'കാട്ടുമരുന്നൊന്നും സെയ്തില്ലേ'; ബൈജു ചേട്ടന്‍റെ ചാട്ടം മാത്രവല്ല; ബികെയുവില്‍ ഒളിപ്പിച്ചുവച്ച 21 റഫറൻസുകൾ

ഗിരീഷ് എഡി ചിത്രം ബെത്​ലഹേം കുടുംബ യൂണിറ്റ് ഒടിടി റിലീസിന് പിന്നാലെ വീണ്ടും ചര്‍ച്ചയിലേക്കുയരുകയാണ്. കളക്ഷനില്‍ റെക്കോര്‍ഡുകള്‍ ഭേദിച്ചതിന് ശേഷമാണ് ചിത്രം ഒടിടിയിലേക്ക് എത്തിയിരിക്കുന്നത്. ചിത്രത്തിന്‍റെ ഒടിടി റിലീസിന് പിന്നാലെ ബികെയുവിലെ റഫറന്‍സുകളാണ് പ്രേക്ഷകര്‍ ചര്‍ച്ചയാക്കുന്നത്. പ്രേക്ഷകര്‍ ശ്രദ്ധിച്ചതും ശ്രദ്ധിക്കാത്തതുമായ എണ്ണിയാലൊടുങ്ങാത്ത റഫറന്‍സാണ് ബെത്​ലഹേം കുടുംബ യൂണിറ്റില്‍ ഉള്‍പ്പെടുത്തിയിരിക്കുന്നത്. അതും സിനിമകളിലേത് മാത്രമല്ല, ഷോട്ട് ഫിലിമുകളും യൂട്യൂബര്‍മാരും ടിക്ക് ടോക്ക് താരങ്ങളും ഉള്‍പ്പെടെയുള്ളവരുടെ റഫറന്‍സുകള്‍ ചിത്രത്തിലുണ്ട്. അത്തരത്തിലുള്ള 21 റഫറന്‍സുകള്‍ ഇതാ. 

1. 'അവന്‍റെ തലയിലെന്താടാ മരക്കൊത്തിയെപ്പോലെ ചുവന്ന കെട്ട്': ഷോർട്ട് ഫിലിം ഷൂട്ടിനിടെ ജസ്റ്റിൻ ജോയലിനെ നോക്കി പറയുന്ന ഈ പരാമർശം 'പട്ടണപ്രവേശം' സിനിമയിൽ തിലകൻ അവതരിപ്പിച്ച കഥാപാത്രത്തിന്റെ ഡയലോഗിനെ ഓർമിപ്പിക്കുന്നു.

2. 'ചേട്ടാ, ബ്രേക്ക് ഒന്ന് അപ്ലൈ ചെയ്തേക്ക്': ഗ്ലിക്സൺ പറയുന്ന ഈ ഡയലോഗ് 'മായാവി'യിലെ സുരാജ് വെഞ്ഞാറമൂടിന്റെ കഥാപാത്രത്തെ ഓർമിപ്പിക്കുന്നതാണ്.

3. 'അയ്യപ്പാ': ജോയലിന്റെ ആക്ഷൻ എന്ന പ്രയോഗത്തിന് പകരം 'അയ്യപ്പാ' എന്ന് പറയുന്ന രംഗം പൃഥ്വിരാജ് ചിത്രം 'ഹീറോ'യിലെ തലൈവാസൽ വിജയ് അവതരിപ്പിച്ച കഥാപാത്രത്തിന്റെ ഡയലോഗിനെ അടിസ്ഥാനമാക്കിയുള്ളതാണ്.

4. 'ഐറ്റം യമണ്ടനാ, കേൾക്കുമ്പോൾ തന്നെ ഞാൻ ചാർജാവുന്നുണ്ട്': 'ഹീറോ' സിനിമയിൽ അനൂപ് മേനോൻ അവതരിപ്പിച്ച കഥാപാത്രത്തിന്റെ ഡയലോഗാണ് ഇവിടെ റഫറൻസായി ഉപയോഗിച്ചിരിക്കുന്നത്.

5. 'എങ്ക മാതിരി പസങ്കളെ പാത്താ പുടിക്കാത്, പാക്ക പാക്ക താൻ പുടിക്കും': ഗ്ലിക്സൺ പറയുന്ന ഈ തമിഴ് ഡയലോഗ് ധനുഷ് ചിത്രം 'പടിക്കാതവൻ' എന്ന സിനിമയിലെ സംഭാഷണത്തെ ഓർമിപ്പിക്കുന്നു.

6. 'ഇപ്പ തരാം, എന്നാ പിന്നെ തരാം': ബസ് കണ്ടക്ടറോട് ഗ്ലിക്സൺ പറയുന്ന ഈ ഡയലോഗ് 'മീശ മാധവൻ' സിനിമയിൽ മാള അരവിന്ദൻ അവതരിപ്പിച്ച കഥാപാത്രത്തിന്റെ സംഭാഷണമാണ്.

7. 'ചിരിക്കുവാണോ കരയുവാണോ': റിയ പറയുന്ന ഈ ഡയലോഗ് 'പുലിവാൽ കല്യാണം' സിനിമയിൽ ഹരിശ്രീ അശോകൻ അവതരിപ്പിച്ച കഥാപാത്രത്തിന്റേതാണ്.

8. 'ദേ ചേട്ടൻ പിന്നേം': ദേവദത്ത് പറയുന്ന ഈ സംഭാഷണം 'ചുണ്ണാമ്പ്' എന്ന ഷോർട്ട് ഫിലിമിലെ ഡയലോഗിനെ ഓർമിപ്പിക്കുന്നു.

9. സംഗീത് പ്രതാപിന്റെയും കൂട്ടുകാരുടെയും നൃത്തം: എട്ടുവർഷം മുൻപ് കോട്ടയം വൈക്കം കൊതോറയിലെ പള്ളിയിലെ വാർഷികാഘോഷത്തിനിടെ അവതരിപ്പിച്ച നൃത്തത്തിന്റെ പുനരാവിഷ്കാരമാണ് ഈ രംഗം.

10. 'ചെറുപ്പുളശേരിക്കാരൻ എണീക്ക്': ദേവദത്ത് പറയുന്ന ഈ ഡയലോഗ് 'റാംജിറാവു സ്പീക്കിങ്ങി'ൽ ഇന്നസെന്റ് അവതരിപ്പിച്ച കഥാപാത്രത്തിന്റെ സംഭാഷണമാണ്.

11. 'ദൈവം പോലും കരഞ്ഞുപോവൂടോ': ഗ്ലിക്സൺ പറയുന്ന ഈ ഡയലോഗ് ടിക് ടോക് താരം അമ്പിളിയുടെ ടിക് ടോക് വിഡിയോ റഫറൻസാണ്.

12. 'വിഷ്ണു': ഷോർട്ട് ഫിലിം ഷൂട്ടിനിടെ കേൾക്കുന്ന ഈ വിളി 'വിപ്രണാശം' എന്ന ഷോർട്ട് ഫിലിമിലെ ഡയലോഗിനെ ഓർമിപ്പിക്കുന്നു.

13. 'കാട്ടുമരുന്നൊന്നും സെയ്തില്ലേ': 'ഓർക്കിഡ് പൂക്കൾ പറഞ്ഞ കഥ' എന്ന ഷോർട്ട് ഫിലിമിലെ സംഭാഷണമാണ് ഈ രംഗത്തിൽ ഉൾപ്പെടുത്തിയിരിക്കുന്നത്.

14. ജസ്റ്റിന്റെ സ്മോക്കി ചിക്കൻ: 'പവിത്രം' സിനിമയിലെ ഉണ്ണി മധുരം 

15. 'എല്ലാവർക്കും ഓരോ സിംഗിൾ ലൈഫുണ്ട്': അലൻ ജോസ് പെരേരയുടെ പാട്ടുമായി ബന്ധപ്പെട്ട റഫറൻസ്

16. 'വെടിവെച്ചാൽ പൊട്ടാത്ത കരിമ്പാറയെ നീ കുലുക്കി': രേഷ്മ പറയുന്ന ഈ വരികൾ 'സ്ഫടികം' സിനിമയിലെ ഡയലോഗിനെ ഓർമിപ്പിക്കുന്നു.

17. 96 സിനിമയിലെ തൃഷ: രേഷ്മ ധരിക്കുന്ന ചുരിദാറിലൂടെ '96' സിനിമയിൽ തൃഷ അവതരിപ്പിച്ച കഥാപാത്രത്തിന്റെ ലുക്കിനെയാണ് റഫറൻസ് ചെയ്തിരിക്കുന്നത്. 

18. ആഷ്‌ലിയുടെ കോളേജ് പരിപാടിക്കിടെ ഗ്ലിക്സൺ ഓഡിറ്റോറിയത്തിൽ ഇരിക്കുന്ന രംഗത്തും 'ബണ്ണി ദി ലയൺ' എന്നതുമായി ബന്ധപ്പെട്ട റഫറൻസുണ്ട്.

19. ബൈജു ചേട്ടന്റെ ചാട്ടം: 'തുടരും' സിനിമയിൽ മോഹൻലാൽ അവതരിപ്പിച്ച കഥാപാത്രത്തിന്റെ ചാട്ടമാണ് ഈ രംഗത്തിലൂടെ ഓർമിപ്പിക്കുന്നത്.

20. ഹരിയുടെ മുഖം വിറപ്പിക്കൽ: ഹരി മുഖം വിറപ്പിക്കുന്ന രംഗം കമൽഹാസൻ നായകനായ 'നായകൻ' സിനിമയിലെ ശ്രദ്ധേയമായ രംഗത്തിന്റെ റഫറൻസാണ്.

21. ക്ലൈമാക്സിലെ കാന്താര റഫറൻസ്: ക്ലൈമാക്സ് സംഘട്ടനരംഗത്തിൽ ഹരിയുടെ 'കാന്താര' സിനിമയുടെ റഫറൻസ്

ഒടിടി റിലീസിന് പിന്നാലെ ഇത്തരം റഫറൻസുകൾ വീണ്ടും ചർച്ചയാകുന്നത് ചിത്രത്തിലെ സൂക്ഷ്മമായ അവതരണങ്ങളിലേക്ക് പ്രേക്ഷകരുടെ ശ്രദ്ധ തിരിക്കുകയാണ്. എന്നാല്‍ ഇനിയും ചിത്രത്തിലെ റഫറന്‍സുകള്‍ കണ്ടെത്താനുണ്ടെന്നാണ് സോഷ്യല്‍ മീഡിയ പറയുന്നത്.