നെട്ടയത്ത് ബിജെപി പ്രവർത്തകരും നാട്ടുകാരും തമ്മിൽ സംഘർഷം; പൊലീസിന് മർദനം

തിരുവനന്തപുരം നെട്ടയം മലമുകളിൽ ഞായറാഴ്ച വൈകിട്ടോടെ ബിജെപി പ്രവർത്തകരും നാട്ടുകാരും തമ്മിൽ ഉണ്ടായ ഏറ്റുമുട്ടലിൽ പൊലീസുകാർക്ക് മർദനമേറ്റു. സംഘർഷത്തെത്തുടർന്ന് മേഖലയിൽ അതീവ ജാഗ്രത പ്രഖ്യാപിച്ചു. പൊലീസിന്റേത് ഏകപക്ഷീയമായ നടപടിയാണെന്ന് ആരോപിച്ച് ബിജെപി-ആർഎസ്എസ് പ്രവർത്തകർ വട്ടിയൂർക്കാവ് പൊലീസ് സ്റ്റേഷനിലേക്ക് പ്രതിഷേധ മാർച്ച് നടത്തി.

വൈകിട്ട് ഏഴ് മണിയോടെയാണ് മലമുകളിൽ സംഘർഷമുണ്ടായത്. പ്രദേശത്ത് ഒരു യുവതിയെ ശല്യം ചെയ്തത് ചോദ്യം ചെയ്ത ഭർത്താവിനെ ഒരു സംഘം മർദിച്ചതാണ് പ്രശ്നങ്ങൾക്ക് തുടക്കമിട്ടത്. മർദിച്ചവർ ബിജെപി പ്രവർത്തകരാണെന്നാരോപിച്ച് നാട്ടുകാർ രംഗത്തെത്തിയതോടെ ഇരുവിഭാഗവും തമ്മിൽ വലിയ തോതിൽ വാഗ്വാദവും കൈയാങ്കളിയും ഉണ്ടായി.

സ്ഥലത്തെത്തിയ വട്ടിയൂർക്കാവ് പൊലീസ് ഇരുവിഭാഗത്തെയും പിരിച്ചുവിടാൻ ശ്രമിക്കുന്നതിനിടെയാണ് പൊലീസുകാർക്ക് നേരെ മർദനമുണ്ടായത്. നാട്ടുകാരും ബിജെപി പ്രവർത്തകരും തമ്മിലുള്ള പ്രശ്നം പിന്നീട് രാഷ്ട്രീയ സംഘർഷമായി മാറുകയായിരുന്നു. നിലവിൽ സിപിഎം-ബിജെപി പ്രവർത്തകർ തമ്മിലുള്ള ഏറ്റുമുട്ടലായി ഇത് പരിണമിച്ചു.

കാരണമില്ലാതെ പൊലീസ് തങ്ങളുടെ പ്രവർത്തകരെ ക്രൂരമായി മർദിച്ചുവെന്ന് ബിജെപി നേതൃത്വം ആരോപിച്ചു. സിപിഎം നിർദ്ദേശപ്രകാരമാണ് പൊലീസ് ആർഎസ്എസ്-ബിജെപി പ്രവർത്തകർക്ക് നേരെ 'നരനായാട്ട്' നടത്തിയതെന്ന് നേതാക്കൾ ആരോപിക്കുന്നു.

ഇതിൽ പ്രതിഷേധിച്ചു രാത്രി വൈകിയും വട്ടിയൂർക്കാവ് പൊലീസ് സ്റ്റേഷനിലേക്ക് ബിജെപി പ്രവർത്തകർ മാർച്ച് നടത്തി. സ്റ്റേഷൻ കവാടത്തിന് മുന്നിൽ പൊലീസ് മാർച്ച് തടഞ്ഞത് നേരിയ സംഘർഷത്തിന് കാരണമായി.

സംഘർഷ സാധ്യത കണക്കിലെടുത്ത് നെട്ടയം മലമുകളിലും വട്ടിയൂർക്കാവ് സ്റ്റേഷൻ പരിസരത്തും വൻ പൊലീസ് സന്നാഹം ക്യാംപ് ചെയ്യുന്നുണ്ട്. രാഷ്ട്രീയമായ ചേരിതിരിവ് ക്രമസമാധാന പ്രശ്നങ്ങളിലേക്ക് നീങ്ങാതിരിക്കാൻ സിറ്റി പൊലീസ് കമ്മീഷണറുടെ നേതൃത്വത്തിൽ സ്ഥിതിഗതികൾ നിരീക്ഷിച്ചു വരികയാണ്.