കലക്ഷന്‍ റെക്കോര്‍ഡുകള്‍ ഭേദിച്ച് തേരോട്ടം നടത്തുകയാണ് നിതേഷ് തിവാരിയുടെ രൺബീർ കപൂർ-സായി പല്ലവി ചിത്രമായ ‘രാമായണം’. ആറ് ദിവസങ്ങൾ പിന്നിടുമ്പോൾ, ഇന്ത്യയിൽ ചിത്രം 440.45 കോടി രൂപയുടെ നെറ്റ് കലക്ഷനും 526.50 കോടി രൂപയുടെ ഗ്രോസ് കലക്ഷനും സ്വന്തമാക്കി
അഞ്ചാം ദിവസം, 'പുഷ്പ 2'-നെ മറികടന്നുകൊണ്ട് ഹിന്ദിയിൽ ഒരു ദിവസം ഏറ്റവും കൂടുതൽ നെറ്റ് വരുമാനം നേടിയ ആദ്യ അഞ്ച് ചിത്രങ്ങളുടെ പട്ടികയിൽ 'രാമായണം' ഇടംപിടിച്ചു. ആറ് ദിവസങ്ങൾക്കുള്ളിൽ ഇന്ത്യയിൽ ഹിന്ദി പതിപ്പിലൂടെ ഏറ്റവും വേഗത്തില്‍ 300 കോടി രൂപ നേടുന്ന ചിത്രമെന്ന റെക്കോർഡും 'രാമായണ’ത്തിന് സ്വന്തമായി. രൺബീർ കപൂറിന്റെ 'അനിമൽ', ഷാരൂഖ് ഖാന്റെ തിരിച്ചുവരവ് ചിത്രമായ 'പഠാൻ' എന്നിവയെ മറികടന്നാണ് ഈ നേട്ടം. റിലീസ് ചെയ്ത് ആറ് ദിവസത്തിനുള്ളിൽ ഹിന്ദിയിൽ 306.58 കോടി രൂപ നേടിയ ഷാരൂഖ് ഖാന്റെ 'ജവാൻ' എന്ന ചിത്രത്തിനൊപ്പമെത്താനും ഇതോടെ 'രാമായണ'ത്തിന് സാധിച്ചു. ആറ് ദിവസങ്ങൾ പിന്നിടുമ്പോൾ 'രാമായണ'ത്തിന്റെ ഹിന്ദി നെറ്റ് കളക്ഷൻ 336 കോടി രൂപയാണ്. 'ധുരന്ധർ 2', 'പുഷ്പ 2' എന്നീ ചിത്രങ്ങൾ യഥാക്രമം മൂന്ന്, അഞ്ച് ദിവസങ്ങൾക്കുള്ളിൽ 300 കോടി രൂപയാണ് ഹിന്ദി പതിപ്പില്‍ നേടിയത്. ഈ പട്ടികയിൽ 'രാമായണ'വും ഇപ്പോള്‍ മുന്നിലുണ്ട്.
'സാക്‌നിൽക്' റിപ്പോർട്ട് പ്രകാരം ചൊവ്വാഴ്ച 24,344 ഷോകളിൽ നിന്നായി 'രാമായണം' 94.10 കോടി രൂപയാണ് നേടിയത്.ആറാം ദിവസം 35.00 കോടി രൂപ നേടിയതോടെ ചിത്രത്തിന്റെ ആകെ വിദേശ ഗ്രോസ് കലക്ഷൻ 297.00 കോടി രൂപയായി ഉയർന്നു. ഇതോടെ ചിത്രത്തിന്റെ ആഗോള ഗ്രോസ് കലക്ഷൻ 823.50 കോടി രൂപയിലെത്തി. കന്നഡയിൽ 931 ഷോകളിൽ നിന്ന് 7.75 കോടി രൂപയും തെലുങ്കിൽ 1,860 ഷോകളിൽ നിന്ന് 4 കോടി രൂപയും തമിഴിൽ 859 ഷോകളിൽ നിന്ന് 3.60 കോടി രൂപയും മലയാളത്തിൽ 849 ഷോകളിൽ നിന്ന് 2.75 കോടി രൂപയും ചിത്രത്തിന് ലഭിച്ചു. ഇന്ത്യയില്‍ 64.85 കോടി രൂപയുടെ കലക്ഷനോടെയാണ് ചിത്രം ബോക്സ് ഓഫീസ് പ്രകടനം ആരംഭിച്ചത്. വെള്ളിയാഴ്ച 48.05 കോടി രൂപയും ശനിയാഴ്ച ഇന്ത്യയിൽ നിന്ന് 69.80 കോടി രൂപയുടെ വരുമാനവും നേടിയ ചിത്രത്തിന് ഞായറാഴ്ച കലക്ഷനിൽ നേരിയ കുറവുണ്ടായിരുന്നു. തിങ്കളാഴ്ച ആയതോടെ 23,911 ഷോകളിലൂടെ ആഭ്യന്തര ബോക്സ് ഓഫീസിൽ ചിത്രം 107.50 കോടി രൂപ നേടി 'സെഞ്ച്വറി' പൂർത്തിയാക്കി.
4,000 കോടി രൂപ ബജറ്റിൽ ഒരുങ്ങിയ 'രാമായണം', ഇന്ത്യൻ സിനിമ കണ്ടിട്ടുള്ളതിൽ വെച്ച് ഏറ്റവും വലിയ സ്വപ്നപദ്ധതിയായി വിശേഷിപ്പിക്കപ്പെടുന്നു. ലോകമെമ്പാടും ഈ ചിത്രത്തിന് വിപുലമായ പ്രചാരണമാണ് നൽകിയത്. ഒക്ടോബർ 27-ന് ലോസ് ഏഞ്ചൽസിൽ ചിത്രത്തിന്റെ ഒരു പ്രത്യേക പ്രദർശനം അണിയറപ്രവർത്തകർ സംഘടിപ്പിച്ചിരുന്നു.