സൈബർ തട്ടിപ്പുകൾ പുതിയ കാര്യമല്ല. ബാങ്ക് ഉദ്യോഗസ്ഥനെന്ന വ്യാജേന വിളിക്കുക, സമ്മാനം ലഭിച്ചെന്ന് സന്ദേശം അയക്കുക, വ്യാജ ലിങ്കുകളിലൂടെ വ്യക്തിഗത വിവരങ്ങൾ ചോർത്തുക തുടങ്ങിയ രീതികൾ വർഷങ്ങളായി നിലവിലുണ്ട്.എന്നാൽ AI വന്നതോടെ ഈ തട്ടിപ്പുകൾക്ക് പുതിയൊരു രൂപം കൈവന്നിരിക്കുകയാണ്. പരിചയമുള്ള ഒരാളുടെ ശബ്ദത്തിൽ ഫോൺ വരാം, വിശ്വസിക്കുന്ന ഒരാളുടെ മുഖവുമായി വീഡിയോ കോളെത്താം. ആപ്പുകള് ഉപയോഗിച്ചുള്ള തട്ടിപ്പും വ്യാപകമാവുകയാണ്. AI ഉപയോഗിച്ചുള്ള സൈബർ തട്ടിപ്പുകളിൽ ഏറ്റവും വലിയ ആശങ്കകളിലൊന്നാണ് ഡീപ്ഫേക്ക് സാങ്കേതികവിദ്യ.
AI ഉപയോഗിച്ചുള്ള സൈബർ കുറ്റകൃത്യങ്ങൾ ലോകമെമ്പാടും ആശങ്ക ഉയർത്തുകയാണ്. 2026 ഓഗസ്റ്റിൽ ഇന്റർപോൾ പുറത്തുവിട്ട റിപ്പോർട്ട് പ്രകാരം ആഫ്രിക്കയിൽ റിപ്പോർട്ട് ചെയ്യപ്പെട്ട സൈബർ കുറ്റകൃത്യങ്ങളിൽ 55 ശതമാനത്തിലും AIയുടെ സഹായം ഉൾപ്പെട്ടിട്ടുണ്ട്. ഇന്ത്യയിലും സാഹചര്യം ഗൗരവമുള്ളതാണ്. കേന്ദ്ര ആഭ്യന്തര മന്ത്രാലയത്തിന്റെ കണക്കനുസരിച്ച് 2023–24 മുതൽ 2025–26 വരെയുള്ള മൂന്ന് സാമ്പത്തിക വർഷങ്ങളിൽ രാജ്യത്ത് 53 ലക്ഷത്തിലധികം സൈബർ തട്ടിപ്പ് പരാതികളാണ് റജിസ്റ്റർ ചെയ്തത്. പരാതികളിൽ റിപ്പോർട്ട് ചെയ്യപ്പെട്ട തുക 56,000 കോടി രൂപയിലധികമാണ്.
2026 നവംബറിൽ ഇന്ത്യയിലെ ബാങ്കുകൾക്കും ധനകാര്യ സ്ഥാപനങ്ങൾക്കും AI അധിഷ്ഠിത സൈബർ ആക്രമണങ്ങളെക്കുറിച്ച് ഇന്ത്യൻ സൈബർ ക്രൈം കോർഡിനേഷൻ സെന്റർ മുന്നറിയിപ്പ് നൽകിയിരുന്നു..ബാങ്കുകളും ഫിൻടെക് സ്ഥാപനങ്ങളും സുരക്ഷാ പരിശോധനയും സംശയാസ്പദ ഇടപാടുകളുടെ നിരീക്ഷണവും ശക്തിപ്പെടുത്തണമെന്നും നിർദേശിച്ചിട്ടുണ്ട്.
സൈബർ തട്ടിപ്പുകൾ വർധിക്കുന്ന സാഹചര്യത്തിൽ സാധാരണക്കാർ ശ്രദ്ധിക്കേണ്ട പ്രധാന കാര്യങ്ങൾ:
1. ശബ്ദവും മുഖവും മാത്രം വിശ്വസിക്കരുത്: പരിചയമുള്ള വ്യക്തിയുടെ ശബ്ദത്തിലോ മുഖത്തിലോ വീഡിയോ കോളോ ഫോൺ കോളോ വന്നാലും പണം ആവശ്യപ്പെട്ടാൽ മറ്റൊരു മാർഗത്തിലൂടെ സ്ഥിരീകരിക്കുക. സ്ഥിരീകരിച്ച ശേഷം മാത്രം പണം നല്കുക
2. OTP, PIN, പാസ്വേഡ് പങ്കുവെക്കരുത്: ബാങ്ക് ഉദ്യോഗസ്ഥരെന്നോ പൊലീസ് ഉദ്യോഗസ്ഥരെന്നോ പറഞ്ഞ് വിളിച്ചാലും രഹസ്യ വിവരങ്ങൾ കൈമാറരുത്. OTP, PIN, പാസ്വേഡ് എന്നിവ രഹസ്യമായി തന്നെ സൂക്ഷിക്കുക
3. സംശയാസ്പദമായ ലിങ്കുകൾ തുറക്കരുത്: ബാങ്കുകളിൽ നിന്നോ സർക്കാർ സ്ഥാപനങ്ങളിൽ നിന്നോ എന്ന പേരിൽ ലഭിക്കുന്ന സന്ദേശങ്ങളിലെ ലിങ്കുകൾ പരിശോധിക്കാതെ ക്ലിക്ക് ചെയ്യരുത്. ആപ്പുകള് ഇന്സ്റ്റാള് ചെയ്യാനെന്ന പേരില് ലഭിക്കുന്ന ലിങ്കുകളും തുറക്കാതിരിക്കുക
4. വ്യാജ വീഡിയോ കോളുകളിൽ ജാഗ്രത പാലിക്കുക: AI ഉപയോഗിച്ച് സൃഷ്ടിച്ച ഡീപ്ഫേക്ക് വീഡിയോകൾ തിരിച്ചറിയാൻ ബുദ്ധിമുട്ടായേക്കാം. അതിനാൽ വീഡിയോയിൽ കാണുന്ന വ്യക്തിയെ മാത്രം ആശ്രയിച്ച് സാമ്പത്തിക ഇടപാടുകൾ നടത്തരുത്.
5. അടിയന്തരമായി പണം ആവശ്യപ്പെട്ടാൽ സംശയിക്കുക: അപകടം സംഭവിച്ചെന്നോ അക്കൗണ്ട് ബ്ലോക്ക് ചെയ്യുമെന്നോ പറഞ്ഞ് ഉടൻ പണം അയക്കാൻ ആവശ്യപ്പെടുന്നത് തട്ടിപ്പിന്റെ സൂചനയാകാം.
6. ടു ഫാക്ടർ ഓതന്റിക്കേഷൻ ഉപയോഗിക്കുക: ബാങ്കിങ്, ഇമെയിൽ, സോഷ്യൽ മീഡിയ അക്കൗണ്ടുകൾക്ക് അധിക സുരക്ഷ ഏർപ്പെടുത്തുക.
7. തട്ടിപ്പിന് ഇരയായാൽ ഉടൻ പരാതിപ്പെടുക: ഇന്ത്യയിലെ സൈബർ ക്രൈം ഹെൽപ്ലൈനായ 1930 എന്ന നമ്പറിൽ വിളിക്കുകയോ [cybercrime.gov.in] വഴി പരാതി നൽകുകയോ ചെയ്യുക. ബാങ്കിനെയും ഉടൻ അറിയിക്കുക.
ഒരാളുടെ മുഖവും ശബ്ദവും വരെ കൃത്രിമമായി സൃഷ്ടിക്കാൻ AIക്ക് കഴിയുന്ന കാലത്ത് കണ്ണുകൊണ്ട് കാണുന്നതും ചെവികൊണ്ട് കേൾക്കുന്നതും മാത്രം വിശ്വസിക്കാനാകില്ല. ഒരു ഫോൺ കോൾ, ഒരു സന്ദേശം, ഒരു ചെറിയ അശ്രദ്ധ — ജീവിതകാലത്തെ സമ്പാദ്യം പോലും നഷ്ടപ്പെടാൻ കാരണമായേക്കാം. അതുകൊണ്ട് സംശയാസ്പദമായ ഓരോ കോളും ഓരോ സന്ദേശവും പരിശോധിച്ച് ഉറപ്പുവരുത്തുക.കാരണം, തട്ടിപ്പുകളെ പ്രതിരോധിക്കാനുള്ള ഏറ്റവും വലിയ ആയുധം നമ്മുടെ ജാഗ്രത തന്നെയാണ്.