ഡിജിറ്റൽ സേവനങ്ങളുടെ വികസനം; ഫീച്ചര്‍ ഫോണുകളുടെ ഉപയോഗം കുത്തനെ ഇടിയുന്നു

മിക്കയാളുകളും ഒരു കാലത്ത് വ്യാപകമായി ഉപയോഗിച്ചിരുന്ന ഒന്നാണ് കീപാഡ് ഫോണ്‍ അല്ലെങ്കില്‍ ഫീച്ചര്‍ഫോണ്‍. എന്നാല്‍ ഇപ്പോള്‍ 2G നെറ്റ്‌വർക്കുകളുടെ ഘട്ടം ഘട്ടമായുള്ള അടച്ചുപൂട്ടൽ,10,000-ത്തിൽ താഴെയുള്ള 4G, 5G സ്മാർട്ട്‌ഫോണുകളുടെ വ്യാപകമായ ലഭ്യത എന്നിവ കാരണം ഫീച്ചർ ഫോണുകളുടെ രണ്ട് വിഭാഗങ്ങളായ 2G, 4G എന്നിവ സമീപ കാലങ്ങളില്‍ വലിയ പ്രശ്നങ്ങള്‍ നേരിടുകയാണ്.

അടുത്ത രണ്ട് വർഷത്തിനുള്ളിൽ, സ്മാർട്ട്‌ഫോൺ വില കുറയുന്നത് തുടരുകയും ഡിജിറ്റൽ സേവനങ്ങൾ വികസിക്കുകയും ചെയ്യുന്നതിനാൽ ഫീച്ചർ ഫോൺ ഉപയോഗം വീണ്ടും കുറയാനാണ് സാധ്യത.

ഡിസംബറിലെ  സിഎംആർ റിപ്പോർട്ട് അനുസരിച്ച്, 2 ജി ഫീച്ചർ ഫോൺ ഉപയോഗം വർഷം തോറും 22% കുറഞ്ഞു. ഐടെൽ, ലാവ, എച്ച്എംഡി, കാർബൺ, സെല്ലെക്കോർ എന്നിവയുൾപ്പെടെ എല്ലാ ഫീച്ചർ ഫോൺ നിർമ്മാതാക്കളുടെയും വിൽപ്പനയിൽ കുത്തനെ ഇടിവ് നേരിട്ടു. എന്നാല്‍ കീപാഡ് ഫോണില്‍ തന്നെ 4ജി മോഡല്‍ ഇറങ്ങിയപ്പോള്‍ 2023 ൽ ഫീച്ചർ ഫോൺ ഉപയോഗത്തിൽ 52% വർധനവുണ്ടായതായി ഗവേഷണ ഏജൻസി നേരത്തെ പറഞ്ഞിരുന്നു.

ജിയോ 1,000 രൂപയിൽ താഴെ വിലയുള്ള ജിയോഭാരത് 4G കീപാഡ് ഫോൺ പുറത്തിറക്കിയതിന്റെ പശ്ചാത്തലത്തിലായിരുന്നു ഇത്. എന്നാല്‍ 2024 ആയപ്പോഴേക്കും ജിയോയുടെ വില്‍പ്പനയിലും പ്രതിസന്ധി നേരിട്ടിരുന്നു.

ഫീച്ചർ ഫോണുകളിൽ നിന്നുള്ള വരുമാനം കുറഞ്ഞതോടെ റിലയൻസ് ജിയോ, ഭാരതി എയർടെൽ, വോഡഫോൺ ഐഡിയ എന്നീ കമ്പനികൾ 250 ദശലക്ഷം 2G ഉപയോക്താക്കളെ 4G നെറ്റ്‌വർക്കുകളിലേക്ക് അല്ലെങ്കിൽ 5G യിലേക്ക് പോലും  മാറ്റാനുള്ള ശ്രമത്തിലാണ്. ഓരോ ഉപയോക്താവിൽ നിന്നും വരുമാനം വർദ്ധിപ്പിക്കുക എന്ന ലക്ഷ്യത്തോടെയാണിത്.

എയർടെല്ലിന്റെ സാമ്പത്തിക റിപ്പോർട്ട് പ്രകാരം  ഗുജറാത്ത്, മഹാരാഷ്ട്ര, കേരളം, ഡൽഹി തുടങ്ങിയ പ്രധാന വിപണികളായ ഇടങ്ങളില്‍ നിന്നും  വരുമാനത്തിൽ കുറവ് രേഖപ്പെടുത്തിയിട്ടുണ്ട്. യുപിഐ സേവനങ്ങഉടെ ഉപയോഗവും ആളുകളെ ഫീച്ചര്‍ഫോണ്‍ ഉപേക്ഷിക്കാന്‍ പ്രേരിപ്പിക്കുന്നുണ്ട്