മ്യാവൂ ലാൻഡിലെ കുഞ്ഞു റാണി; ഇൻസ്റ്റഗ്രാം ലോകത്തെ കീഴടക്കി ‘ക്യാറ്റ് നൈറ്റ്’

ശരീരം മൂടിയ ലോഹ കവചം... ഊരിപ്പിടിച്ച പടവാള്‍... ആഞ്ഞുവീശുന്ന കാറ്റിലും പതറാത്ത ഭയമേതുമില്ലാത്ത മുഖം! തലയിലെ രോമങ്ങൾ ചേർത്തുകെട്ടിയ പിങ്ക് റിബൺ... അവൾ മ്യാവൂ ലാൻഡിലെ കുഞ്ഞു റാണി. അവൾക്ക് സൗഹൃദങ്ങളുണ്ട്, സ്നേഹിക്കുന്നവരുണ്ട്. അവളൊരു ക്യൂട്ടി ആണ്. പക്ഷേ ആവശ്യം വന്നാൽ... ഡ്രാഗണുകളെയും ഭീമൻ സൈന്യങ്ങളെയും നേരിടാൻ അവൾ തയ്യാറാണ്! വെറും അരയടി വലിപ്പം! അതിരില്ലാത്ത ധൈര്യം. ഇതാണ് ഇപ്പോൾ ഇൻസ്റ്റഗ്രാം ലോകത്തെ കീഴടക്കുന്ന ‘ക്യാറ്റ് നൈറ്റ്’. 

ഈ കുഞ്ഞൻ പോരാളി എവിടെ നിന്നെത്തി? 

കഥ തുടങ്ങുന്നത് @sickmanai എന്ന ഡിജിറ്റൽ ക്രിയേറ്ററുടെ ഇൻസ്റ്റഗ്രാം പേജിലാണ്. എഐ ആനിമേഷൻ ടൂളുകൾ ഉപയോഗിച്ച് കവചം ധരിച്ച കുഞ്ഞുപൂച്ചയുടെ വിഡിയോകൾ സൃഷ്ടിച്ച് പേജില്‍ പങ്കുവച്ചു. വിഡിയോകൾ വൈറലായതോടെ ലോകമെമ്പാടുമുള്ള മീം പേജുകളും എഡിറ്റർമാരും ഈ കുഞ്ഞുപൂച്ചയെ ഏറ്റെടുത്തു. സിനിമകളിൽ, സീരിസുകളിൽ, പോപ്പുലർ കൾച്ചറിലെ പല രംഗങ്ങളിലും എവിടെയും തരംഗമാണ് നമ്മുടെ ക്യാറ്റ് നൈറ്റ്. അങ്ങനെ ഒരു കുഞ്ഞു എഐ പൂച്ച പതിയെ ഇന്റർനെറ്റ് പ്രതിഭാസമായി.

എന്തുകൊണ്ടാണ് ക്യാറ്റ് നൈറ്റ് ഇത്രയും വൈറലായത്?

പൂച്ചകൾക്ക് സോഷ്യൽ മീഡിയയിൽ നേരത്തെ തന്നെ വലിയൊരു ഫാൻബേസുണ്ട്. അതിലേക്ക് ഒരു കുഞ്ഞുപൂച്ച കവചവും വാളും ധരിച്ച് നിന്നാലോ? ക്യൂട്ട്നെസും ഫാന്റസിയും ഒരുമിക്കുന്ന കാഴ്ച! ഇത്തരം മനോഹരവും ഭാവനാത്മകവുമായ ചിത്രങ്ങൾ നമ്മളിൽ പോസിറ്റീവ് വികാരങ്ങൾ ഉണർത്തും. യഥാർഥ ജീവിതത്തിലെ തിരക്കുകൾക്കിടയിൽ ഒരു നിമിഷത്തേക്കെങ്കിലും മറ്റൊരു ലോകത്തേക്ക് നമ്മളെ കൂട്ടിക്കൊണ്ടുപോകും. അതുകൊണ്ടാകാം കാറ്റ് നൈറ്റ് ഇത്ര പെട്ടെന്ന് ജനപ്രിയയായത്. 

ചിലപ്പോൾ ജീവിതം തന്നെ ഒരു വലിയ പ്രതിസന്ധിയായി മുന്നിൽ നിൽക്കും. എടുത്താല്‍ പൊങ്ങാത്ത വെല്ലുവിളികൾക്ക് മുന്നിൽ നിവർന്നുനിന്ന് പോരാടേണ്ടി വരും. അപ്പോൾ ഭയപ്പെടരുത്. ഉള്ളില്‍ ഉറങ്ങിക്കിടക്കുന്ന പോരാളിയെ ഉണര്‍ത്തൂ. നിങ്ങളും ഒരു ക്യാറ്റ് നൈറ്റ് ആകൂ!