'മികച്ച കളിക്കാരന്‍, അതിലും വലിയ മനസ്'; കളിക്കളത്തിലും ആരാധക ഹൃദയത്തിലും താരമായി രാഹുല്‍

ന്യൂസിലൻഡിനെതിരായ രണ്ടാം ഏകദിനത്തില്‍ മല്‍സരത്തിന് ശേഷം ആരാധകരുടെ മനം കവർന്ന് ഇന്ത്യന്‍ താരം കെ.എൽ.രാഹുൽ. വെല്ലിംങ്ടണിലെ ഹെൻറി സ്റ്റേഡിയത്തിൽ നടന്ന മത്സരത്തില്‍ 'ഗെയിം ചേഞ്ചർ ഓഫ് ദി മാച്ച്' പുരസ്‌കാരം രാഹുലിനായിരുന്നു. എന്നാല്‍ പുരസ്കാരത്തിനൊപ്പം ലഭിച്ച ‌സ്‌മാർട്ട്‌ഫോൺ സ്റ്റേഡിയത്തിലെ ജീവനക്കാരിക്ക് സമ്മാനമായി നൽകിയാണ് രാഹുല്‍ കളിക്കളത്തിലും ആരാധകരുടെ ഹൃദയത്തിലും താരമായത്.

ബി.സി.സി.ഐ തങ്ങളുടെ സോഷ്യൽ മീഡിയ പ്ലാറ്റ്‌ഫോമുകളിലൂടെയാണ് ഇതിന്‍റെ ദൃശ്യങ്ങള്‍ പങ്കുവച്ചത്. ‘മികച്ച കളിക്കാരൻ, അതിലും വലിയ മനസ്സ്!’ എന്ന് കുറിച്ചാണ് ബി.സി.സി.ഐ വിഡിയോ പങ്കുവെച്ചത്. അതേസമയം, അദ്ദേഹം ആ ഫോൺ തനിക്ക് സമ്മാനമായി തരുമെന്ന് ഒട്ടും പ്രതീക്ഷിച്ചിരുന്നില്ലെന്ന് ജീവനക്കാരിയും പറഞ്ഞു. ‘സത്യത്തിൽ എനിക്ക് വലിയ അദ്ഭുതമാണ് തോന്നിയത്. ഞാന്‍ ഇപ്പോഴും അതിന്‍റെ ഞെട്ടലിലാണ്. അദ്ദേഹത്തിന്‍റെ ഈ പ്രവൃത്തി വളരെ അഭിനന്ദനാർഹമാണ്’– ജീവനക്കാരി കൂട്ടിച്ചേര്‍ത്തു.

മല്‍സരത്തില്‍ ഇന്ത്യ 4 റണ്‍സിനാണ് ജയിച്ചത്. മഴ മുടക്കിയ മല്‍സരത്തില്‍ ഡക്‌വര്‍ത്ത്–ലൂയിസ്–സ്റ്റേണ്‍ നിയമപ്രകാരമാണ് ഇന്ത്യയെ വിജയികളായി പ്രഖ്യാപിച്ചത്. ആദ്യം ബാറ്റ് ചെയ്ത ന്യൂസീലാന്‍ഡ് 41 ഓവറില്‍ 134 റണ്‍സിന് പുറത്തായി. വിജയലക്ഷ്യം തീരെ ചെറുതായിരുന്നിട്ടും മറുപടി ബാറ്റിങ്ങിനിറങ്ങിയ ഇന്ത്യ നന്നേ പാടുപെട്ടിരുന്നു. വിക്കറ്റ് കീപ്പര്‍ കെ.എല്‍.രാഹുലിന്‍റെ ചെറുത്തുനില്‍പ്പാണ് ടീമിനെ തോല്‍വിയില്‍ നിന്ന് രക്ഷിച്ചത്. ഇതോടെ അഞ്ച് മത്സരങ്ങളടങ്ങിയ ഏകദിന പരമ്പരയിൽ ഇന്ത്യ 2-0ത്തിന് മുന്നിലെത്തി. മൂന്നാം ഏകദിനം നവംബർ 10-ന് ഹാമിൽട്ടണിൽ നടക്കും.