പെറ്റ് ഡിറ്റക്ടീവിന് കയ്യടിച്ച് പ്രേക്ഷകര്‍; ബോക്സ് ഓഫീസിലും ഗംഭീര തുടക്കം

ഷറഫുദീൻ പ്രൊഡക്ഷൻസിന്റെ ബാനറിൽ ഷറഫുദീൻ, ശ്രീ ഗോകുലം മൂവീസിന്‍റെ ബാനറിൽ ഗോകുലം ഗോപാലൻ എന്നിവർ ചേർന്ന് നിർമ്മിച്ച ചിത്രം പെറ്റ് ഡിറ്റക്ടീവ്  വമ്പൻ പ്രേക്ഷക പ്രീതി നേടി പ്രദർശനം തുടരുന്നു. ഷറഫുദീൻ, അനുപമ പരമേശ്വരൻ എന്നിവർ പ്രധാന വേഷങ്ങൾ ചെയ്യുന്ന ചിത്രം സംവിധാനം ചെയ്തത് പ്രനീഷ് വിജയനാണ്. ആദ്യ ഷോ മുതൽ മികച്ച പ്രതികരണം നേടിയ ചിത്രം ബോക്സ് ഓഫീസിലും ഗംഭീര പ്രകടനമാണ് കാഴ്ചവെക്കുന്നത്. ഓരോ ദിവസവും കളക്ഷൻ കൂടി കൂടി വരുന്ന ചിത്രം നേടിയത് ഷറഫുദീന്റെ കരിയറിലെ തന്നെ ഏറ്റവും മികച്ച ഓപ്പണിങ് ആണ്. ഇതിനോടകം നൂറിലധികം ഹൗസ്ഫുൾ ഷോകളാണ് ചിത്രം കേരളത്തിൽ കളിച്ചത്. കോ പ്രൊഡ്യൂസേഴ്സ് - ബൈജു ഗോപാലൻ, വി. സി. പ്രവീൺ, എക്സിക്യൂട്ടീവ് പ്രൊഡ്യൂസർ - കൃഷ്ണമൂർത്തി. ചിത്രം കേരളത്തിൽ വിതരണം ചെയ്തത് ഡ്രീം ബിഗ് ഫിലിംസ്.

പ്രേക്ഷകരെ ഏറെ രസിപ്പിക്കുന്ന ഒരു അഡ്വഞ്ചർ ഫൺ ഫാമിലി കോമഡി എൻ്റർടെയിനർ ആയാണ് ചിത്രം അവതരിപ്പിച്ചിരിക്കുന്നത്. ടോണി ജോസ് അലുല എന്ന ഡിറ്റക്റ്റീവ് കഥാപാത്രമായി ഷറഫുദീൻ വേഷമിട്ട ചിത്രത്തിന്റെ ഹൈലൈറ്റ് അതീവ രസകരമായ ഇൻവെസ്റ്റിഗേഷൻ രംഗങ്ങൾ ആണ്. സംവിധായകൻ പ്രനീഷ് വിജയനും ജയ് വിഷ്ണുവും ചേർന്നാണ് ചിത്രം രചിച്ചത്. ഷറഫുദീന്റെ ഡിറ്റക്റ്റീവ് കഥാപാത്രവും വിനയ് ഫോർട്ട് അവതരിപ്പിച്ച പോലീസ് ഓഫീസർ കഥാപാത്രവും സ്‌ക്രീനിൽ ഒരുമിച്ചെത്തുമ്പോൾ തീയേറ്ററുകൾ ചിരിയുടെ പൂരപ്പറമ്പുകളായി മാറുന്നുണ്ട്. 

രസകരമായ ഗാനങ്ങളും പശ്ചാത്തല സംഗീതവും ചിത്രത്തിന്റെ മികവുകളായി മാറി. രാജേഷ് മുരുകേശൻ ആണ് ചിത്രത്തിന് സംഗീത സംവിധാനം നിർവഹിച്ചത്. സമ്പൂർണ്ണ മൃഗാധിപത്യം എന്ന ടാഗ് ലൈനോടെ ആണ് ചിത്രം പ്രേക്ഷകരുടെ മുന്നിലെത്തിയത്. വിജയരാഘവൻ, രഞ്ജി പണിക്കർ, ജോമോൻ ജ്യോതിർ, വിനായകൻ, ഷോബി തിലകൻ, നിഷാന്ത് സാഗർ, ശ്യാം മോഹൻ, അൽതാഫ് സലിം എന്നിവരും ചിത്രത്തിൽ നിർണ്ണായക കഥാപാത്രങ്ങളെ അവതരിപ്പിച്ചിട്ടുണ്ട്. ഷറഫുദീൻ- ജോമോൻ ജ്യോതിർ കോംബോ വമ്പൻ കയ്യടി നേടുമ്പോൾ വിജയരാഘവനും വിനായകനും ഉൾപ്പെടെയുള്ളവരും പ്രേക്ഷകരെ പൊട്ടിചിരിപ്പിക്കുന്നുണ്ട്.