സിനിമയിലെ ഇന്റിമേറ്റ് രംഗങ്ങൾ ചിത്രീകരിക്കുമ്പോൾ സ്ത്രീകളേക്കാൾ കൂടുതൽ പരിഭ്രാന്തിയും സമ്മർദവും പലപ്പോഴും പുരുഷ അഭിനേതാക്കളിലാണ് താൻ ശ്രദ്ധിച്ചിട്ടുള്ളതെന്ന് നടി രാധിക ആപ്തെ. ഇത്തരം രംഗങ്ങളിൽ പുരുഷ താരങ്ങൾ പ്രകടിപ്പിക്കുന്ന നേര്വസ്നെസ്സ് അവരുടെ ദുർബലതയായി കാണേണ്ടതില്ലെന്നും, മറിച്ച് സാഹചര്യത്തിന്റെ ഗൗരവവും സഹതാരത്തോടുള്ള ബഹുമാനവും പ്രതിഫലിപ്പിക്കുന്നതാകാമെന്നും രാധിക പറഞ്ഞു
ഇന്റിമേറ്റ് രംഗങ്ങൾ ചിത്രീകരിക്കുന്നതിനിടെ പുരുഷ സഹതാരങ്ങൾ വളരെയധികം പതറുന്ന സാഹചര്യങ്ങൾ തനിക്ക് നേരിട്ടുണ്ടെന്നും രാധിക പറഞ്ഞു. ചില സന്ദർഭങ്ങളിൽ അവരുടെ ഹൃദയമിടിപ്പ് പോലും കേൾക്കാൻ കഴിയുന്നത്ര പരിഭ്രാന്തി പ്രകടമായിരുന്നുവെന്നും താരം വ്യക്തമാക്കി.
ഇന്റിമേറ്റ് രംഗങ്ങൾ അഭിനേതാക്കൾക്ക് കേവലം ഒരു അഭിനയസാഹചര്യം മാത്രമല്ല. ക്യാമറയ്ക്കും ക്രൂ അംഗങ്ങൾക്കും മുന്നിൽ മറ്റൊരു വ്യക്തിയുമായി വളരെ അടുത്ത് അഭിനയിക്കേണ്ടിവരുന്നതിനാൽ ഇത്തരം രംഗങ്ങളിൽ സ്വാഭാവികമായും സമ്മർദം ഉണ്ടാകാം. സ്വന്തം ശരീരഭാഷയും വികാരങ്ങളും നിയന്ത്രിക്കുന്നതിനൊപ്പം സഹതാരത്തിന്റെ കംഫര്ട്ട്, ബൗണ്ടറീസ് എന്നിവ കൂടി പരിഗണിക്കേണ്ടതുണ്ട്.
ഈ പശ്ചാത്തലത്തിലാണ് പുരുഷ അഭിനേതാക്കളുടെ നെര്വസ്നെസ്സിനെ ദുർബലതയായി കാണരുതെന്ന രാധികയുടെ അഭിപ്രായം ശ്രദ്ധേയമാകുന്നത്. ഒരു ഇന്റിമേറ്റ് രംഗം ചിത്രീകരിക്കുമ്പോൾ അതിന്റെ സെന്സിറ്റിവിറ്റി മനസ്സിലാക്കുന്നതും സഹതാരത്തിന്റെ അതിരുകളെ ബഹുമാനിക്കുന്നതും ഇത്തരം പരിഭ്രാന്തിക്ക് കാരണമാകാമെന്നാണ് താരത്തിന്റെ നിരീക്ഷണം.