'കണ്ണുകള്‍ ഇറനണിയുന്നു; ഹൃദയം സന്തോഷത്താല്‍ നിറയുന്നു'; മകളുടെ വിവാഹ ചിത്രം പങ്കുവച്ച് ഖുശ്ബു

തെന്നിന്ത്യന്‍ താരം ഖുശ്ബുവിന്‍റെയും സംവിധായകന്‍ സി സുന്ദറിന്‍റെയും മൂത്തമകള്‍ അവന്തിക വിവാഹിതയായി. ശ്രാവണ്‍ ശ്രീനിവാസനാണ് വരന്‍. ഖുശ്ബു തന്നെയാണ് വിവാഹവാര്‍ത്തയും ചിത്രങ്ങളും സോഷ്യല്‍ മീഡിയയില്‍ ആരാധകര്‍ക്കായി പങ്കുവച്ചത്. 'ഈ നിമിഷത്തിൽ ഞങ്ങൾ തികച്ചും നിശ്ബ്ദരായിപ്പോകുകയാണ്, കാരണം ഞങ്ങൾ അനുഭവിക്കുന്ന വികാരങ്ങൾ പ്രകടിപ്പിക്കാൻ വാക്കുകൾ മതിയാകാതെ വരുന്നു' എന്നു തുടങ്ങുന്ന വൈകാരിക കുറിപ്പും ഖുശ്ബു ചിത്രത്തിനൊപ്പം പങ്കുവച്ചു. 

ഖുശ്ബു പങ്കുവച്ച കുറിപ്പിന്‍റെ പൂര്‍ണരൂപം

'ഈ നിമിഷത്തിൽ വാക്കുകൾ കിട്ടാതെ ഞങ്ങൾ ശരിക്കും നിശബ്ദരായിപ്പോയിരിക്കുന്നു. ഞങ്ങൾ അനുഭവിക്കുന്ന വികാരങ്ങൾ പ്രകടിപ്പിക്കാൻ വാക്കുകൾ മതിയാവുന്നില്ല. മാതാപിതാക്കൾ എന്ന നിലയിൽ, ഞങ്ങൾ വിലമതിക്കുന്ന എല്ലാ കാര്യങ്ങളുടെയും കേന്ദ്രം കുടുംബമാണ്. വിവാഹങ്ങൾ സ്വർഗത്തിൽ വെച്ച് തീരുമാനിക്കപ്പെടുന്നവയാണെന്ന് ഞങ്ങൾ എപ്പോഴും വിശ്വസിക്കുന്നു. അതിരറ്റ സന്തോഷത്തോടും കൃതജ്ഞതയോടും കൂടി, ഞങ്ങളുടെ പ്രിയപ്പെട്ട മകൾ അവന്തിക സുന്ദറും ശ്രീ ശ്രാവൺ ശ്രീനിവാസനും തമ്മിലുള്ള വിവാഹം 2026 ജൂൺ 25-ന് നടന്നുവെന്ന സന്തോഷവാർത്ത ഞങ്ങൾ, സുന്ദർ സി-യും ഖുശ്ബു സുന്ദറും, പങ്കുവെക്കുന്നു'.

'കുടുംബത്തിന്റെയും അടുത്ത സുഹൃത്തുക്കളുടെയും സ്നേഹത്താൽ ചുറ്റപ്പെട്ട, ഞങ്ങളുടെ ഹൃദയങ്ങളിൽ എന്നെന്നേക്കുമായി തങ്ങിനിൽക്കുന്ന ഒരു നിമിഷത്തിനാണ് ഞങ്ങൾ സാക്ഷ്യം വഹിച്ചത്. ഞങ്ങളെ പൊതിഞ്ഞ ഊഷ്മളതയും വാത്സല്യവും നല്ലവരായ ആളുകളുടെ സാന്നിധ്യവും ഈ നിമിഷത്തെ അവിസ്മരണീയമാക്കി. ഞങ്ങളുടെ കണ്ണുകൾ ഇപ്പോഴും ഈറനണിയുന്നു, ഞങ്ങളുടെ ഹൃദയങ്ങൾ സന്തോഷം കൊണ്ടും കൃതജ്ഞത കൊണ്ടും നിറഞ്ഞിരിക്കുന്നു. ദമ്പതികൾ ആഗ്രഹിച്ചതുപോലെ വളരെ ചെറുതും എന്നാൽ ഹൃദ്യവുമായ ഒരു ചടങ്ങായിരുന്നു അത്. അവരുടെ ആഗ്രഹങ്ങൾ നിറവേറ്റാൻ കഴിഞ്ഞതിൽ ഞങ്ങൾക്ക് അഭിമാനമുണ്ട്. ഏറ്റവും പ്രധാനപ്പെട്ട ആളുകളുമായി ചേർന്ന് നിശബ്ദമായി പങ്കുവെക്കുന്ന നിമിഷങ്ങളാണ് പലപ്പോഴും ഏറ്റവും മനോഹരമായിട്ടുള്ളത്'. 

'അവന്തികയും ശ്രാവണും തങ്ങളുടെ ജീവിതത്തിലെ ഈ മനോഹരമായ പുതിയ അധ്യായത്തിലേക്ക് കടക്കുമ്പോൾ, സന്തോഷവും കൂട്ടുകെട്ടും അനവധി മനോഹരമായ ഓർമ്മകളും നിറഞ്ഞ ഒരു ജീവിതത്തിനായി നിങ്ങളുടെ സ്നേഹവും ആശംസകളും മാത്രം ഞങ്ങൾ തേടുന്നു. അതിരറ്റ സ്നേഹത്തോടും അഭിമാനത്തോടും കൂടി, ഞങ്ങളുടെ പുതുതായി വിവാഹിതരായ ദമ്പതികളെ അവന്തികയെയും ശ്രാവണിനെയും ഞങ്ങൾ നിങ്ങൾക്ക് പരിചയപ്പെടുത്തുന്നു' ഖുശ്ബു കുറിച്ചു. അതേസമയം ഖുശ്ബുവിന്‍റെ പോസ്റ്റിനു താഴെ നവദമ്പതികള്‍ക്ക് ആശംസയറിച്ച് നിരവധി താരങ്ങളാണ് എത്തുന്നത്.