സാരി ട്രെന്ഡും 3D ഫിഗറീന് ട്രെന്ഡുമൊക്കെ വൈറലാക്കിയ ഗൂഗിളിന്റെ നാനോ ബനാന ഓര്മയില്ലേ. പ്രോംപ്റ്റുകള് നല്കി നിങ്ങളുടെ അടിപൊടി സാരി ഉടുത്ത ഫോട്ടോകളും ത്രീ ഡി ഫിഗറീനുകളും ഉണ്ടാക്കിയില്ലേ.. അതിന്റെ അപ്ഡേറ്റഡ് വേര്ഷനുമായി എത്തിയിരിക്കുകയാണ് ഇപ്പോള് ഗൂഗിള്. കമ്പനിയുടെ ഏറ്റവും പുതിയ മോഡലായ നാനോ ബനാന 2 ലൈറ്റ് വേഗവും കുറഞ്ഞ ചെലവും ഒരുമിപ്പിക്കുന്ന ഇമേജ് ജനറേഷൻ സംവിധാനമാണ്.
ഒരു ടെക്സ്റ്റ് പ്രോംപ്റ്റ് നൽകിയാൽ വെറും നാല് സെക്കൻഡിനുള്ളില് ഉയർന്ന നിലവാരത്തിലുള്ള ചിത്രങ്ങൾ സൃഷ്ടിക്കാൻ ഈ മോഡലിന് കഴിയും. വേഗതയും കുറഞ്ഞ ചെലവും ഒരുപോലെ ഉറപ്പാക്കുന്ന തരത്തിലാണ് ലൈറ്റ് പതിപ്പ് രൂപകൽപ്പന ചെയ്തിരിക്കുന്നത്. അതിനാൽ ഡെവലപ്പർമാർക്കും കണ്ടന്റ് ക്രിയേറ്റർമാർക്കും ബിസിനസുകൾക്കും ഇത് കൂടുതൽ പ്രായോഗികമാകുമെന്നാണ് വിലയിരുത്തൽ. പുതിയ ചിത്രങ്ങൾ സൃഷ്ടിക്കുന്നതിനൊപ്പം നിലവിലുള്ള ചിത്രങ്ങളും എഡിറ്റ് ചെയ്യാനും നാനോ ബനാന 2 ലൈറ്റിന് കഴിയും.
ഉദാഹരണത്തിന്, ഒരു ചിത്രത്തിന്റെ പശ്ചാത്തലം മാറ്റുക, അനാവശ്യ വസ്തുക്കൾ നീക്കം ചെയ്യുക, പുതിയ ഘടകങ്ങൾ ചേർക്കുക, പകൽ ദൃശ്യത്തെ രാത്രിയാക്കുക, അല്ലെങ്കിൽ ഒരു സാധാരണ ഫോട്ടോയെ കാർട്ടൂൺ അല്ലെങ്കിൽ പെയിന്റിംഗ് ശൈലിയിലേക്ക് മാറ്റുക തുടങ്ങിയ ജോലികൾ ടെക്സ്റ്റ് ഉപയോഗിച്ച് തന്നെ നിർവഹിക്കാം. നാനോ ബനാന 2-ന്റെ പൂർണ്ണ പതിപ്പുമായി താരതമ്യം ചെയ്യുമ്പോൾ, ലൈറ്റ് പതിപ്പ് പ്രധാനമായും വേഗതയ്ക്കും കുറഞ്ഞ കമ്പ്യൂട്ടിംഗ് ചെലവിനുമാണ് മുൻഗണന നൽകുന്നത്. അതിനാല് സോഷ്യൽ മീഡിയ പോസ്റ്റുകൾ, പരസ്യങ്ങൾ, ഡിസൈൻ കോൺസെപ്റ്റുകൾ, അവതരണങ്ങൾ എന്നിവയ്ക്കാവശ്യമായ ദൃശ്യങ്ങൾ വളരെ വേഗത്തിൽ സൃഷ്ടിക്കാനാകുന്നതിനാൽ, കണ്ടന്റ് നിർമ്മാണ മേഖലയിലെ സമയംയും ചെലവും കുറയ്ക്കാൻ ഈ സാങ്കേതികവിദ്യ സഹായിക്കും.
AI ഉപയോഗിച്ച് സൃഷ്ടിച്ച ചിത്രങ്ങൾ തിരിച്ചറിയാൻ സഹായിക്കുന്ന ഗൂഗിളിന്റെ SynthID ഡിജിറ്റൽ വാട്ടർമാർക്കിംഗ് സാങ്കേതികവിദ്യയും ഈ മോഡലിൽ ഉൾപ്പെടുത്തിയിട്ടുണ്ട്. ഇതിലൂടെ AI സൃഷ്ടിച്ച ചിത്രങ്ങളും യഥാർത്ഥ ഫോട്ടോകളും തമ്മിലുള്ള വ്യത്യാസം തിരിച്ചറിയാൻ എളുപ്പമാകുകയും തെറ്റായ വിവരങ്ങളുടെ പ്രചരണം കുറയ്ക്കാനും സഹായിക്കുകയും ചെയ്യും.
ഇപ്പോൾ AI രംഗത്ത് ഗൂഗിൾ, ഓപ്പൺAI, ആന്ത്രോപിക്, മിഡ്ജേർണി തുടങ്ങിയ കമ്പനികൾ തമ്മിൽ കടുത്ത മത്സരമാണ് നടക്കുന്നത്. ഈ മത്സരത്തിൽ കൂടുതൽ വേഗതയും കുറഞ്ഞ ചെലവും ഉറപ്പാക്കുന്ന ഉൽപ്പന്നങ്ങളാണ് വിപണിയിൽ ശ്രദ്ധ നേടുന്നത്. ആ ലക്ഷ്യം മുൻനിർത്തിയാണ് ഗൂഗിൾ നാനോ ബനാന 2 ലൈറ്റ് അവതരിപ്പിച്ചിരിക്കുന്നത്.
വേഗത്തിൽ, കുറഞ്ഞ ചെലവിൽ, മികച്ച നിലവാരത്തിലുള്ള ചിത്രങ്ങൾ സൃഷ്ടിക്കാൻ കഴിയുന്ന ഈ പുതിയ മോഡൽ കണ്ടന്റ് ക്രിയേറ്റർമാർക്കും ഡിസൈനർമാർക്കും മാധ്യമപ്രവർത്തകർക്കും ബിസിനസുകൾക്കും വലിയ സഹായമാകുമെന്നാണ് സാങ്കേതിക വിദഗ്ധരുടെ വിലയിരുത്തൽ. AI അധിഷ്ഠിത കണ്ടന്റ് നിർമ്മാണത്തിന്റെ അടുത്ത ഘട്ടത്തിലേക്കുള്ള സുപ്രധാന ചുവടുവെപ്പായാണ് നാനോ ബനാന 2 ലൈറ്റിനെ ടെക് ലോകം കാണുന്നത്.