സെൽഫിക്ക് 8 ലക്ഷ രൂപ പിഴ;"ഇൻവിസിബിൾ ഹൗസ്" നൽകിയത് പേടിസ്വപ്നമെന്ന് ഇൻഫ്ലുവൻസർ

ഇൻസ്റ്റാഗ്രാം ചിത്രങ്ങൾക്ക് പേരുകേട്ട കാലിഫോർണിയയിലെ പ്രശസ്തമായ "ഇൻവിസിബിൾ ഹൗസിൽ" താമസിച്ച എയർബിഎൻബി അതിഥിക്ക് ദുരനുഭവം. ഒരു സെൽഫി എടുത്തതിന് 10,000 ഡോളർ (ഏകദേശം 8.78 ലക്ഷം രൂപ) പിഴ ചുമത്തിയതായി ടിക് ടോക്കർ ഷോൺ ഡേവിസ് ആരോപിച്ചു. ഒരു രാത്രിക്ക് 2,400 ഡോളർ വാടക നൽകിയാണ് ഇവർ ഈ ആഡംബര വീട്ടിൽ താമസിച്ചത്.

പ്രതിഫലിക്കുന്ന ഗ്ലാസ് ഭിത്തികളുള്ള ഈ വീട് കാഴ്ചയിൽ മരുഭൂമിയിലെ പ്രകൃതിദൃശ്യങ്ങളുമായി ഇഴുകിച്ചേർന്നതുപോലെ തോന്നും. നെറ്റ്ഫ്ലിക്സ് ഷോകളിലും ഇവിടം ഇടം നേടിയിരുന്നു.  എന്നാൽ, വാണിജ്യപരമായ ഫോട്ടോഗ്രാഫിക്ക് കർശനമായ വിലക്കുകൾ ഏർപ്പെടുത്തിയ ഈ വീട്ടിൽ, സാധാരണ സെൽഫി എടുത്തതിനാണ് വലിയ തുക പിഴയായി ആവശ്യപ്പെട്ടതെന്ന് ഡേവിസ് പറയുന്നു.

നിബന്ധനകൾ ലംഘിച്ചു?

ന്യൂയോർക്ക് പോസ്റ്റ് റിപ്പോർട്ട് ചെയ്തതനുസരിച്ച്, ഡേവിസിന്റെ സുഹൃത്തിന്റെ കാമുകി കുളിമുറിയിൽ വെച്ചെടുത്ത ഒരു സെൽഫി ഇൻസ്റ്റാഗ്രാമിൽ പോസ്റ്റ് ചെയ്തതാണ് പ്രശ്നങ്ങൾക്ക് കാരണം. ഇത് വീടിന്റെ വാണിജ്യ ഉപയോഗ നിരോധന വ്യവസ്ഥയുടെ ലംഘനമാണെന്ന് ഉടമകൾ ആരോപിച്ചു. വീടിന് പുറത്തുവെച്ചാണ് തങ്ങൾ ചിത്രമെടുത്തതെന്നും, എന്നിട്ടും ഒരു സെൽഫി വലിയ പ്രശ്നമായെന്നും ഡേവിസ് പറഞ്ഞു.

"ഇതൊരു പേടിസ്വപ്നമായിരുന്നു," ഡേവിസ് തന്റെ അനുഭവം വിവരിച്ചു. ഉയർന്ന വാടക നൽകിയിട്ടും വീട് അസ്വസ്ഥമായ ഒരനുഭവമാണ് നൽകിയതെന്നും അദ്ദേഹം പറഞ്ഞു. രാത്രിയിൽ വീടിന്റെ സുതാര്യമായ ചുവരുകൾ പുറത്തുനിന്നുള്ളവർക്ക് അകത്തേക്ക് കാണാൻ സാധിക്കുന്ന രീതിയിലുള്ളതാണെന്നും, ഇത് സ്വകാര്യതയ്ക്ക് ഭീഷണിയാണെന്നും അദ്ദേഹം ആരോപിച്ചു. കൂടാതെ, രാത്രിയിൽ വീടിന് ഉച്ചത്തിലുള്ള ശബ്ദം ഉണ്ടാകുന്നതായും ഇത് ഉറക്കത്തിന് തടസ്സമുണ്ടാക്കിയെന്നും ഡേവിസ് കൂട്ടിച്ചേർത്തു.

എയർബിഎൻബിയുടെ ഇടപെടൽ

എയർബിഎൻബി ഹോസ്റ്റുകൾക്ക് സ്വന്തം നിയമങ്ങൾ വെക്കാൻ അനുവാദം നൽകുന്നുണ്ട്. അതനുസരിച്ച്, മുൻകൂർ അനുമതിയില്ലാത്ത പ്രൊഫഷണൽ അല്ലെങ്കിൽ വാണിജ്യ ഫോട്ടോഗ്രാഫി പാടില്ലെന്നാണ് ഇൻവിസിബിൾ ഹൗസിൻ്റെ നിയമം. എന്നാൽ, പൊതുവായ സോഷ്യൽ മീഡിയ അക്കൗണ്ടിൽ പോസ്റ്റ് ചെയ്ത ഒരു സെൽഫി പ്രൊമോഷണൽ ഉള്ളടക്കമായി കണക്കാക്കി പിഴ ചുമത്തിയത് നീതികേടാണെന്ന് അതിഥി വാദിച്ചു. അതേസമയം, സെൽഫി ഒരു ബ്രാൻഡ് പ്രൊമോഷനല്ല, മറിച്ച് സ്വകാര്യമായ ഒരനുഭവമാണെന്ന് ഡേവിസ് പറഞ്ഞു.

സംഭവം വിവാദമായതോടെ എയർബിഎൻബി തർക്കത്തിൽ ഇടപെട്ടിട്ടുണ്ട്. വിഷയത്തിൽ അവർ പരസ്യമായി പ്രതികരിച്ചിട്ടില്ലെങ്കിലും, അതിഥിക്കും ഉടമകൾക്കുമിടയിൽ മധ്യസ്ഥത വഹിക്കുകയാണെന്നാണ് റിപ്പോർട്ടുകൾ.