ഏഷ്യൻ ഗെയിംസിൽ വെള്ളി; തിരുവമ്പാടിക്ക് അഭിമാനമായി വിദർശ

ചെറുപ്പം മുതൽ മാധ്യമപ്രവര്‍ത്തക ആകണമെന്നതായിരുന്നു വിദർശയുടെ ആഗ്രഹം. പക്ഷേ ഗുരുവായൂരപ്പൻ കോളജിലെ എൻസിസിയിൽ ചേർന്നതോടെ ജീവിതലക്ഷ്യം മാറി. തോക്കേന്തി ഷൂട്ടിങ് റേഞ്ചിലെത്തിയ വിദർശ കെ.വിനോദ് ഇന്ന് ഏഷ്യൻ ഗെയിംസിൽ രാജ്യത്തിനായി വെള്ളിമെഡൽ നേടിയിരിക്കുകയാണ്. വനിതകളുടെ 10 മീറ്റർ എയർ റൈഫിൾ ടീം ഇനത്തിലാണ് വിദർശ ഉൾപ്പെട്ട ഇന്ത്യൻ ടീം വെള്ളിമെഡൽ നേടിയത്. ഏഷ്യൻ ഗെയിംസ് ഷൂട്ടിങ്ങിൽ മെഡൽ നേടുന്ന ആദ്യ മലയാളി താരമെന്ന നേട്ടവും ഇതോടെ വിദർശ സ്വന്തമാക്കി.

മെഡൽ നേടിയ വിദർശയുടെ നേട്ടത്തിൽ തിരുവമ്പാടിയിലെ ഇലഞ്ഞിക്കൽ വീട്ടിലും ആഘോഷമാണ്. മകൾ മത്സരിക്കുന്ന സമയത്ത് ക്ഷേത്രത്തിൽ പ്രാർഥനയിലായിരുന്നു മാതാപിതാക്കളായ വിനോദും അനിതയും. മകൾ രാജ്യത്തിനായി മെഡൽ നേടിയെന്ന സന്തോഷവാർത്തയെത്തിയത് പ്രാർഥനയ്ക്കിടെ. മകളുടെ കഠിനാധ്വാനത്തിന് ലഭിച്ച പ്രതിഫലമാണ് ഈ മെഡലെന്ന് മാതാപിതാക്കൾ പറയുന്നു. പരിമിതമായ സൗകര്യങ്ങളിൽ നിന്ന് കഠിനാധ്വാനത്തിലൂടെയാണ് വിദർശ ദേശീയ ടീമിലേക്കും ഏഷ്യൻ ഗെയിംസ് വേദിയിലേക്കും എത്തിയത്. 

സ്വന്തമായി എയർ റൈഫിൾ ഇല്ലാതിരുന്ന സമയത്ത് സുഹൃത്തിന്റെ റൈഫിൾ ഉപയോഗിച്ചാണ് പരിശീലനവും മത്സരങ്ങളും നടത്തിയിരുന്നത്. 2018ൽ കോഴിക്കോട് ഗുരുവായൂരപ്പൻ കോളജിൽ ഡിഗ്രിക്ക് ചേർന്നപ്പോഴാണ് എൻ.സി.സി.യുടെ ഭാഗമായി വിദർശ ഷൂട്ടിങ്ങിലേക്ക് എത്തുന്നത്.  എൻ.സി.സി.യിലെ റൈഫിൾ പരിശീലനം ജീവിതത്തിന്റെ വഴിതന്നെ മാറ്റി. പിന്നീട് കോഴിക്കോട് റൈഫിൾ ക്ലബ്ബിൽ മുഴുവൻ സമയ പരിശീലനം ആരംഭിച്ചു.

2019ലെ ഖേലോ ഇന്ത്യ യൂത്ത് ഗെയിംസിൽ 50 മീറ്റർ വ്യക്തിഗത ഇനത്തിൽ കേരളത്തെ പ്രതിനിധീകരിച്ച ഏക വനിതാ താരമായിരുന്നു വിദർശ. സൗത്ത് സോൺ ഷൂട്ടിങ് ചാംപ്യൻഷിപ്പിലും കേരള ഷൂട്ടിങ് ചാംപ്യൻഷിപ്പിലും നിരവധി മെഡലുകൾ നേടിയ താരം അതേ വർഷം കേരള സ്റ്റേറ്റ് ചാംപ്യനുമായി. 2018 മുതൽ കേരളത്തിലെ വിവിധ റൈഫിൾ ഇനങ്ങളിൽ മികച്ച പ്രകടനം തുടരുന്ന വിദർശ നിരവധി ദേശീയ മത്സരങ്ങളിലും മികവ് തെളിയിച്ചിട്ടുണ്ട്. 

ഇപ്പോൾ ഇന്ത്യൻ ടീം കോച്ച് മനോജ് കുമാറിന്റെ കീഴിലാണ് വിദർശ പരിശീലനം നടത്തുന്നത്. തിരുവനന്തപുരത്തെ വട്ടിയൂർക്കാവ് നാഷണൽ ഗെയിംസ് ഷൂട്ടിങ് റേഞ്ചിലാണ് പരിശീലനം തുടരുന്നത്. ഭർത്താവ്  മനു എസ് രവിക്കൊപ്പം തിരുവനന്തപുരത്താണ് താമസം.

ഏഷ്യൻ ഗെയിംസിലെ ചരിത്രനേട്ടത്തിന് പിന്നാലെ മുഖ്യമന്ത്രിയടക്കം വിദർശയെ അഭിനന്ദിച്ചു. മന്ത്രി ടി.സിദ്ദിഖ്  തിരുവമ്പാടിയിലെ വിദർശയുടെ വീട്ടിൽ നേരിട്ട് എത്തി മാതാപിതാക്കളെ കണ്ട് അഭിനന്ദനം അറിയിച്ചു. ശനിയാഴ്ച നടക്കുന്ന 50 മീറ്റർ ത്രീ പൊസിഷൻ മല്‍സരത്തിലും മെഡൽ പ്രതീക്ഷയിലാണ് വിദർശയും കുടുംബവും.