സൂര്യനും കൃത്രിമമോ ? ചൈനയുടെ അടുത്ത പരീക്ഷണം; സൂര്യന് പകരക്കാരന്‍

സൂര്യനിൽ നടക്കുന്ന ന്യൂക്ലിയർ ഫ്യൂഷൻ പ്രക്രിയ ഭൂമിയിൽ പുനഃസൃഷ്ടിക്കാനുള്ള ശ്രമങ്ങൾക്ക് ശക്തിപകരാൻ ഇതാ ചൈന റെഡിയാണ്. ‘കൃത്രിമ സൂര്യൻ’ എന്നറിയപ്പെടുന്ന ഫ്യൂഷൻ റിയാക്ടറിനായി 5,820 ടൺ ഭാരമുള്ള കൂറ്റൻ കാന്തിക സംവിധാനം ഒരുക്കി കഴിഞ്ഞു.

റിയാക്ടറിനുള്ളിൽ 100 മില്യൺ ഡിഗ്രി സെൽഷ്യസിലേറെ താപനിലയിലെത്തുന്ന അത്യുച്ചതാപ പ്ലാസ്മയെ നിയന്ത്രിക്കുകയാണ് സംവിധാനത്തിന്റെ പ്രധാന ലക്ഷ്യം. ഇത്രയും ഉയർന്ന താപനിലയിലുള്ള പ്ലാസ്മ റിയാക്ടറിന്റെ ചുവരുകളിൽ നേരിട്ട് സ്പർശിക്കാതിരിക്കാൻ ശക്തമായ കാന്തിക മണ്ഡലം ഉപയോഗിക്കും.

സൂര്യനിൽ ഹൈഡ്രജൻ ന്യൂക്ലിയസുകൾ സംയോജിച്ച് വൻതോതിൽ ഊർജം പുറത്തുവിടുന്ന പ്രക്രിയയാണ് ന്യൂക്ലിയർ ഫ്യൂഷൻ. ഇതേ പ്രക്രിയ നിയന്ത്രിതമായി ഭൂമിയിൽ സാധ്യമാക്കുകയാണ് ഫ്യൂഷൻ ഗവേഷണത്തിന്റെ പ്രധാന ലക്ഷ്യം. ഫ്യൂഷൻ സാങ്കേതികവിദ്യ വാണിജ്യാടിസ്ഥാനത്തിൽ വിജയകരമാക്കാൻ കഴിഞ്ഞാൽ, ഭാവിയിൽ കുറഞ്ഞ കാർബൺ പുറന്തള്ളലുള്ള ശുദ്ധമായ വൈദ്യുതി ഉൽപ്പാദിപ്പിക്കുന്നതിനുള്ള പ്രധാന ഊർജസ്രോതസ്സായി ഇത് മാറുമെന്നാണ് പ്രതീക്ഷ.

അത്യുച്ചതാപനിലയിലുള്ള പ്ലാസ്മയെ സ്ഥിരതയോടെ നിയന്ത്രിക്കുകയും റിയാക്ടറിന്റെ ചുവരുകളുമായി സമ്പർക്കം ഒഴിവാക്കുകയും ചെയ്യുന്നത് ഫ്യൂഷൻ ഗവേഷണത്തിലെ ഏറ്റവും വലിയ സാങ്കേതിക വെല്ലുവിളികളിലൊന്നാണ്. ഈ വെല്ലുവിളി മറികടക്കുന്നതിൽ ശക്തമായ കാന്തിക സംവിധാനങ്ങൾക്ക് നിർണായക പങ്കുണ്ട്. ഫ്യൂഷൻ ഊർജ ഗവേഷണത്തിൽ ചൈന നടത്തുന്ന വൻതോതിലുള്ള നിക്ഷേപങ്ങളുടെയും സാങ്കേതിക വികസനത്തിന്റെയും ഭാഗമായാണ് ഈ കൂറ്റൻ കാന്തിക സംവിധാനം ഒരുക്കുന്നത്. ഭാവിയിലെ ശുദ്ധ ഊർജ സാങ്കേതികവിദ്യയിലേയ്ക്കുള്ള ചൈനയുടെ നിർണായക ചുവടുവയ്പ്പായാണ് പദ്ധതിയെ വിലയിരുത്തുന്നത്.