മൂലം നാളുകാരി ; മുക്കിലും മൂലയിലും സ്വര്‍ണം കൂട്ടിവച്ച് സ്വപ്നം സാക്ഷാത്കരിച്ചതിനെ കുറിച്ച് ഡിംപിള്‍ റോസ്

സിനിമ, സീരിയല്‍ മേഖലയിലൂടെ മലയാളികള്‍ക്ക് സുപരിചിതയായ താരമാണ് ഡിംപിള്‍ റോസ്. വിവാഹത്തോടെ അഭിനയ മേഖലയില്‍ നിന്നും വിട്ടുനിന്നെങ്കിലും പിന്നീട് യുട്യൂബ് ചാനലിലൂടെ സജീവമായ നടി തന്‍റെ കുടുംബ വിശേഷങ്ങളെല്ലാം ആരാധകരുമായി പങ്കുവച്ചിരുന്നു. ഇപ്പോഴിതാ, തന്‍റെ ജീവിതത്തില്‍ സംഭവിച്ച മറ്റൊരു സന്തോഷവാര്‍ത്ത പുതിയ വ്ലോഗിലൂടെ ആരാധകരെ അറിയിക്കുകയാണ് നടി. 

അടുത്ത മാസം 31ാം പിറന്നാളാഘോഷിക്കുമ്പോള്‍ ഒരു വീടിന്‍റെ ഉടമകൂടിയാകു്നു എന്നതാണ്   ഡിംപിളിന്‍റെ പുതിയ സന്തോഷം. തന്നെ ആ ലക്ഷ്യത്തിലേക്ക് എത്തിച്ച വരുമാന മാര്‍ഗത്തെപ്പറ്റിയും ഡിംപിള്‍ വിഡിയോയില്‍ പറയുന്നുണ്ട്. അനാവശ്യമായി പണം ചെലവാക്കാത്ത പിശുക്കത്തിയാണ് താനെന്നും എന്തു വാങ്ങുമ്പോഴും പത്തുവട്ടം ആലോചിച്ചതിനു ശേഷം അത്യാവശ്യമാണെന്ന് തോന്നിയാല്‍ മാത്രമേ എന്തെങ്കിലും വാങ്ങുകയുള്ളൂവെന്നും താരം പറയുന്നു. അങ്ങനെ കിട്ടുന്നതെല്ലാം കൂട്ടി കൂട്ടി വച്ചാണ് ഇന്നത്തെ സ്വപ്നത്തിലേക്ക് എത്തിയതെന്നും വരുമാന മാര്‍ഗം യുട്യൂബാണെന്നും ഡിംപിള്‍ വിഡിയോയില്‍ പറയുന്നു. 

ഒരുപാടാളുകള്‍ അന്വേഷിച്ചിട്ടുള്ള ഒരു വള കാണിച്ചാണ് തന്‍റെ സമ്പാദ്യശീലത്തെക്കുറിച്ച് താരം പറഞ്ഞത്. താരത്തിന്‍റെ വാക്കുകളിങ്ങനെ, ഒരു കാലത്തും ഞാന്‍ ഇത്രയും വലിയ വള ഇടില്ല. പക്ഷേ ഇതെനിക്ക് ഒരു ഇന്‍വെസ്റ്റ്‌മെന്റാണ്. ഇത്രയും കാലത്തെ ജീവിതത്തില്‍ എന്‍റെ ലക്ഷ്യങ്ങള്‍ പൂര്‍ത്തികരിക്കാന്‍ സാധിച്ചതൊക്കെ സ്വര്‍ണം കൊണ്ടാണ്. എന്‍റെ നാള് മൂലമാണ്. മൂലം നാളുള്ള പെണ്‍കുട്ടി മുക്കിലും മൂലയിലുമൊക്കെ സ്വര്‍ണം കൂട്ടിവെക്കുമെന്നാണ്.

ഈ പറഞ്ഞത് എന്‍റെ കാര്യത്തില്‍ ശരിയായിരുന്നു. എല്ലാ ആവശ്യത്തിനും എനിക്ക് സ്വര്‍ണം ഉപകാരമായി വന്നിട്ടുണ്ട്. മമ്മിയും മമ്മിയുടെ അമ്മയുമൊക്കെ ഇതുപോലെയായിരുന്നു. ഇത്തിരി രൂപ കിട്ടിയാലും സ്വര്‍ണം വാങ്ങിവയ്ക്കും.അത് കണ്ടാണ് ഞാന്‍ വളര്‍ന്നത്. കുഞ്ഞിലെ മുതല്‍ ഞാനും ജോലി ചെയ്യുന്നുണ്ട്. അങ്ങനെ എനിക്ക് കിട്ടിയ തുകയെല്ലാം സേവ് ചെയ്ത് സ്വര്‍ണം വാങ്ങി. കല്യാണവും ആശുപത്രി എമര്‍ജന്‍സിയ്ക്കുമൊക്കെ എനിക്ക് ആശ്വാസമായത് ഇതൊക്കെയാണ്. ഒരു മാസം ഒന്നേമുക്കാല്‍ ലക്ഷത്തോളം വരുമാനമുണ്ടായപ്പോള്‍  മിച്ചപിടിച്ച് വാങ്ങിയതാണ് ഈ സ്വര്‍ണം.  ഇന്ന് ഞാനത് വില്‍ക്കാന്‍ പോവുകയാണ്. മറ്റൊരു ലക്ഷ്യത്തിന് വേണ്ടിയാണ് ഞാന്‍ ഈ തീരുമാനം എടുത്തിരിക്കുന്നത്. കോണ്‍ഫിഡന്റ് ഗ്രൂപ്പിന്റെ ഫ്‌ളാറ്റാണ് ഡിംപിള്‍ വാങ്ങുന്നത്. 2028 ല്‍ പൂര്‍ത്തിയാവുകയുള്ളു. അതുവരെ തവണകളായിട്ടാണ് പണം അടക്കുന്നതെന്നും ഡിംപിള്‍ പറയുന്നു.