വിമാനത്താവളത്തില്‍ ബാഗേജ് നഷ്ടപ്പെട്ടോ?; തല്‍സമയം ട്രാക്ക് ചെയ്യാന്‍ സഹായിക്കും ഗൂഗിളിന്‍റെ പുതിയ ഫീച്ചര്‍

വിമാനത്താവളത്തിൽ ലഗേജ് നഷ്ടപ്പെടുന്നത് അത്ര അപൂര്‍വ കാര്യമല്ല. പലയാത്രക്കാര്‍ക്കും  ഇത്തരമൊരവസ്ഥ നേരിടേണ്ടി വന്നിട്ടുണ്ടാകാം. ഇത് അനാവശ്യ സമ്മര്‍ദത്തിനും കാരണമായേക്കാം. ഈ പ്രശ്നത്തിനൊരു പരിഹാരമാവുകയാണ്  ഗൂഗിളിന്‍റെ പുതിയ ഫീച്ചര്‍. യാത്രക്കാർക്ക് നഷ്ടപ്പെട്ട ബാഗുകളുടെ സ്ഥാനം ലൈവായി എയര്‍ലൈനുകള്‍ക്ക് നേരിട്ട് പങ്കിടാന്‍ അനുവദിക്കുന്ന ഒരു പുതിയ ഫൈന്‍ഡ് ഹബ് ഫീച്ചര്‍ ഗൂഗിള്‍ അവതരിപ്പിച്ചു. 

ബിസിനസ് ടുഡേയുടെ റിപ്പോർട്ട് പ്രകാരം ടർക്കിഷ് എയർലൈൻസില്‍  ഈ സംവിധാനം ഇതിനകം പ്രവര്‍ത്തന സജ്ജമായിട്ടുണ്ട്.  ബാഗേജ് ട്രാക്കിംഗ് പ്രക്രിയയുടെ ഭാഗമായി അവര്‍  ഈ രീതി സ്വീകരിച്ചുകഴിഞ്ഞു.  ലഗേജുകള്‍ കണ്ടെത്തുന്നതിനുള്ള ഒരൊറ്റ പ്ലാറ്റ്‌ഫോം നിർമ്മിക്കാനുള്ള ഗൂഗിളിന്റെ വിശാലമായ ശ്രമത്തിന്റെ ഭാഗമാണ് പുതിയ ഫീച്ചര്‍. ബാഗുകൾ കാണാതാകുമ്പോൾ വീണ്ടെടുക്കൽ വേഗത്തിലാക്കാനുള്ള വഴികൾ എയർലൈനുകൾ തേടുന്നതിനാൽ തന്നെ പുതിയ യാത്രാ ആപ്ലിക്കേഷൻ അതിവേഗം ശ്രദ്ധ നേടുന്നുണ്ട്. 

ചെക്ക്-ഇൻ ചെയ്ത ബാഗുകൾ എത്തിക്കുന്ന, ബാഗേജ് കറൗസലിൽ എത്തി നിൽക്കുമ്പോൾ തന്നെ യാത്രക്കാർക്ക് ഉപയോഗിക്കാൻ കഴിയുന്നത്ര ലളിതമായ രീതിയിലാണ് ഗൂഗിള്‍ പുതിയ ഫീച്ചര്‍ രൂപകല്‍പന ചെയ്തിട്ടുള്ളത്. യാത്രക്കാര്‍ അവരുടെ ലഗേജിൽ ഒരു ഫൈൻഡ് ഹബ്-അനുയോജ്യമായ ട്രാക്കർ അല്ലെങ്കിൽ ആക്‌സസറി ഘടിപ്പിച്ചിരിക്കണം. ബാഗ് എത്തിയിട്ടില്ലെന്ന് മനസ്സിലാക്കിയാൽ, മിനിറ്റുകൾക്കുള്ളിൽ ഇതിലൂടെ വിവരങ്ങൾ പങ്കിടാൻ കഴിയും. ആപ്പ് തുറന്ന് നഷ്ടപ്പെട്ട ഇനം തിരഞ്ഞെടുക്കുക, ബാഗിന്‍റെ തത്സമയ സ്ഥാനം കാണിക്കുന്ന സുരക്ഷിത URL സൃഷ്ടിക്കാൻ ലൊക്കേഷൻ പങ്കിടുക, എയർലൈനിന്‍റെ ആപ്പിലോ വെബ്‌സൈറ്റിലോ ഉള്ള ബാഗേജ് ക്ലെയിം ഫോമിൽ ലിങ്ക് പേസ്റ്റ് ചെയ്യുക, അപ്‌ഡേറ്റ് ചെയ്‌ത ലൊക്കേഷൻ വിശദാംശങ്ങൾ കാണുന്നതിന് ജീവനക്കാരെ ലിങ്ക് ഉപയോഗിക്കാൻ അനുവദിക്കുക എന്നിവയെല്ലാം ഫൈൻഡ് ഹബ് ആപ്പിനുള്ളിൽ യാത്രക്കാർക്ക് ചെയ്യാൻ കഴിയും.

അതേസമയം യാത്രക്കാരുടെ സ്വകാര്യത കൂടി കണക്കിലെടുത്താണ് ഫീച്ചര്‍ രൂപകല്‍പ്പന ചെയ്തിരിക്കുന്നത് എന്നതിനാല്‍ തന്നെ ഉപയോക്താക്കള്‍ക്ക് എപ്പോള്‍ വേണമെങ്കിലും ആപ്പിലൂടെ വിവരം പങ്കിടുന്നത്  നിര്‍ത്താം. 7 ദിവസത്തിനുശേഷം ലിങ്കുകള്‍ സ്വാഭാവികമായി തന്നെ കാലഹരണപ്പെടും. ബാഗേജ് കണ്ടെത്തുന്ന നിമിഷം തന്നെ ഫീച്ചര്‍ സ്വിച്ച് ഓഫ് ആവുകയും ചെയ്യും. യാത്രക്കാർക്ക് അവരുടെ വിവരങ്ങൾ ആരാണ് കാണേണ്ടതെന്നും എത്ര സമയത്തേക്ക് കാണണമെന്നും തീരുമാനിക്കാന്‍ അവകാമുണ്ടെന്നതാണ് ഇതിന്‍റെ പ്രത്യേകത. പുതിയ ഗൂഗിള്‍ ഫീച്ചര്‍ പ്രവര്‍ത്തനസജ്ജമായതോടെ ഫൈൻഡ് ഹബ്ബിനെ  ബാഗേജ് സിസ്റ്റങ്ങളിൽ സംയോജിപ്പിക്കുന്നതിനായി ഗൂഗിൾ പത്തിലധികം അന്താരാഷ്ട്ര കാരിയറുകളുമായി ഇതിനോടകം കരാറില്‍ ഏർപ്പെട്ടുകഴിഞ്ഞു. റിപ്പോർട്ടുകൾ പ്രകാരം, ടർക്കിഷ് എയർലൈൻസ്, എയര്‍ ഇന്ത്യ, എ ജെറ്റ്, ചൈന എയര്‍ലൈന്‍സ്, ലുഫ്താൻസ ഗ്രൂപ്പ് കാരിയറുകൾ, സൗദിയ, സ്കാൻഡിനേവിയൻ എയർലൈൻസ് എന്നിവരാണ്  ഗൂഗിളുമായി സഹകരിക്കുന്ന ആദ്യ പട്ടികയിലുള്ളത്. കൂടുതൽ എയർലൈനുകൾ ഉടൻ ഇതിന്‍റെ ഭാഗമാകുമെന്നാണ് പ്രതീക്ഷിക്കുന്നത്.

ബാഗേജുകള്‍ കണ്ടെത്തുന്നതില്‍ യാത്രക്കാര്‍ക്കുള്ള അനിശ്ചിതത്വം കുറയ്ക്കുന്നു എന്നതും തിരക്കേറിയ ഹബുകളിലെ തിരയല്‍ വേഗത്തിലാക്കുന്നു എന്നതുമാണ് പുതിയ ഫീച്ചറിന്‍റെ പ്രത്യേകത. പതിവായി പറക്കുന്നവര്‍ക്ക് വിവരങ്ങള്‍ക്കായി കാത്തിരിക്കുന്ന ദിവസങ്ങളുടെ ദൈര്‍ഘ്യം കുറയ്ക്കാനും എയര്‍ലൈനുകളുമായി കൂടുതല്‍ സജീവമായ ആശയവിനിമയം നടത്താനും ഗൂഗിളിന്‍റെ ഫീച്ചര്‍ സഹായകമാണ്.