വിവാഹ മോചനത്തിന് ശേഷം വീണ്ടും ഒന്നിച്ചു; കാരണം വെളിപ്പെടുത്തി സൈന നെഹ്‌വാൾ

ഇന്ത്യന്‍ ബാഡ്മിന്‍റണ്‍ താരം ഒളിംപ്യന്‍ സൈന നെഹ്​വാളിന്റെ വിവാഹ മോചനം കഴിഞ്ഞ വർഷം വാർത്തകളിൽ ഇടം നേടിയിരുന്നു. 2025 ജൂലൈയിൽ ആയിരുന്നു സൈന ഭർത്താവ് പരുപ്പള്ളി കശ്യപുമായി വേർപിരിഞ്ഞത്. എന്നാൽ ആഴ്ചകൾക്ക് ശേഷം ഓഗസ്റ്റിൽ വീണ്ടും ഭർത്താവുമായി ഒന്നിക്കുന്നതിന്റെ സൂചനകളും സൈന നൽകിയിരുന്നു. 

2018-ലാണ് സൈന നെഹ്‌വാളും പരുപ്പള്ളി കശ്യപും വിവാഹിതരായത്. തങ്ങളുടെ ബന്ധത്തിന് മറ്റൊരു അവസരം കൂടി നൽകുകയാണെന്നും ഒടുവിൽ അനുരഞ്ജനം നടന്നതായും പിന്നീട് റിപ്പോർട്ടുകൾ വന്നിരുന്നു. വിവാഹ മോചനത്തിന് ശേഷമായുള്ള തങ്ങളുടെ കൂടിച്ചേരലിനെ കുറിച്ച് എന്‍ഡിടിവിക്ക് നല്‍കിയ ഒരു അഭിമുഖത്തില്‍ വെളിപ്പെടുത്തിയിരിക്കുകയാണ് സൈന. 

വിവാഹം എന്നത് ഒരു രേഖ മാത്രമല്ലെന്നും പരസ്പരമുള്ള മനസ്സിലാക്കലും ക്ഷമയുമാണ് ബന്ധങ്ങളിൽ ആവശ്യമെന്നും സൈന പറഞ്ഞു. 'ഞങ്ങളുടെ യാത്രയിൽ, ആശയവിനിമയവും ക്ഷമയും വളരെ പ്രധാനമാണെന്ന് ഞങ്ങൾ പഠിച്ചു. ബന്ധങ്ങൾ എന്നാൽ വാദങ്ങളിൽ ജയിക്കലല്ല, പങ്കാളിത്തത്തിന്റെയും വളർച്ചയുടെയും കാര്യമാണെന്ന് ഞങ്ങൾ ഇപ്പോൾ മനസിലാക്കുന്നു. ഇന്ന് ഞങ്ങൾ രണ്ടുപേരും പരസ്പരം ഞങ്ങളുടെ യാത്രകളെ പിന്തുണയ്ക്കാനും ഞങ്ങളുടെ അനുഭവങ്ങളിൽ നിന്ന് പഠിക്കാനും ശ്രമിക്കുന്നു'.

രണ്ട് ശക്തരായ വ്യക്തിത്വങ്ങൾ ഒരുമിച്ച് ജീവിക്കുമ്പോൾ, അഭിപ്രായവ്യത്യാസങ്ങൾ സ്വാഭാവികമാണ്. എന്നാൽ പ്രധാനം ബഹുമാനം, മനസ്സിലാക്കൽ, കാര്യങ്ങൾ പരിഹരിക്കാനുള്ള സന്നദ്ധത എന്നിവയാണ്. ഒരു ബന്ധം വിജയകരമാകാൻ, വിശ്വാസം, ആശയവിനിമയം, പരസ്പര ബഹുമാനം എന്നിവയാണ് വേണ്ടതെന്നും സൈന പറഞ്ഞു. ബന്ധങ്ങൾക്കിടയിൽ ഈഗോ ഒരു തടസ്സമായി മാറുമെന്ന മുന്നറിയിപ്പും സൈന  നൽകി.

'പരസ്പരം ഇടം നൽകുകയും പരസ്പരം സ്വപ്നങ്ങൾക്ക് പിന്തുണ നൽകുകയും ചെയ്യുക എന്നതാണ് മറ്റൊരു പ്രധാന കാര്യം. ഇന്നത്തെ വേഗതയേറിയ ജീവിതത്തിൽ, ഈഗോയും തെറ്റിദ്ധാരണകളും എളുപ്പത്തിൽ അകലം സൃഷ്ടിക്കും. പ്രതികരിക്കുന്നതിനു പകരം മനസ്സിലാക്കുന്നതിൽ ശ്രദ്ധ കേന്ദ്രീകരിച്ചാൽ, പല പ്രശ്‌നങ്ങളും പരിഹരിക്കാൻ കഴിയും', സൈന കൂട്ടിച്ചേർത്തു.

'മാതൃത്വം വളരെ വ്യക്തിപരമായ തീരുമാനമാണെന്നും ഓരോ സ്ത്രീയുടെയും യാത്ര വ്യത്യസ്തമാണെന്നും ഞാൻ വിശ്വസിക്കുന്നു. സ്ത്രീകൾ ചില സമയപരിധികൾ പാലിക്കണമെന്ന് സമൂഹം പലപ്പോഴും പ്രതീക്ഷിക്കുന്നു, പക്ഷേ അങ്ങനെയല്ല. ഇന്നത്തെ സ്ത്രീകൾക്ക് കരിയറും സ്വപ്നങ്ങളുമുണ്ട്. ആ തിരഞ്ഞെടുപ്പുകളെ ബഹുമാനിക്കണം. സമൂഹത്തിന്റെ സമ്മർദ്ദങ്ങൾക്ക് വഴങ്ങി അമ്മയാകുന്നതിന് പകരം ഒരു സ്ത്രീ വൈകാരികമായും വ്യക്തിപരമായും തയ്യാറായിരിക്കണം എന്നതാണ് പ്രധാന കാര്യം'.

കായികരംഗത്ത് ഇന്നും ലിംഗപരമായ അസമത്വം നിലനിൽക്കുന്നുണ്ടെന്നും സൈന അഭിപ്രായപ്പെട്ടു. പെൺകുട്ടികൾക്ക് തുല്യ പ്രോത്സാഹനവും അടിസ്ഥാന സൗകര്യങ്ങളും സമൂഹത്തിൽ നിന്നുള്ള വിശ്വാസവും ആവശ്യമാണ്. ആ പിന്തുണാ സംവിധാനം നിലവിൽ വന്നുകഴിഞ്ഞാൽ, ഉയർന്ന തലത്തിൽ മികവ് പുലർത്താൻ കഴിയുമെന്ന് സ്ത്രീകൾ വീണ്ടും വീണ്ടും തെളിയിച്ചിട്ടുണ്ട്," സൈന പറഞ്ഞു.