1000 ഗോൾ നേട്ടത്തിലേക്ക് ഒരുപടി കൂടി; 979-ാം ഗോളുമായി ക്രിസ്റ്റ്യാനോ റൊണാൾഡോ

കരിയറിലെ 1000 ഗോൾ നേട്ടത്തിലേക്ക് ഒരുപടി കൂടി അടുത്ത് ക്രിസ്റ്റ്യാനോ റൊണാൾഡോ. സൗദി പ്രോ ലീഗിൽ അബ്ഹയ്‌ക്കെതിരായ മത്സരത്തിൽ കിടിലൻ ഹെഡറിലൂടെ ഗോൾ നേടിയ റൊണാൾഡോ കരിയറിലെ ഗോൾ നേട്ടം 979 ആയി ഉയർത്തി. മത്സരത്തിൽ അൽ നസർ 2–1ന് വിജയിച്ചു.

മത്സരത്തിന്റെ 22-ാം മിനിറ്റിലായിരുന്നു 41കാരനായ റൊണാൾഡോയുടെ ഹെഡർ ഗോൾ. ജോവോ ഫെലിക്സ് സസ്പെൻഷൻ മൂലവും കിങ്സ്ലി കോമാൻ പരിക്ക് മൂലവും കളിക്കാതിരുന്ന മത്സരത്തിൽ റൊണാൾഡോയെ പൂട്ടാനുള്ള അബ്ഹയുടെ ശ്രമങ്ങൾ ഫലം കണ്ടില്ല. 38-ാം മിനിറ്റിൽ റൊണാൾഡോയ്ക്ക് വീണ്ടും മികച്ച അവസരം ലഭിച്ചെങ്കിലും പന്ത് പോസ്റ്റിൽ തട്ടി പുറത്തേക്ക് പോയി. രണ്ടാം പകുതിയിൽ 58-ാം മിനിറ്റിൽ ഹംദാൻ അൽ നസറിന്റെ ലീഡ് രണ്ടാക്കി ഉയർത്തി.

75-ാം മിനിറ്റിൽ നബീൽ ഫെകീർ അബ്ഹയ്ക്കായി ആശ്വാസ ഗോൾ നേടി. എന്നാൽ പിന്നീട് സമനില ഗോൾ കണ്ടെത്താൻ അബ്ഹയ്ക്ക് കഴിഞ്ഞില്ല. വിജയത്തോടെ അൽ നസർ 15 പോയിന്റുമായി ലീഗിൽ രണ്ടാം സ്ഥാനത്തെത്തി. കരിയറിൽ 1000 ഗോളെന്ന ചരിത്രനേട്ടം ലക്ഷ്യമിടുന്ന റൊണാൾഡോയ്ക്ക് ഇനി 21 ഗോളുകൾ കൂടി വേണം.