരണ്ടതും കട്ടിയുള്ളതുമാകാം. ഇതോടെ മുട്ടയുടെ ആകൃതിയിലും രുചിയിലും ചെറിയ മാറ്റങ്ങൾ അനുഭവപ്പെടാം. മഞ്ഞക്കരുവിന് ചുറ്റും പച്ച-ചാര വളയം ഉണ്ടാകുന്നതും മുട്ടയുടെ ഗുണങ്ങളില് വ്യത്യാസം വരുന്നതും ഒഴിവാക്കാൻ മുട്ട ആവശ്യത്തിലധികം സമയം വേവിക്കാതിരിക്കുക. പുഴുങ്ങിയ ശേഷം മുട്ട ഉടൻതന്നെ തണുത്ത വെള്ളത്തിലോ ഐസ് വെള്ളത്തിലോ ഇടുന്നതും ഈ രാസപ്രവർത്തനം ഒഴിവാക്കാന് സഹായകമാകും.
ചാരവളയം കണ്ടാൽ മുട്ട കളയണോ?
വളയം മാത്രം കണ്ടതിന്റെ പേരിൽ മുട്ട കളയേണ്ടതില്ല. മുട്ട പുഴുങ്ങുന്നതിന് മുമ്പ് ഫ്രഷ് ആയിരുന്നെന്നും ശരിയായ രീതിയിൽ പാചകം ചെയ്തെന്നും പിന്നീട് സുരക്ഷിതമായി സൂക്ഷിച്ചെന്നും ഉറപ്പുണ്ടെങ്കിൽ, മഞ്ഞക്കരുവിന് ചുറ്റുമുള്ള ഈ നിറവ്യത്യാസം സാധാരണയായി അപകടകരമല്ല. മുട്ടയിൽ ഉയർന്ന നിലവാരമുള്ള പ്രോട്ടീൻ, വിറ്റാമിൻ ബി12, കോളിൻ തുടങ്ങിയ നിരവധി പോഷകങ്ങളും അടങ്ങിയിട്ടുണ്ട്. അതുകൊണ്ടുതന്നെ പുഴുങ്ങിയ മുട്ടയിലെ ഈ സാധാരണ നിറമാറ്റത്തെ മാത്രം അടിസ്ഥാനമാക്കി മുട്ട ഒഴിവാക്കേണ്ടതില്ല.
ഏത് രീതിയിലുള്ളതാണ് കഴിക്കാന് പാടില്ലാത്തത്?
മുട്ട സുരക്ഷിതമാണോ എന്ന് തീരുമാനിക്കുമ്പോൾ അതിന്റെ നിറത്തേക്കാൾ പ്രധാനമാണ് മുട്ടയുടെ ഫ്രഷ്നസ്, എങ്ങനെ സൂക്ഷിച്ചു, എങ്ങനെ പാചകം ചെയ്തു തുടങ്ങിയ കാര്യങ്ങൾ. മുട്ടയിൽ അസാധാരണമായ ദുർഗന്ധം അനുഭവപ്പെടുകയോ, മുട്ടയുടെ വെള്ളയിലോ മഞ്ഞക്കരുവിലോ അസാധാരണമായ നിറമാറ്റം കാണുകയോ ചെയ്താൽ അത് കഴിക്കാതിരിക്കുന്നതാണ് സുരക്ഷിതം. അതുപോലെ, മുട്ട ശരിയായ താപനിലയിൽ സൂക്ഷിച്ചിട്ടില്ലെന്ന് സംശയമുണ്ടെങ്കിൽ ഒഴിവാക്കുന്നതാണ് നല്ലത്. തൊലി പൊട്ടിയ മുട്ടകളിലും കൂടുതൽ ശ്രദ്ധ ആവശ്യമാണ്.