വീണ്ടും മലയാളത്തിളക്കം; രാജ്യത്തെ തിരക്കഥാകൃത്തുക്കളുടെ ഫെസ്റ്റിലേക്ക് തിരഞ്ഞെടുക്കപ്പെട്ട് മൂന്ന് മലയാളം സിനിമകള്‍

രാജ്യത്തെ തിരക്കഥാകൃത്തുക്കളുടെ പ്രമുഖ സംഘടനയായ സ്ക്രീൻറൈറ്റേഴ്സ് അസോസിയേഷൻ ഓഫ് ഇന്ത്യ (SWA) സംഘടിപ്പിക്കുന്ന സ്ക്രിപ്റ്റ് ലാബ് ആൻഡ് പിച്ച് ഫെസ്റ്റിൽ മലയാളത്തിൽ നിന്നും മൂന്ന് തിരക്കഥകൾ. 

​ഇന്ത്യയിലുടനീളമുള്ള എഴുത്തുകാരിൽ നിന്നായി ലഭിച്ച 1,479 ഫീച്ചർ ഫിലിം തിരക്കഥകളിൽ നിന്ന് സ്ക്രീൻറൈറ്റേഴ്സ് അസോസിയേഷൻ (SWA) സംഘടിപ്പിക്കുന്ന 'സ്ക്രിപ്റ്റ് ലാബ് & പിച്ച് ഫെസ്റ്റ് 2026'-ലേക്കാണ് മലയാളത്തിൽ നിന്ന് മൂന്ന് തിരക്കഥകൾ തെരഞ്ഞെടുക്കപ്പെട്ടത്. ശക്തമായ മത്സരത്തിനൊടുവിൽ മലയാളത്തിന്റെ പേര് ദേശീയ തലത്തിൽ വീണ്ടും അടയാളപ്പെടുത്തിയിരിക്കുകയാണ് ഈ നേട്ടം.

​തെരഞ്ഞെടുക്കപ്പെട്ടവയിൽ രണ്ടെണ്ണം പൂർണ്ണമായും മലയാളത്തിലുള്ളതും, ഒരെണ്ണം ഹിന്ദി-മലയാളം ഭാഷകൾ ഉൾപ്പെടുന്ന ബഹുഭാഷാ തിരക്കഥയുമാണ്.

അക്ഷയ് മോഹനൻ, രാഹുൽ രാധാകൃഷ്ണൻ എന്നിവര്‍ ചേര്‍ന്ന് രചിച്ച ​പ്രവാഹം (Pravaaham), ഫൈസൽ സി.എസ് രചിച്ച ​ത്രീ സ്റ്റോൺസ് ആൻഡ് എ ജിൻ (Three Stones and a Djinn), അനൂപ് എബ്രഹാം പാറയ്ക്കൽ, അരസ്തു സാകിയ എന്നിവര്‍ രചിച്ച ഹിന്ദി-മലയാളം തിരക്കഥയായ ​ദോ രാഹേൻ - ദി റോഡ് ലെസ് ട്രാവൽഡ് (Do Rahein - The Road Less Travelled) എന്നിവയാണ് തിരഞ്ഞെടുക്കപ്പെട്ട മലയാളം തിരക്കഥകള്‍. 

​രാജ്യത്തെ മികച്ച തിരക്കഥാകൃത്തുക്കളും ചലച്ചിത്ര പ്രവർത്തകരും അണിനിരക്കുന്ന ഈ വേദിയിൽ തങ്ങളുടെ കഥകൾ അവതരിപ്പിക്കാനും വികസിപ്പിക്കാനുമുള്ള വലിയൊരു അവസരമാണ് ഈ എഴുത്തുകാർക്ക് ഇതിലൂടെ ലഭിച്ചിരിക്കുന്നത്. മലയാള സിനിമയുടെ ശക്തമായ എഴുത്തുശൈലിയ്ക്കും പുത്തൻ ആശയങ്ങൾക്കുമുള്ള അംഗീകാരമായി ഈ തെരഞ്ഞെടുപ്പ് വിലയിരുത്തപ്പെടുന്നു.